၇. ဒုတိယသညာသုတ္တံ

၅၇. ‘‘ဒသယိမာ၊ ဘိက္ခဝေ၊ သညာ ဘာဝိတာ ဗဟုလီကတာ မဟပ္ဖလာ ဟောန္တိ မဟာနိသံသာ အမတောဂဓာ အမတပရိယောသာနာ. ကတမာ ဒသ? အနိစ္စသညာ၊ အနတ္တသညာ၊ မရဏသညာ၊ အာဟာရေ ပဋိကူလသညာ၊ သဗ္ဗလောကေ အနဘိရတသညာ၊ အဋ္ဌိကသညာ၊ ပုဠဝကသညာ [ပုလဝကသညာ (သီ. ပီ.)၊ ပုဠုဝကသညာ (က.)၊ အ. နိ. ၁.၄၆၃-၄၇၂]၊ ဝိနီလကသညာ၊ ဝိစ္ဆိဒ္ဒကသညာ၊ ဥဒ္ဓုမာတကသညာ – ဣမာ ခေါ၊ ဘိက္ခဝေ၊ ဒသ သညာ ဘာဝိတာ ဗဟုလီကတာ မဟပ္ဖလာ ဟောန္တိ မဟာနိသံသာ အမတောဂဓာ အမတပရိယောသာနာ’’တိ. သတ္တမံ.