နမော တဿ ဘဂဝတော အရဟတော သမ္မာသမ္ဗုဒ္ဓဿ

အင်္ဂုတ္တရနိကာယော

ဧကကနိပါတပါဠိ

၁. ရူပါဒိဝဂ္ဂေါ

၁. ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တတြ ခေါ ဘဂဝါ ဘိက္ခူ အာမန္တေသိ – ‘‘ဘိက္ခဝေါ’’တိ. ‘‘ဘဒန္တေ’’တိ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘နာဟံ၊ ဘိက္ခဝေ၊ အညံ ဧကရူပမ္ပိ သမနုပဿာမိ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ဣတ္ထိရူပံ. ဣတ္ထိရူပံ၊ ဘိက္ခဝေ၊ ပုရိသဿ စိတ္တံ ပရိယာဒါယ တိဋ္ဌတီ’’တိ. ပဌမံ.

၂. ‘‘နာဟံ၊ ဘိက္ခဝေ၊ အညံ ဧကသဒ္ဒမ္ပိ သမနုပဿာမိ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ဣတ္ထိသဒ္ဒေါ. ဣတ္ထိသဒ္ဒေါ၊ ဘိက္ခဝေ၊ ပုရိသဿ စိတ္တံ ပရိယာဒါယ တိဋ္ဌတီ’’တိ. ဒုတိယံ.

၃. ‘‘နာဟံ၊ ဘိက္ခဝေ၊ အညံ ဧကဂန္ဓမ္ပိ သမနုပဿာမိ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ဣတ္ထိဂန္ဓော. ဣတ္ထိဂန္ဓော၊ ဘိက္ခဝေ၊ ပုရိသဿ စိတ္တံ ပရိယာဒါယ တိဋ္ဌတီ’’တိ. တတိယံ.

၄. ‘‘နာဟံ၊ ဘိက္ခဝေ၊ အညံ ဧကရသမ္ပိ သမနုပဿာမိ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ဣတ္ထိရသော. ဣတ္ထိရသော၊ ဘိက္ခဝေ၊ ပုရိသဿ စိတ္တံ ပရိယာဒါယ တိဋ္ဌတီ’’တိ. စတုတ္ထံ.

၅. ‘‘နာဟံ၊ ဘိက္ခဝေ၊ အညံ ဧကဖောဋ္ဌဗ္ဗမ္ပိ သမနုပဿာမိ ယံ ဧဝံ ပုရိသဿ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ဣတ္ထိဖောဋ္ဌဗ္ဗော. ဣတ္ထိဖောဋ္ဌဗ္ဗော၊ ဘိက္ခဝေ၊ ပုရိသဿ စိတ္တံ ပရိယာဒါယ တိဋ္ဌတီ’’တိ. ပဉ္စမံ.

၆. ‘‘နာဟံ၊ ဘိက္ခဝေ၊ အညံ ဧကရူပမ္ပိ သမနုပဿာမိ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ပုရိသရူပံ. ပုရိသရူပံ၊ ဘိက္ခဝေ၊ ဣတ္ထိယာ စိတ္တံ ပရိယာဒါယ တိဋ္ဌတီ’’တိ. ဆဋ္ဌံ.

၇. ‘‘နာဟံ၊ ဘိက္ခဝေ၊ အညံ ဧကသဒ္ဒမ္ပိ သမနုပဿာမိ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ပုရိသသဒ္ဒေါ. ပုရိသသဒ္ဒေါ၊ ဘိက္ခဝေ၊ ဣတ္ထိယာ စိတ္တံ ပရိယာဒါယ တိဋ္ဌတီ’’တိ. သတ္တမံ.

၈. ‘‘နာဟံ၊ ဘိက္ခဝေ၊ အညံ ဧကဂန္ဓမ္ပိ သမနုပဿာမိ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ပုရိသဂန္ဓော. ပုရိသဂန္ဓော၊ ဘိက္ခဝေ၊ ဣတ္ထိယာ စိတ္တံ ပရိယာဒါယ တိဋ္ဌတီ’’တိ. အဋ္ဌမံ.

၉. ‘‘နာဟံ၊ ဘိက္ခဝေ၊ အညံ ဧကရသမ္ပိ သမနုပဿာမိ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ပုရိသရသော. ပုရိသရသော၊ ဘိက္ခဝေ၊ ဣတ္ထိယာ စိတ္တံ ပရိယာဒါယ တိဋ္ဌတီ’’တိ. နဝမံ.

