၂. ကဏ္ဋကသုတ္တံ

၇၂. ဧကံ သမယံ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ သမ္ဗဟုလေဟိ အဘိညာတေဟိ အဘိညာတေဟိ ထေရေဟိ သာဝကေဟိ သဒ္ဓိံ – အာယသ္မတာ စ စာလေန [ပါလေန (သျာ.)]၊ အာယသ္မတာ စ ဥပစာလေန [ဥပ္ပါလေန (သျာ.)]၊ အာယသ္မတာ စ ကုက္ကုဋေန [ကက္ကဋေန (သီ. သျာ.)]၊ အာယသ္မတာ စ ကဠိမ္ဘေန [ကဝိမ္ဘေန (သီ.)]၊ အာယသ္မတာ စ နိကဋေန [ကဋေန (သီ.)]၊ အာယသ္မတာ စ ကဋိဿဟေန၊ အညေဟိ စ အဘိညာတေဟိ အဘိညာတေဟိ ထေရေဟိ သာဝကေဟိ သဒ္ဓိံ.

တေန ခေါ ပန သမယေန သမ္ဗဟုလာ အဘိညာတာ အဘိညာတာ လိစ္ဆဝီ ဘဒြေဟိ ဘဒြေဟိ ယာနေဟိ ပရပုရာယ [ပရံပုရာယ (သျာ. အဋ္ဌ.)] ဥစ္စာသဒ္ဒါ မဟာသဒ္ဒါ မဟာဝနံ အဇ္ဈောဂါဟန္တိ ဘဂဝန္တံ ဒဿနာယ. အထ ခေါ တေသံ အာယသ္မန္တာနံ ဧတဒဟောသိ – ‘‘ဣမေ ခေါ သမ္ဗဟုလာ အဘိညာတာ အဘိညာတာ လိစ္ဆဝီ ဘဒြေဟိ ဘဒြေဟိ ယာနေဟိ ပရပုရာယ ဥစ္စာသဒ္ဒါ မဟာသဒ္ဒါ မဟာဝနံ အဇ္ဈောဂါဟန္တိ ဘဂဝန္တံ ဒဿနာယ. ‘သဒ္ဒကဏ္ဋကာ ခေါ ပန ဈာနာ’ ဝုတ္တာ ဘဂဝတာ. ယံနူန မယံ ယေန ဂေါသိင်္ဂသာလဝနဒါယော တေနုပသင်္ကမေယျာမ. တတ္ထ မယံ အပ္ပသဒ္ဒါ အပ္ပါကိဏ္ဏာ ဖာသုံ [ဖာသု (သျာ. က.)] ဝိဟရေယျာမာ’’တိ. အထ ခေါ တေ အာယသ္မန္တော ယေန ဂေါသိင်္ဂသာလဝနဒါယော တေနုပသင်္ကမိံသု၊ တတ္ထ တေ အာယသ္မန္တော အပ္ပသဒ္ဒါ အပ္ပါကိဏ္ဏာ ဖာသုံ ဝိဟရန္တိ.

အထ ခေါ ဘဂဝါ ဘိက္ခူ အာမန္တေသိ – ‘‘ကဟံ နု ခေါ၊ ဘိက္ခဝေ၊ စာလော၊ ကဟံ ဥပစာလော၊ ကဟံ ကုက္ကုဋော၊ ကဟံ ကဠိမ္ဘော၊ ကဟံ နိကဋော၊ ကဟံ ကဋိဿဟော၊ ကဟံ နု ခေါ တေ၊ ဘိက္ခဝေ၊ ထေရာ သာဝကာ ဂတာ’’တိ?

