၁. သာဓုသုတ္တံ

၁၇၈. [အ. နိ. ၁၀.၁၃၄] ‘‘သာဓုဉ္စ ဝေါ၊ ဘိက္ခဝေ၊ ဒေသေဿာမိ အသာဓုဉ္စ. တံ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘ကတမဉ္စ၊ ဘိက္ခဝေ၊ အသာဓု? ပါဏာတိပါတော၊ အဒိန္နာဒါနံ၊ ကာမေသုမိစ္ဆာစာရော၊ မုသာဝါဒေါ၊ ပိသုဏာ ဝါစာ၊ ဖရုသာ ဝါစာ၊ သမ္ဖပ္ပလာပေါ၊ အဘိဇ္ဈာ၊ ဗျာပါဒေါ၊ မိစ္ဆာဒိဋ္ဌိ – ဣဒံ ဝုစ္စတိ၊ ဘိက္ခဝေ၊ အသာဓု.

‘‘ကတမဉ္စ၊ ဘိက္ခဝေ၊ သာဓု? ပါဏာတိပါတာ ဝေရမဏီ၊ အဒိန္နာဒါနာ ဝေရမဏီ၊ ကာမေသုမိစ္ဆာစာရာ ဝေရမဏီ၊ မုသာဝါဒါ ဝေရမဏီ၊ ပိသုဏာယ ဝါစာယ ဝေရမဏီ၊ ဖရုသာယ ဝါစာယ ဝေရမဏီ၊ သမ္ဖပ္ပလာပါ ဝေရမဏီ၊ အနဘိဇ္ဈာ၊ အဗျာပါဒေါ၊ သမ္မာဒိဋ္ဌိ – ဣဒံ ဝုစ္စတိ၊ ဘိက္ခဝေ၊ သာဓူ’’တိ. ပဌမံ.