၁၀. ‘‘နာဟံ၊ ဘိက္ခဝေ၊ အညံ ဧကဖောဋ္ဌဗ္ဗမ္ပိ သမနုပဿာမိ ယံ ဧဝံ ဣတ္ထိယာ စိတ္တံ ပရိယာဒါယ တိဋ္ဌတိ ယထယိဒံ၊ ဘိက္ခဝေ၊ ပုရိသဖောဋ္ဌဗ္ဗော. ပုရိသဖောဋ္ဌဗ္ဗော၊ ဘိက္ခဝေ၊ ဣတ္ထိယာ စိတ္တံ ပရိယာဒါယ တိဋ္ဌတီ’’တိ. ဒသမံ.

ရူပါဒိဝဂ္ဂေါ ပဌမော.

၂. နီဝရဏပ္ပဟာနဝဂ္ဂေါ

၁၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နော ဝါ ကာမစ္ဆန္ဒော ဥပ္ပဇ္ဇတိ ဥပ္ပန္နော ဝါ ကာမစ္ဆန္ဒော ဘိယျောဘာဝါယ ဝေပုလ္လာယ သံဝတ္တတိ ယထယိဒံ၊ ဘိက္ခဝေ၊ သုဘနိမိတ္တံ. သုဘနိမိတ္တံ၊ ဘိက္ခဝေ၊ အယောနိသော မနသိ ကရောတော အနုပ္ပန္နော စေဝ ကာမစ္ဆန္ဒော ဥပ္ပဇ္ဇတိ ဥပ္ပန္နော စ ကာမစ္ဆန္ဒော ဘိယျောဘာဝါယ ဝေပုလ္လာယ သံဝတ္တတီ’’တိ. ပဌမံ.

၁၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နော ဝါ ဗျာပါဒေါ ဥပ္ပဇ္ဇတိ ဥပ္ပန္နော ဝါ ဗျာပါဒေါ ဘိယျောဘာဝါယ ဝေပုလ္လာယ သံဝတ္တတိ ယထယိဒံ၊ ဘိက္ခဝေ၊ ပဋိဃနိမိတ္တံ. ပဋိဃနိမိတ္တံ၊ ဘိက္ခဝေ၊ အယောနိသော မနသိ ကရောတော အနုပ္ပန္နော စေဝ ဗျာပါဒေါ ဥပ္ပဇ္ဇတိ ဥပ္ပန္နော စ ဗျာပါဒေါ ဘိယျောဘာဝါယ ဝေပုလ္လာယ သံဝတ္တတီ’’တိ. ဒုတိယံ.

၁၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နံ ဝါ ထိနမိဒ္ဓံ [ထီနမိဒ္ဓံ (သီ. သျာ. ကံ. ပီ.)] ဥပ္ပဇ္ဇတိ ဥပ္ပန္နံ ဝါ ထိနမိဒ္ဓံ ဘိယျောဘာဝါယ ဝေပုလ္လာယ သံဝတ္တတိ ယထယိဒံ၊ ဘိက္ခဝေ၊ အရတိ တန္ဒီ [တန္ဒိ (က.)] ဝိဇမ္ဘိတာ [ဝိဇမ္ဘိကာ (သီ. သျာ. ကံ. ပီ.)] ဘတ္တသမ္မဒေါ စေတသော စ လီနတ္တံ. လီနစိတ္တဿ၊ ဘိက္ခဝေ၊ အနုပ္ပန္နဉ္စေဝ ထိနမိဒ္ဓံ ဥပ္ပဇ္ဇတိ ဥပ္ပန္နဉ္စ ထိနမိဒ္ဓံ ဘိယျောဘာဝါယ ဝေပုလ္လာယ သံဝတ္တတီ’’တိ. တတိယံ.

၁၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နံ ဝါ ဥဒ္ဓစ္စကုက္ကုစ္စံ ဥပ္ပဇ္ဇတိ ဥပ္ပန္နံ ဝါ ဥဒ္ဓစ္စကုက္ကုစ္စံ ဘိယျောဘာဝါယ ဝေပုလ္လာယ သံဝတ္တတိ ယထယိဒံ၊ ဘိက္ခဝေ၊ စေတသော အဝူပသမော. အဝူပသန္တစိတ္တဿ၊ ဘိက္ခဝေ၊ အနုပ္ပန္နဉ္စေဝ ဥဒ္ဓစ္စကုက္ကုစ္စံ ဥပ္ပဇ္ဇတိ ဥပ္ပန္နဉ္စ ဥဒ္ဓစ္စကုက္ကုစ္စံ ဘိယျောဘာဝါယ ဝေပုလ္လာယ သံဝတ္တတီ’’တိ. စတုတ္ထံ.

