၂. ပဝိဝေကသုတ္တံ

၉၄. ‘‘တီဏိမာနိ၊ ဘိက္ခဝေ၊ အညတိတ္ထိယာ ပရိဗ္ဗာဇကာ ပဝိဝေကာနိ ပညာပေန္တိ. ကတမာနိ တီဏိ? စီဝရပဝိဝေကံ၊ ပိဏ္ဍပါတပဝိဝေကံ၊ သေနာသနပဝိဝေကံ.

‘‘တတြိဒံ၊ ဘိက္ခဝေ၊ အညတိတ္ထိယာ ပရိဗ္ဗာဇကာ စီဝရပဝိဝေကသ္မိံ ပညာပေန္တိ၊ သာဏာနိပိ ဓာရေန္တိ၊ မသာဏာနိပိ ဓာရေန္တိ၊ ဆဝဒုဿာနိပိ ဓာရေန္တိ၊ ပံသုကူလာနိပိ ဓာရေန္တိ၊ တိရီဋာနိပိ ဓာရေန္တိ၊ အဇိနမ္ပိ ဓာရေန္တိ၊ အဇိနက္ခိပမ္ပိ ဓာရေန္တိ၊ ကုသစီရမ္ပိ ဓာရေန္တိ၊ ဝါကစီရမ္ပိ ဓာရေန္တိ၊ ဖလကစီရမ္ပိ ဓာရေန္တိ၊ ကေသကမ္ဗလမ္ပိ ဓာရေန္တိ၊ ဝါလကမ္ဗလမ္ပိ ဓာရေန္တိ၊ ဥလူကပက္ခိကမ္ပိ ဓာရေန္တိ. ဣဒံ ခေါ၊ ဘိက္ခဝေ၊ အညတိတ္ထိယာ ပရိဗ္ဗာဇကာ စီဝရပဝိဝေကသ္မိံ ပညာပေန္တိ.

‘‘တတြိဒံ၊ ဘိက္ခဝေ၊ အညတိတ္ထိယာ ပရိဗ္ဗာဇကာ ပိဏ္ဍပါတပဝိဝေကသ္မိံ ပညာပေန္တိ. သာကဘက္ခာပိ ဟောန္တိ၊ သာမာကဘက္ခာပိ ဟောန္တိ၊ နီဝါရဘက္ခာပိ ဟောန္တိ၊ ဒဒ္ဒုလဘက္ခာပိ ဟောန္တိ၊ ဟဋဘက္ခာပိ ဟောန္တိ၊ ကဏဘက္ခာပိ ဟောန္တိ၊ အာစာမဘက္ခာပိ ဟောန္တိ၊ ပိညာကဘက္ခာပိ ဟောန္တိ၊ တိဏဘက္ခာပိ ဟောန္တိ၊ ဂေါမယဘက္ခာပိ ဟောန္တိ၊ ဝနမူလဖလာဟာရာ ယာပေန္တိ ပဝတ္တဖလဘောဇီ. ဣဒံ ခေါ၊ ဘိက္ခဝေ၊ အညတိတ္ထိယာ ပရိဗ္ဗာဇကာ ပိဏ္ဍပါတပဝိဝေကသ္မိံ ပညာပေန္တိ.

‘‘တတြိဒံ၊ ဘိက္ခဝေ၊ အညတိတ္ထိယာ ပရိဗ္ဗာဇကာ သေနာသနပဝိဝေကသ္မိံ ပညာပေန္တိ အရညံ ရုက္ခမူလံ သုသာနံ [ရုက္ခမူလံ ဘုသာဂါရံ သုသာနံ (က.)] ဝနပတ္ထံ အဗ္ဘောကာသံ ပလာလပုဉ္ဇံ ဘုသာဂါရံ [သုညာဂါရံ (က.)]. ဣဒံ ခေါ၊ ဘိက္ခဝေ၊ အညတိတ္ထိယာ ပရိဗ္ဗာဇကာ သေနာသနပဝိဝေကသ္မိံ ပညာပေန္တိ. ဣမာနိ ခေါ၊ ဘိက္ခဝေ၊ တီဏိ အညတိတ္ထိယာ ပရိဗ္ဗာဇကာ ပဝိဝေကာနိ ပညာပေန္တိ.

