၄. ဝဇ္ဇိပုတ္တသုတ္တံ

၈၅. ဧကံ သမယံ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ. အထ ခေါ အညတရော ဝဇ္ဇိပုတ္တကော ဘိက္ခု ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ သော ဝဇ္ဇိပုတ္တကော ဘိက္ခု ဘဂဝန္တံ ဧတဒဝေါစ – ‘‘သာဓိကမိဒံ၊ ဘန္တေ၊ ဒိယဍ္ဎသိက္ခာပဒသတံ [ဒိယဍ္ဎံ သိက္ခာပဒသတံ (သီ.)] အနွဒ္ဓမာသံ ဥဒ္ဒေသံ အာဂစ္ဆတိ. နာဟံ၊ ဘန္တေ၊ ဧတ္ထ သက္ကောမိ သိက္ခိတု’’န္တိ. ‘‘သက္ခိဿသိ ပန တွံ၊ ဘိက္ခု၊ တီသု သိက္ခာသု သိက္ခိတုံ – အဓိသီလသိက္ခာယ၊ အဓိစိတ္တသိက္ခာယ အဓိပညာသိက္ခာယာ’’တိ? ‘‘သက္ကောမဟံ၊ ဘန္တေ၊ တီသု သိက္ခာသု သိက္ခိတုံ – အဓိသီလသိက္ခာယ၊ အဓိစိတ္တသိက္ခာယ၊ အဓိပညာသိက္ခာယာ’’တိ. ‘‘တသ္မာတိဟ တွံ၊ ဘိက္ခု၊ တီသု သိက္ခာသု သိက္ခဿု – အဓိသီလသိက္ခာယ၊ အဓိစိတ္တသိက္ခာယ၊ အဓိပညာသိက္ခာယ’’.

‘‘ယတော ခေါ တွံ၊ ဘိက္ခု၊ အဓိသီလမ္ပိ သိက္ခိဿသိ၊ အဓိစိတ္တမ္ပိ သိက္ခိဿသိ၊ အဓိပညမ္ပိ သိက္ခိဿသိ၊ တဿ တုယှံ ဘိက္ခု အဓိသီလမ္ပိ သိက္ခတော အဓိစိတ္တမ္ပိ သိက္ခတော အဓိပညမ္ပိ သိက္ခတော ရာဂေါ ပဟီယိဿတိ၊ ဒေါသော ပဟီယိဿတိ၊ မောဟော ပဟီယိဿတိ. သော တွံ ရာဂဿ ပဟာနာ ဒေါသဿ ပဟာနာ မောဟဿ ပဟာနာ ယံ အကုသလံ န တံ ကရိဿသိ၊ ယံ ပါပံ န တံ သေဝိဿသီ’’တိ.

အထ ခေါ သော ဘိက္ခု အပရေန သမယေန အဓိသီလမ္ပိ သိက္ခိ၊ အဓိစိတ္တမ္ပိ သိက္ခိ၊ အဓိပညမ္ပိ သိက္ခိ. တဿ အဓိသီလမ္ပိ သိက္ခတော အဓိစိတ္တမ္ပိ သိက္ခတော အဓိပညမ္ပိ သိက္ခတော ရာဂေါ ပဟီယိ၊ ဒေါသော ပဟီယိ၊ မောဟော ပဟီယိ. သော ရာဂဿ ပဟာနာ ဒေါသဿ ပဟာနာ မောဟဿ ပဟာနာ ယံ အကုသလံ တံ နာကာသိ၊ ယံ ပါပံ တံ န သေဝီတိ. စတုတ္ထံ.