၉. ပဌမသိက္ခတ္တယသုတ္တံ

၉၀. ‘‘တိဿော ဣမာ၊ ဘိက္ခဝေ၊ သိက္ခာ. ကတမာ တိဿော? အဓိသီလသိက္ခာ၊ အဓိစိတ္တသိက္ခာ၊ အဓိပညာသိက္ခာ.

‘‘ကတမာ စ၊ ဘိက္ခဝေ၊ အဓိသီလသိက္ခာ? ဣဓ၊ ဘိက္ခဝေ၊ ဘိက္ခု သီလဝါ ဟောတိ။ပေ။ သမာဒါယ သိက္ခတိ သိက္ခာပဒေသု. အယံ ဝုစ္စတိ၊ ဘိက္ခဝေ၊ အဓိသီလသိက္ခာ.

‘‘ကတမာ စ၊ ဘိက္ခဝေ၊ အဓိစိတ္တသိက္ခာ? ဣဓ၊ ဘိက္ခဝေ၊ ဘိက္ခု ဝိဝိစ္စေဝ ကာမေဟိ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ. အယံ ဝုစ္စတိ၊ ဘိက္ခဝေ၊ အဓိစိတ္တသိက္ခာ.

‘‘ကတမာ စ၊ ဘိက္ခဝေ၊ အဓိပညာသိက္ခာ? ဣဓ၊ ဘိက္ခဝေ၊ ဘိက္ခု ‘ဣဒံ ဒုက္ခ’န္တိ ယထာဘူတံ ပဇာနာတိ။ပေ။ ‘အယံ ဒုက္ခနိရောဓဂါမိနီ ပဋိပဒါ’တိ ယထာဘူတံ ပဇာနာတိ. အယံ ဝုစ္စတိ၊ ဘိက္ခဝေ၊ အဓိပညာသိက္ခာ. ဣမာ ခေါ၊ ဘိက္ခဝေ၊ တိဿော သိက္ခာ’’တိ. နဝမံ.