‘‘တီဏိ ခေါ ပနိမာနိ၊ ဘိက္ခဝေ၊ ဣမသ္မိံ ဓမ္မဝိနယေ ဘိက္ခုနော ပဝိဝေကာနိ. ကတမာနိ တီဏိ? ဣဓ၊ ဘိက္ခဝေ၊ ဘိက္ခု သီလဝါ စ ဟောတိ၊ ဒုဿီလျဉ္စဿ ပဟီနံ ဟောတိ၊ တေန စ ဝိဝိတ္တော ဟောတိ၊ သမ္မာဒိဋ္ဌိကော စ ဟောတိ၊ မိစ္ဆာဒိဋ္ဌိ စဿ ပဟီနာ ဟောတိ၊ တာယ စ ဝိဝိတ္တော ဟောတိ၊ ခီဏာသဝေါ စ ဟောတိ၊ အာသဝါ စဿ ပဟီနာ ဟောန္တိ၊ တေဟိ စ ဝိဝိတ္တော ဟောတိ. ယတော ခေါ၊ ဘိက္ခဝေ၊ ဘိက္ခု သီလဝါ ဟောတိ၊ ဒုဿီလျဉ္စဿ ပဟီနံ ဟောတိ၊ တေန စ ဝိဝိတ္တော ဟောတိ၊ သမ္မာဒိဋ္ဌိကော စ ဟောတိ၊ မိစ္ဆာဒိဋ္ဌိ စဿ ပဟီနာ ဟောတိ၊ တာယ စ ဝိဝိတ္တော ဟောတိ၊ ခီဏာသဝေါ စ ဟောတိ၊ အာသဝါ စဿ ပဟီနာ ဟောန္တိ၊ တေဟိ စ ဝိဝိတ္တော ဟောတိ. အယံ ဝုစ္စတိ၊ ဘိက္ခဝေ၊ ‘ဘိက္ခု အဂ္ဂပ္ပတ္တော သာရပ္ပတ္တော သုဒ္ဓေါ သာရေ ပတိဋ္ဌိတော’’’.

‘‘သေယျထာပိ၊ ဘိက္ခဝေ၊ ကဿကဿ ဂဟပတိဿ သမ္ပန္နံ သာလိက္ခေတ္တံ. တမေနံ ကဿကော ဂဟပတိ သီဃံ သီဃံ [သီဃသီဃံ (သီ. သျာ. ကံ. ပီ.)] လဝါပေယျ. သီဃံ သီဃံ လဝါပေတွာ သီဃံ သီဃံ သင်္ဃရာပေယျ. သီဃံ သီဃံ သင်္ဃရာပေတွာ သီဃံ သီဃံ ဥဗ္ဗဟာပေယျ [ဥဗ္ဗာဟာပေယျ (သျာ. ကံ.)]. သီဃံ သီဃံ ဥဗ္ဗဟာပေတွာ သီဃံ သီဃံ ပုဉ္ဇံ ကာရာပေယျ. သီဃံ သီဃံ ပုဉ္ဇံ ကာရာပေတွာ သီဃံ သီဃံ မဒ္ဒါပေယျ. သီဃံ သီဃံ မဒ္ဒါပေတွာ သီဃံ သီဃံ ပလာလာနိ ဥဒ္ဓရာပေယျ. သီဃံ သီဃံ ပလာလာနိ ဥဒ္ဓရာပေတွာ သီဃံ သီဃံ ဘုသိကံ ဥဒ္ဓရာပေယျ. သီဃံ သီဃံ ဘုသိကံ ဥဒ္ဓရာပေတွာ သီဃံ သီဃံ ဩပုနာပေယျ. သီဃံ သီဃံ ဩပုနာပေတွာ သီဃံ သီဃံ အတိဟရာပေယျ. သီဃံ သီဃံ အတိဟရာပေတွာ သီဃံ သီဃံ ကောဋ္ဋာပေယျ. သီဃံ သီဃံ ကောဋ္ဋာပေတွာ သီဃံ သီဃံ ထုသာနိ ဥဒ္ဓရာပေယျ. ဧဝမဿု [ဧဝဿု (က.)] တာနိ၊ ဘိက္ခဝေ၊ ကဿကဿ ဂဟပတိဿ ဓညာနိ အဂ္ဂပ္ပတ္တာနိ သာရပ္ပတ္တာနိ သုဒ္ဓါနိ သာရေ ပတိဋ္ဌိတာနိ.

‘‘ဧဝမေဝံ ခေါ၊ ဘိက္ခဝေ၊ ယတော ဘိက္ခု သီလဝါ စ ဟောတိ၊ ဒုဿီလျဉ္စဿ ပဟီနံ ဟောတိ၊ တေန စ ဝိဝိတ္တော ဟောတိ၊ သမ္မာဒိဋ္ဌိကော စ ဟောတိ၊ မိစ္ဆာဒိဋ္ဌိ စဿ ပဟီနာ ဟောတိ၊ တာယ စ ဝိဝိတ္တော ဟောတိ၊ ခီဏာသဝေါ စ ဟောတိ၊ အာသဝါ စဿ ပဟီနာ ဟောန္တိ၊ တေဟိ စ ဝိဝိတ္တော ဟောတိ. အယံ ဝုစ္စတိ၊ ဘိက္ခဝေ၊ ‘ဘိက္ခု အဂ္ဂပ္ပတ္တော သာရပ္ပတ္တော သုဒ္ဓေါ သာရေ ပတိဋ္ဌိတော’’’တိ. ဒုတိယံ.