၆. သံယောဇနသုတ္တံ

၆. ‘‘ဒွေမေ၊ ဘိက္ခဝေ၊ ဓမ္မာ. ကတမေ ဒွေ? ယာ စ သံယောဇနိယေသု ဓမ္မေသု အဿာဒါနုပဿိတာ၊ ယာ စ သံယောဇနိယေသု ဓမ္မေသု နိဗ္ဗိဒါနုပဿိတာ. သံယောဇနိယေသု၊ ဘိက္ခဝေ၊ ဓမ္မေသု အဿာဒါနုပဿီ ဝိဟရန္တော ရာဂံ န ပဇဟတိ၊ ဒေါသံ န ပဇဟတိ၊ မောဟံ န ပဇဟတိ. ရာဂံ အပ္ပဟာယ၊ ဒေါသံ အပ္ပဟာယ၊ မောဟံ အပ္ပဟာယ န ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒေါမနဿေဟိ ဥပါယာသေဟိ. န ပရိမုစ္စတိ ဒုက္ခသ္မာတိ ဝဒါမိ.

‘‘သံယောဇနိယေသု၊ ဘိက္ခဝေ၊ ဓမ္မေသု နိဗ္ဗိဒါနုပဿီ ဝိဟရန္တော ရာဂံ ပဇဟတိ၊ ဒေါသံ ပဇဟတိ၊ မောဟံ ပဇဟတိ. ရာဂံ ပဟာယ၊ ဒေါသံ ပဟာယ၊ မောဟံ ပဟာယ၊ ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒေါမနဿေဟိ ဥပါယာသေဟိ. ပရိမုစ္စတိ ဒုက္ခသ္မာတိ ဝဒါမိ. ဣမေ ခေါ၊ ဘိက္ခဝေ၊ ဒွေ ဓမ္မာ’’တိ. ဆဋ္ဌံ.