၁၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ဝိစိကိစ္ဆာ ဥပ္ပဇ္ဇတိ ဥပ္ပန္နာ ဝါ ဝိစိကိစ္ဆာ ဘိယျောဘာဝါယ ဝေပုလ္လာယ သံဝတ္တတိ ယထယိဒံ၊ ဘိက္ခဝေ၊ အယောနိသောမနသိကာရော. အယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ ဝိစိကိစ္ဆာ ဥပ္ပဇ္ဇတိ ဥပ္ပန္နာ စ ဝိစိကိစ္ဆာ ဘိယျောဘာဝါယ ဝေပုလ္လာယ သံဝတ္တတီ’’တိ. ပဉ္စမံ.

၁၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နော ဝါ ကာမစ္ဆန္ဒော နုပ္ပဇ္ဇတိ ဥပ္ပန္နော ဝါ ကာမစ္ဆန္ဒော ပဟီယတိ ယထယိဒံ၊ ဘိက္ခဝေ၊ အသုဘနိမိတ္တံ. အသုဘနိမိတ္တံ၊ ဘိက္ခဝေ၊ ယောနိသော မနသိ ကရောတော အနုပ္ပန္နော စေဝ ကာမစ္ဆန္ဒော နုပ္ပဇ္ဇတိ ဥပ္ပန္နော စ ကာမစ္ဆန္ဒော ပဟီယတီ’’တိ. ဆဋ္ဌံ.

၁၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နော ဝါ ဗျာပါဒေါ နုပ္ပဇ္ဇတိ ဥပ္ပန္နော ဝါ ဗျာပါဒေါ ပဟီယတိ ယထယိဒံ၊ ဘိက္ခဝေ၊ မေတ္တာ စေတောဝိမုတ္တိ. မေတ္တံ၊ ဘိက္ခဝေ၊ စေတောဝိမုတ္တိံ ယောနိသော မနသိ ကရောတော အနုပ္ပန္နော စေဝ ဗျာပါဒေါ နုပ္ပဇ္ဇတိ ဥပ္ပန္နော စ ဗျာပါဒေါ ပဟီယတီ’’တိ. သတ္တမံ.

၁၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နံ ဝါ ထိနမိဒ္ဓံ နုပ္ပဇ္ဇတိ ဥပ္ပန္နံ ဝါ ထိနမိဒ္ဓံ ပဟီယတိ ယထယိဒံ၊ ဘိက္ခဝေ၊ အာရမ္ဘဓာတု နိက္ကမဓာတု ပရက္ကမဓာတု. အာရဒ္ဓဝီရိယဿ၊ ဘိက္ခဝေ၊ အနုပ္ပန္နဉ္စေဝ ထိနမိဒ္ဓံ နုပ္ပဇ္ဇတိ ဥပ္ပန္နဉ္စ ထိနမိဒ္ဓံ ပဟီယတီ’’တိ. အဋ္ဌမံ.

၁၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နံ ဝါ ဥဒ္ဓစ္စကုက္ကုစ္စံ နုပ္ပဇ္ဇတိ ဥပ္ပန္နံ ဝါ ဥဒ္ဓစ္စကုက္ကုစ္စံ ပဟီယတိ ယထယိဒံ၊ ဘိက္ခဝေ၊ စေတသော ဝူပသမော. ဝူပသန္တစိတ္တဿ၊ ဘိက္ခဝေ၊ အနုပ္ပန္နဉ္စေဝ ဥဒ္ဓစ္စကုက္ကုစ္စံ နုပ္ပဇ္ဇတိ ဥပ္ပန္နဉ္စ ဥဒ္ဓစ္စကုက္ကုစ္စံ ပဟီယတီ’’တိ. နဝမံ.

၂၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ဝိစိကိစ္ဆာ နုပ္ပဇ္ဇတိ ဥပ္ပန္နာ ဝါ ဝိစိကိစ္ဆာ ပဟီယတိ ယထယိဒံ၊ ဘိက္ခဝေ၊ ယောနိသောမနသိကာရော. ယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ ဝိစိကိစ္ဆာ နုပ္ပဇ္ဇတိ ဥပ္ပန္နာ စ ဝိစိကိစ္ဆာ ပဟီယတီ’’တိ. ဒသမံ.

နီဝရဏပ္ပဟာနဝဂ္ဂေါ ဒုတိယော.