‘‘ဣဓ၊ ဘန္တေ၊ တေသံ အာယသ္မန္တာနံ ဧတဒဟောသိ – ‘ဣမေ ခေါ သမ္ဗဟုလာ အဘိညာတာ အဘိညာတာ လိစ္ဆဝီ ဘဒြေဟိ ဘဒြေဟိ ယာနေဟိ ပရပုရာယ ဥစ္စာသဒ္ဒါ မဟာသဒ္ဒါ မဟာဝနံ အဇ္ဈောဂါဟန္တိ ဘဂဝန္တံ ဒဿနာယ ‘သဒ္ဒကဏ္ဋကာ ခေါ ပန ဈာနာဝုတ္တာ ဘဂဝတာ ယံနူန မယံ ယေန ဂေါသိင်္ဂသာလဝနဒါယော တေနုပသင်္ကမေယျာမ တတ္ထ မယံ အပ္ပသဒ္ဒါ အပ္ပါကိဏ္ဏာ ဖာသုံ ဝိဟရေယျာမာ’တိ. အထ ခေါ တေ၊ ဘန္တေ၊ အာယသ္မန္တော ယေန ဂေါသိင်္ဂသာလဝနဒါယော တေနုပသင်္ကမိံသု. တတ္ထ တေ အာယသ္မန္တော အပ္ပသဒ္ဒါ အပ္ပါကိဏ္ဏာ ဖာသုံ ဝိဟရန္တီ’’တိ.

‘‘သာဓု သာဓု၊ ဘိက္ခဝေ၊ ယထာ တေ မဟာသာဝကာ သမ္မာ ဗျာကရမာနာ ဗျာကရေယျုံ၊ ‘သဒ္ဒကဏ္ဋကာ ဟိ၊ ဘိက္ခဝေ၊ ဈာနာ’ ဝုတ္တာ မယာ.

‘‘ဒသယိမေ၊ ဘိက္ခဝေ၊ ကဏ္ဋကာ. ကတမေ ဒသ? ပဝိဝေကာရာမဿ သင်္ဂဏိကာရာမတာ ကဏ္ဋကော၊ အသုဘနိမိတ္တာနုယောဂံ အနုယုတ္တဿ သုဘနိမိတ္တာနုယောဂေါ ကဏ္ဋကော၊ ဣန္ဒြိယေသု ဂုတ္တဒွါရဿ ဝိသူကဒဿနံ ကဏ္ဋကော၊ ဗြဟ္မစရိယဿ မာတုဂါမူပစာရော [မာတုဂါမောပဝိစာရော (သီ.)၊ မာတုဂါမူပဝိစရော (က.)] ကဏ္ဋကော၊ [ကထာ. ၃၃၃] ပဌမဿ ဈာနဿ သဒ္ဒေါ ကဏ္ဋကော၊ ဒုတိယဿ ဈာနဿ ဝိတက္ကဝိစာရာ ကဏ္ဋကာ၊ တတိယဿ ဈာနဿ ပီတိ ကဏ္ဋကော၊ စတုတ္ထဿ ဈာနဿ အဿာသပဿာသော ကဏ္ဋကော၊ သညာဝေဒယိတနိရောဓသမာပတ္တိယာ သညာ စ ဝေဒနာ စ ကဏ္ဋကော ရာဂေါ ကဏ္ဋကော ဒေါသော ကဏ္ဋကော မောဟော ကဏ္ဋကော.

‘‘အကဏ္ဋကာ၊ ဘိက္ခဝေ၊ ဝိဟရထ. နိက္ကဏ္ဋကာ၊ ဘိက္ခဝေ၊ ဝိဟရထ. အကဏ္ဋကနိက္ကဏ္ဋကာ၊ ဘိက္ခဝေ၊ ဝိဟရထ. အကဏ္ဋကာ၊ ဘိက္ခဝေ၊ အရဟန္တော၊ နိက္ကဏ္ဋကာ၊ ဘိက္ခဝေ၊ အရဟန္တော၊ အကဏ္ဋကနိက္ကဏ္ဋကာ၊ ဘိက္ခဝေ၊ အရဟန္တော’’တိ. ဒုတိယံ.