၅. အနုသောတသုတ္တံ

၅. ‘‘စတ္တာရောမေ၊ ဘိက္ခဝေ၊ ပုဂ္ဂလာ သန္တော သံဝိဇ္ဇမာနာ လောကသ္မိံ. ကတမေ စတ္တာရော? အနုသောတဂါမီ ပုဂ္ဂလော၊ ပဋိသောတဂါမီ ပုဂ္ဂလော၊ ဌိတတ္တော ပုဂ္ဂလော၊ တိဏ္ဏော ပါရင်္ဂတော [ပါရဂတော (သီ. သျာ. ကံ.)] ထလေ တိဋ္ဌတိ ဗြာဟ္မဏော. ကတမော စ၊ ဘိက္ခဝေ၊ အနုသောတဂါမီ ပုဂ္ဂလော? ဣဓ၊ ဘိက္ခဝေ၊ ဧကစ္စော ပုဂ္ဂလော ကာမေ စ ပဋိသေဝတိ၊ ပါပဉ္စ ကမ္မံ ကရောတိ. အယံ ဝုစ္စတိ၊ ဘိက္ခဝေ၊ အနုသောတဂါမီ ပုဂ္ဂလော.

‘‘ကတမော စ၊ ဘိက္ခဝေ၊ ပဋိသောတဂါမီ ပုဂ္ဂလော? ဣဓ၊ ဘိက္ခဝေ၊ ဧကစ္စော ပုဂ္ဂလော ကာမေ စ နပ္ပဋိသေဝတိ၊ ပါပဉ္စ ကမ္မံ န ကရောတိ၊ သဟာပိ ဒုက္ခေန သဟာပိ ဒေါမနဿေန အဿုမုခေါပိ ရုဒမာနော ပရိပုဏ္ဏံ ပရိသုဒ္ဓံ ဗြဟ္မစရိယံ စရတိ. အယံ ဝုစ္စတိ၊ ဘိက္ခဝေ၊ ပဋိသောတဂါမီ ပုဂ္ဂလော.

‘‘ကတမော စ၊ ဘိက္ခဝေ၊ ဌိတတ္တော ပုဂ္ဂလော? ဣဓ၊ ဘိက္ခဝေ၊ ဧကစ္စော ပုဂ္ဂလော ပဉ္စန္နံ ဩရမ္ဘာဂိယာနံ သံယောဇနာနံ ပရိက္ခယာ ဩပပါတိကော ဟောတိ၊ တတ္ထ ပရိနိဗ္ဗာယီ၊ အနာဝတ္တိဓမ္မော တသ္မာ လောကာ. အယံ ဝုစ္စတိ၊ ဘိက္ခဝေ၊ ဌိတတ္တော ပုဂ္ဂလော.

‘‘ကတမော စ၊ ဘိက္ခဝေ၊ ပုဂ္ဂလော တိဏ္ဏော ပါရင်္ဂတော ထလေ တိဋ္ဌတိ ဗြာဟ္မဏော? ဣဓ၊ ဘိက္ခဝေ၊ ဧကစ္စော ပုဂ္ဂလော အာသဝါနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရတိ. အယံ ဝုစ္စတိ၊ ဘိက္ခဝေ၊ ပုဂ္ဂလော တိဏ္ဏော ပါရင်္ဂတော ထလေ တိဋ္ဌတိ ဗြာဟ္မဏော. ဣမေ ခေါ၊ ဘိက္ခဝေ၊ စတ္တာရော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ.

‘‘ယေ ကေစိ ကာမေသု အသညတာ ဇနာ၊

အဝီတရာဂါ ဣဓ ကာမဘောဂိနော၊

ပုနပ္ပုနံ ဇာတိဇရူပဂါမိ တေ [ဇာတိဇရူပဂါဟိနော (သီ.)၊ ဇာတိဇရူပဂါ ဟိ တေ (သျာ. ကံ.)]၊

တဏှာဓိပန္နာ အနုသောတဂါမိနော.

‘‘တသ္မာ ဟိ ဓီရော ဣဓုပဋ္ဌိတဿတီ၊

ကာမေ စ ပါပေ စ အသေဝမာနော၊

သဟာပိ ဒုက္ခေန ဇဟေယျ ကာမေ၊

ပဋိသောတဂါမီတိ တမာဟု ပုဂ္ဂလံ.

‘‘ယော ဝေ ကိလေသာနိ ပဟာယ ပဉ္စ၊

ပရိပုဏ္ဏသေခေါ အပရိဟာနဓမ္မော၊

စေတောဝသိပ္ပတ္တော သမာဟိတိန္ဒြိယော၊

သ ဝေ ဌိတတ္တောတိ နရော ပဝုစ္စတိ.

‘‘ပရောပရာ ယဿ သမေစ္စ ဓမ္မာ၊

ဝိဓူပိတာ အတ္ထဂတာ န သန္တိ၊

သ ဝေ မုနိ [သ ဝေဒဂူ (သီ. သျာ. ကံ. ပီ.)] ဝုသိတဗြဟ္မစရိယော၊

လောကန္တဂူ ပါရဂတောတိ ဝုစ္စတီ’’တိ. ပဉ္စမံ၊