၃. အကမ္မနိယဝဂ္ဂေါ

၂၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဘာဝိတံ အကမ္မနိယံ ဟောတိ ယထယိဒံ၊ ဘိက္ခဝေ၊ စိတ္တံ [ယထယိဒံ စိတ္တံ (သီ. ပီ.) ဧဝမုပရိပိ]. စိတ္တံ၊ ဘိက္ခဝေ၊ အဘာဝိတံ အကမ္မနိယံ ဟောတီ’’တိ. ပဌမံ.

၂၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ ကမ္မနိယံ ဟောတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဘာဝိတံ ကမ္မနိယံ ဟောတီ’’တိ. ဒုတိယံ.

၂၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဘာဝိတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဘာဝိတံ မဟတော အနတ္ထာယ သံဝတ္တတီ’’တိ. တတိယံ.

၂၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဘာဝိတံ မဟတော အတ္ထာယ သံဝတ္တတီ’’တိ. စတုတ္ထံ.

၂၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဘာဝိတံ အပါတုဘူတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဘာဝိတံ အပါတုဘူတံ မဟတော အနတ္ထာယ သံဝတ္တတီ’’တိ. ပဉ္စမံ.

၂၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ ပါတုဘူတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဘာဝိတံ ပါတုဘူတံ မဟတော အတ္ထာယ သံဝတ္တတီ’’တိ. ဆဋ္ဌံ.

၂၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဘာဝိတံ အဗဟုလီကတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဘာဝိတံ အဗဟုလီကတံ မဟတော အနတ္ထာယ သံဝတ္တတီ’’တိ. သတ္တမံ.

၂၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ ဗဟုလီကတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဘာဝိတံ ဗဟုလီကတံ မဟတော အတ္ထာယ သံဝတ္တတီ’’တိ. အဋ္ဌမံ.

၂၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဘာဝိတံ အဗဟုလီကတံ ဒုက္ခာဓိဝဟံ ဟောတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဘာဝိတံ အဗဟုလီကတံ ဒုက္ခာဓိဝဟံ ဟောတီ’’တိ. နဝမံ.

၃၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ ဗဟုလီကတံ သုခါဓိဝဟံ ဟောတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဘာဝိတံ ဗဟုလီကတံ သုခါဓိဝဟံ ဟောတီ’’တိ. ဒသမံ.

အကမ္မနိယဝဂ္ဂေါ တတိယော.

၄. အဒန္တဝဂ္ဂေါ

၃၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဒန္တံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဒန္တံ မဟတော အနတ္ထာယ သံဝတ္တတီ’’တိ. ပဌမံ.

၃၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဒန္တံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဒန္တံ မဟတော အတ္ထာယ သံဝတ္တတီ’’တိ. ဒုတိယံ.

၃၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဂုတ္တံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဂုတ္တံ မဟတော အနတ္ထာယ သံဝတ္တတီ’’တိ. တတိယံ.

၃၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဂုတ္တံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဂုတ္တံ မဟတော အတ္ထာယ သံဝတ္တတီ’’တိ. စတုတ္ထံ.

၃၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အရက္ခိတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အရက္ခိတံ မဟတော အနတ္ထာယ သံဝတ္တတီ’’တိ. ပဉ္စမံ.

၃၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ရက္ခိတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ရက္ခိတံ မဟတော အတ္ထာယ သံဝတ္တတီ’’တိ. ဆဋ္ဌံ.

၃၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အသံဝုတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အသံဝုတံ မဟတော အနတ္ထာယ သံဝတ္တတီ’’တိ. သတ္တမံ.

၃၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ သံဝုတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ သံဝုတံ မဟတော အတ္ထာယ သံဝတ္တတီ’’တိ. အဋ္ဌမံ.

၃၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ အဒန္တံ အဂုတ္တံ အရက္ခိတံ အသံဝုတံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ အဒန္တံ အဂုတ္တံ အရက္ခိတံ အသံဝုတံ မဟတော အနတ္ထာယ သံဝတ္တတီ’’တိ. နဝမံ.

၄၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ ဒန္တံ ဂုတ္တံ ရက္ခိတံ သံဝုတံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ စိတ္တံ. စိတ္တံ၊ ဘိက္ခဝေ၊ ဒန္တံ ဂုတ္တံ ရက္ခိတံ သံဝုတံ မဟတော အတ္ထာယ သံဝတ္တတီ’’တိ. ဒသမံ.

