၃. နိဋ္ဌင်္ဂတသုတ္တံ

၆၃. ‘‘ယေ ကေစိ၊ ဘိက္ခဝေ၊ မယိ နိဋ္ဌံ ဂတာ သဗ္ဗေ တေ ဒိဋ္ဌိသမ္ပန္နာ. တေသံ ဒိဋ္ဌိသမ္ပန္နာနံ ပဉ္စန္နံ ဣဓ နိဋ္ဌာ၊ ပဉ္စန္နံ ဣဓ ဝိဟာယ နိဋ္ဌာ. ကတမေသံ ပဉ္စန္နံ ဣဓ နိဋ္ဌာ? သတ္တက္ခတ္တုပရမဿ၊ ကောလံကောလဿ၊ ဧကဗီဇိဿ၊ သကဒါဂါမိဿ၊ ယော စ ဒိဋ္ဌေဝ ဓမ္မေ အရဟာ – ဣမေသံ ပဉ္စန္နံ ဣဓ နိဋ္ဌာ. ကတမေသံ ပဉ္စန္နံ ဣဓ ဝိဟာယ နိဋ္ဌာ? အန္တရာပရိနိဗ္ဗာယိဿ၊ ဥပဟစ္စပရိနိဗ္ဗာယိဿ၊ အသင်္ခါရပရိနိဗ္ဗာယိဿ၊ သသင်္ခါရပရိနိဗ္ဗာယိဿ၊ ဥဒ္ဓံသောတဿ အကနိဋ္ဌဂါမိနော – ဣမေသံ ပဉ္စန္နံ ဣဓ ဝိဟာယ နိဋ္ဌာ. ယေ ကေစိ၊ ဘိက္ခဝေ၊ မယိ နိဋ္ဌံ ဂတာ၊ သဗ္ဗေ တေ ဒိဋ္ဌိသမ္ပန္နာ. တေသံ ဒိဋ္ဌိသမ္ပန္နာနံ ဣမေသံ ပဉ္စန္နံ ဣဓ နိဋ္ဌာ၊ ဣမေသံ ပဉ္စန္နံ ဣဓ ဝိဟာယ နိဋ္ဌာ’’တိ. တတိယံ.