၄. ပရိသာသုတ္တံ

၉၆. ‘‘တိဿော ဣမာ၊ ဘိက္ခဝေ၊ ပရိသာ. ကတမာ တိဿော? အဂ္ဂဝတီ ပရိသာ၊ ဝဂ္ဂါ ပရိသာ၊ သမဂ္ဂါ ပရိသာ.

‘‘ကတမာ စ၊ ဘိက္ခဝေ၊ အဂ္ဂဝတီ ပရိသာ? ဣဓ၊ ဘိက္ခဝေ၊ ယဿံ ပရိသာယံ ထေရာ ဘိက္ခူ န ဗာဟုလိကာ ဟောန္တိ န သာထလိကာ၊ ဩက္ကမနေ နိက္ခိတ္တဓုရာ ပဝိဝေကေ ပုဗ္ဗင်္ဂမာ၊ ဝီရိယံ အာရဘန္တိ အပ္ပတ္တဿ ပတ္တိယာ အနဓိဂတဿ အဓိဂမာယ အသစ္ဆိကတဿ သစ္ဆိကိရိယာယ၊ တေသံ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇတိ. သာပိ ဟောတိ န ဗာဟုလိကာ န သာထလိကာ ဩက္ကမနေ နိက္ခိတ္တဓုရာ ပဝိဝေကေ ပုဗ္ဗင်္ဂမာ၊ ဝီရိယံ အာရဘတိ အပ္ပတ္တဿ ပတ္တိယာ အနဓိဂတဿ အဓိဂမာယ အသစ္ဆိကတဿ သစ္ဆိကိရိယာယ. အယံ ဝုစ္စတိ၊ ဘိက္ခဝေ၊ အဂ္ဂဝတီ ပရိသာ.

‘‘ကတမာ စ၊ ဘိက္ခဝေ၊ ဝဂ္ဂါ ပရိသာ? ဣဓ၊ ဘိက္ခဝေ၊ ယဿံ ပရိသာယံ ဘိက္ခူ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ၊ အယံ ဝုစ္စတိ၊ ဘိက္ခဝေ၊ ဝဂ္ဂါ ပရိသာ.

‘‘ကတမာ စ၊ ဘိက္ခဝေ၊ သမဂ္ဂါ ပရိသာ? ဣဓ၊ ဘိက္ခဝေ၊ ယဿံ ပရိသာယံ ဘိက္ခူ သမဂ္ဂါ သမ္မောဒမာနာ အဝိဝဒမာနာ ခီရောဒကီဘူတာ အညမညံ ပိယစက္ခူဟိ သမ္ပဿန္တာ ဝိဟရန္တိ၊ အယံ ဝုစ္စတိ၊ ဘိက္ခဝေ၊ သမဂ္ဂါ ပရိသာ.

‘‘ယသ္မိံ၊ ဘိက္ခဝေ၊ သမယေ ဘိက္ခူ သမဂ္ဂါ သမ္မောဒမာနာ အဝိဝဒမာနာ ခီရောဒကီဘူတာ အညမညံ ပိယစက္ခူဟိ သမ္ပဿန္တာ ဝိဟရန္တိ၊ ဗဟုံ၊ ဘိက္ခဝေ၊ ဘိက္ခူ တသ္မိံ သမယေ ပုညံ ပသဝန္တိ. ဗြဟ္မံ၊ ဘိက္ခဝေ၊ ဝိဟာရံ တသ္မိံ သမယေ ဘိက္ခူ ဝိဟရန္တိ၊ ယဒိဒံ မုဒိတာယ စေတောဝိမုတ္တိယာ. ပမုဒိတဿ ပီတိ ဇာယတိ၊ ပီတိမနဿ ကာယော ပဿမ္ဘတိ၊ ပဿဒ္ဓကာယော သုခံ ဝေဒိယတိ၊ သုခိနော စိတ္တံ သမာဓိယတိ.

‘‘သေယျထာပိ၊ ဘိက္ခဝေ၊ ဥပရိပဗ္ဗတေ ထုလ္လဖုသိတကေ ဒေဝေ ဝဿန္တေ တံ ဥဒကံ ယထာနိန္နံ ပဝတ္တမာနံ ပဗ္ဗတကန္ဒရပဒရသာခါ ပရိပူရေတိ၊ ပဗ္ဗတကန္ဒရပဒရသာခါ ပရိပူရာ ကုသောဗ္ဘေ [ကုဿုမ္ဘေ (သီ. ပီ.)၊ ကုသုမ္ဘေ (သျာ. ကံ. က.)] ပရိပူရေန္တိ၊ ကုသောဗ္ဘာ ပရိပူရာ မဟာသောဗ္ဘေ ပရိပူရေန္တိ၊ မဟာသောဗ္ဘာ ပရိပူရာ ကုန္နဒိယော ပရိပူရေန္တိ၊ ကုန္နဒိယော ပရိပူရာ မဟာနဒိယော ပရိပူရေန္တိ၊ မဟာနဒိယော ပရိပူရာ သမုဒ္ဒံ [သမုဒ္ဒသာဂရေ (က.)] ပရိပူရေန္တိ.

‘‘ဧဝမေဝံ ခေါ၊ ဘိက္ခဝေ၊ ယသ္မိံ သမယေ ဘိက္ခူ သမဂ္ဂါ သမ္မောဒမာနာ အဝိဝဒမာနာ ခီရောဒကီဘူတာ အညမညံ ပိယစက္ခူဟိ သမ္ပဿန္တာ ဝိဟရန္တိ၊ ဗဟုံ၊ ဘိက္ခဝေ၊ ဘိက္ခူ တသ္မိံ သမယေ ပုညံ ပသဝန္တိ. ဗြဟ္မံ၊ ဘိက္ခဝေ၊ ဝိဟာရံ တသ္မိံ သမယေ ဘိက္ခူ ဝိဟရန္တိ၊ ယဒိဒံ မုဒိတာယ စေတောဝိမုတ္တိယာ. ပမုဒိတဿ ပီတိ ဇာယတိ၊ ပီတိမနဿ ကာယော ပဿမ္ဘတိ၊ ပဿဒ္ဓကာယော သုခံ ဝေဒိယတိ၊ သုခိနော စိတ္တံ သမာဓိယတိ. ဣမာ ခေါ၊ ဘိက္ခဝေ၊ တိဿော ပရိသာ’’တိ. စတုတ္ထံ.