အဒန္တဝဂ္ဂေါ စတုတ္ထော.

၅. ပဏိဟိတအစ္ဆဝဂ္ဂေါ

၄၁. ‘‘သေယျထာပိ၊ ဘိက္ခဝေ၊ သာလိသူကံ ဝါ ယဝသူကံ ဝါ မိစ္ဆာပဏိဟိတံ ဟတ္ထေန ဝါ ပါဒေန ဝါ အက္ကန္တံ ဟတ္ထံ ဝါ ပါဒံ ဝါ ဘေစ္ဆတိ [ဘိဇ္ဇိဿတိ (သျာ. ကံ. က.)၊ ဘေဇ္ဇတိ (သီ.) မောဂ္ဂလ္လာနဗျာကရဏံ ပဿိတဗ္ဗံ] လောဟိတံ ဝါ ဥပ္ပါဒေဿတီတိ နေတံ ဌာနံ ဝိဇ္ဇတိ. တံ ကိဿ ဟေတု? မိစ္ဆာပဏိဟိတတ္တာ၊ ဘိက္ခဝေ၊ သူကဿ. ဧဝမေဝံ ခေါ၊ ဘိက္ခဝေ၊ သော ဝတ ဘိက္ခု မိစ္ဆာပဏိဟိတေန စိတ္တေန အဝိဇ္ဇံ ဘေစ္ဆတိ၊ ဝိဇ္ဇံ ဥပ္ပါဒေဿတိ၊ နိဗ္ဗာနံ သစ္ဆိကရိဿတီတိ နေတံ ဌာနံ ဝိဇ္ဇတိ. တံ ကိဿ ဟေတု? မိစ္ဆာပဏိဟိတတ္တာ၊ ဘိက္ခဝေ၊ စိတ္တဿာ’’တိ. ပဌမံ.

၄၂. ‘‘သေယျထာပိ၊ ဘိက္ခဝေ၊ သာလိသူကံ ဝါ ယဝသူကံ ဝါ သမ္မာပဏိဟိတံ ဟတ္ထေန ဝါ ပါဒေန ဝါ အက္ကန္တံ ဟတ္ထံ ဝါ ပါဒံ ဝါ ဘေစ္ဆတိ လောဟိတံ ဝါ ဥပ္ပါဒေဿတီတိ ဌာနမေတံ ဝိဇ္ဇတိ. တံ ကိဿ ဟေတု? သမ္မာပဏိဟိတတ္တာ၊ ဘိက္ခဝေ၊ သူကဿ. ဧဝမေဝံ ခေါ၊ ဘိက္ခဝေ၊ သော ဝတ ဘိက္ခု သမ္မာပဏိဟိတေန စိတ္တေန အဝိဇ္ဇံ ဘေစ္ဆတိ၊ ဝိဇ္ဇံ ဥပ္ပါဒေဿတိ၊ နိဗ္ဗာနံ သစ္ဆိကရိဿတီတိ ဌာနမေတံ ဝိဇ္ဇတိ. တံ ကိဿ ဟေတု? သမ္မာပဏိဟိတတ္တာ၊ ဘိက္ခဝေ၊ စိတ္တဿာ’’တိ. ဒုတိယံ.

၄၃. ‘‘ဣဓာဟံ [ဣဒါဟံ (သီ.)]၊ ဘိက္ခဝေ၊ ဧကစ္စံ ပုဂ္ဂလံ ပဒုဋ္ဌစိတ္တံ ဧဝံ စေတသာ စေတော ပရိစ္စ ပဇာနာမိ – ‘ဣမမှိ စေ အယံ သမယေ ပုဂ္ဂလော ကာလံ ကရေယျ၊ ယထာဘတံ နိက္ခိတ္တော ဧဝံ နိရယေ’. တံ ကိဿ ဟေတု? စိတ္တံ ဟိဿ၊ ဘိက္ခဝေ၊ ပဒုဋ္ဌံ. ‘‘စေတောပဒေါသဟေတု ပန၊ ဘိက္ခဝေ၊ ဧဝမိဓေကစ္စေ သတ္တာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တီ’’တိ. တတိယံ.

