(၁၆) ၁. ပုဂ္ဂလဝဂ္ဂေါ

၁. သေဝိတဗ္ဗသုတ္တံ

၁၅၅. ‘‘ဒသဟိ၊ ဘိက္ခဝေ၊ ဓမ္မေဟိ သမန္နာဂတော ပုဂ္ဂလော န သေဝိတဗ္ဗော. ကတမေဟိ ဒသဟိ? မိစ္ဆာဒိဋ္ဌိကော ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါစော ဟောတိ၊ မိစ္ဆာကမ္မန္တော ဟောတိ၊ မိစ္ဆာအာဇီဝေါ ဟောတိ၊ မိစ္ဆာဝါယာမော ဟောတိ၊ မိစ္ဆာသတိ ဟောတိ၊ မိစ္ဆာသမာဓိ ဟောတိ၊ မိစ္ဆာဉာဏီ ဟောတိ၊ မိစ္ဆာဝိမုတ္တိ ဟောတိ – ဣမေဟိ ခေါ၊ ဘိက္ခဝေ၊ ဒသဟိ ဓမ္မေဟိ သမန္နာဂတော ပုဂ္ဂလော န သေဝိတဗ္ဗော.

‘‘ဒသဟိ၊ ဘိက္ခဝေ၊ ဓမ္မေဟိ သမန္နာဂတော ပုဂ္ဂလော သေဝိတဗ္ဗော. ကတမေဟိ ဒသဟိ? သမ္မာဒိဋ္ဌိကော ဟောတိ၊ သမ္မာသင်္ကပ္ပေါ ဟောတိ၊ သမ္မာဝါစော ဟောတိ၊ သမ္မာကမ္မန္တော ဟောတိ၊ သမ္မာအာဇီဝေါ ဟောတိ၊ သမ္မာဝါယာမော ဟောတိ၊ သမ္မာသတိ ဟောတိ၊ သမ္မာသမာဓိ ဟောတိ၊ သမ္မာဉာဏီ ဟောတိ၊ သမ္မာဝိမုတ္တိ ဟောတိ – ဣမေဟိ ခေါ၊ ဘိက္ခဝေ၊ ဒသဟိ ဓမ္မေဟိ သမန္နာဂတော ပုဂ္ဂလော သေဝိတဗ္ဗော’’တိ.

၂-၁၂. ဘဇိတဗ္ဗာဒိသုတ္တာနိ

၁၅၆-၁၆၆. ‘‘ဒသဟိ၊ ဘိက္ခဝေ၊ ဓမ္မေဟိ သမန္နာဂတော ပုဂ္ဂလော န ဘဇိတဗ္ဗော။ပေ။ ဘဇိတဗ္ဗော။ပေ။ န ပယိရုပါသိတဗ္ဗော။ ပယိရုပါသိတဗ္ဗော။ပေ။ န ပုဇ္ဇော ဟောတိ။ ပုဇ္ဇော ဟောတိ။ပေ။ န ပါသံသော ဟောတိ။ ပါသံသော ဟောတိ။ပေ။ အဂါရဝေါ ဟောတိ။ သဂါရဝေါ ဟောတိ။ပေ။ အပ္ပတိဿော ဟောတိ။ သပ္ပတိဿော ဟောတိ။ပေ။ န အာရာဓကော ဟောတိ ။ အာရာဓကော ဟောတိ။ပေ။ န ဝိသုဇ္ဈတိ။ ဝိသုဇ္ဈတိ။ပေ။ မာနံ နာဓိဘောတိ။ မာနံ အဓိဘောတိ။ပေ. ။ ပညာယ န ဝဍ္ဎတိ။ ပညာယ ဝဍ္ဎတိ။ပေ။.

‘‘ဗဟုံ အပုညံ ပသဝတိ။ ဗဟုံ ပုညံ ပသဝတိ. ကတမေဟိ ဒသဟိ? သမ္မာဒိဋ္ဌိကော ဟောတိ၊ သမ္မာသင်္ကပ္ပေါ ဟောတိ၊ သမ္မာဝါစော ဟောတိ၊ သမ္မာကမ္မန္တော ဟောတိ၊ သမ္မာအာဇီဝေါ ဟောတိ၊ သမ္မာဝါယာမော ဟောတိ၊ သမ္မာသတိ ဟောတိ၊ သမ္မာသမာဓိ ဟောတိ၊ သမ္မာဉာဏီ ဟောတိ၊ သမ္မာဝိမုတ္တိ ဟောတိ – ဣမေဟိ ခေါ၊ ဘိက္ခဝေ၊ ဒသဟိ ဓမ္မေဟိ သမန္နာဂတော ပုဂ္ဂလော ဗဟုံ ပုညံ ပသဝတီ’’တိ.

ပုဂ္ဂလဝဂ္ဂေါ ပဌမော.