၄၄. ‘‘ဣဓာဟံ၊ ဘိက္ခဝေ၊ ဧကစ္စံ ပုဂ္ဂလံ ပသန္နစိတ္တံ ဧဝံ စေတသာ စေတော ပရိစ္စ ပဇာနာမိ – ‘ဣမမှိ စေ အယံ သမယေ ပုဂ္ဂလော ကာလံ ကရေယျ၊ ယထာဘတံ နိက္ခိတ္တော ဧဝံ သဂ္ဂေ’. တံ ကိဿ ဟေတု? စိတ္တံ ဟိဿ၊ ဘိက္ခဝေ၊ ပသန္နံ. ‘‘စေတောပသာဒဟေတု ပန၊ ဘိက္ခဝေ၊ ဧဝမိဓေကစ္စေ သတ္တာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တီ’’တိ. စတုတ္ထံ.

၄၅. ‘‘သေယျထာပိ၊ ဘိက္ခဝေ၊ ဥဒကရဟဒေါ အာဝိလော လုဠိတော ကလလီဘူတော တတ္ထ စက္ခုမာ ပုရိသော တီရေ ဌိတော န ပဿေယျ သိပ္ပိသမ္ဗုကမ္ပိ [သိပ္ပိကသမ္ဗုကမ္ပိ (က.)] သက္ခရကဌလမ္ပိ မစ္ဆဂုမ္ဗမ္ပိ စရန္တမ္ပိ တိဋ္ဌန္တမ္ပိ. တံ ကိဿ ဟေတု? အာဝိလတ္တာ၊ ဘိက္ခဝေ၊ ဥဒကဿ. ဧဝမေဝံ ခေါ၊ ဘိက္ခဝေ၊ သော ဝတ ဘိက္ခု အာဝိလေန စိတ္တေန အတ္တတ္ထံ ဝါ ဉဿတိ ပရတ္ထံ ဝါ ဉဿတိ ဥဘယတ္ထံ ဝါ ဉဿတိ ဥတ္တရိံ ဝါ မနုဿဓမ္မာ အလမရိယဉာဏဒဿနဝိသေသံ သစ္ဆိကရိဿတီတိ နေတံ ဌာနံ ဝိဇ္ဇတိ. တံ ကိဿ ဟေတု? အာဝိလတ္တာ၊ ဘိက္ခဝေ၊ စိတ္တဿာ’’တိ. ပဉ္စမံ.

၄၆. ‘‘သေယျထာပိ၊ ဘိက္ခဝေ၊ ဥဒကရဟဒေါ အစ္ဆော ဝိပ္ပသန္နော အနာဝိလော တတ္ထ စက္ခုမာ ပုရိသော တီရေ ဌိတော ပဿေယျ သိပ္ပိသမ္ဗုကမ္ပိ သက္ခရကဌလမ္ပိ မစ္ဆဂုမ္ဗမ္ပိ စရန္တမ္ပိ တိဋ္ဌန္တမ္ပိ. တံ ကိဿ ဟေတု? အနာဝိလတ္တာ၊ ဘိက္ခဝေ၊ ဥဒကဿ. ဧဝမေဝံ ခေါ၊ ဘိက္ခဝေ၊ သော ဝတ ဘိက္ခု အနာဝိလေန စိတ္တေန အတ္တတ္ထံ ဝါ ဉဿတိ ပရတ္ထံ ဝါ ဉဿတိ ဥဘယတ္ထံ ဝါ ဉဿတိ ဥတ္တရိံ ဝါ မနုဿဓမ္မာ အလမရိယဉာဏဒဿနဝိသေသံ သစ္ဆိကရိဿတီတိ ဌာနမေတံ ဝိဇ္ဇတိ. တံ ကိဿ ဟေတု? အနာဝိလတ္တာ၊ ဘိက္ခဝေ၊ စိတ္တဿာ’’တိ. ဆဋ္ဌံ.

၄၇. ‘‘သေယျထာပိ၊ ဘိက္ခဝေ၊ ယာနိ ကာနိစိ ရုက္ခဇာတာနံ ဖန္ဒနော တေသံ အဂ္ဂမက္ခာယတိ ယဒိဒံ မုဒုတာယ စေဝ ကမ္မညတာယ စ. ဧဝမေဝံ ခေါ အဟံ၊ ဘိက္ခဝေ၊ နာညံ ဧကဓမ္မမ္ပိ သမနုပဿာမိ ယံ ဧဝံ ဘာဝိတံ ဗဟုလီကတံ မုဒု စ ဟောတိ ကမ္မညဉ္စ ယထယိဒံ စိတ္တံ. စိတ္တံ၊ ဘိက္ခဝေ၊ ဘာဝိတံ ဗဟုလီကတံ မုဒု စ ဟောတိ ကမ္မညဉ္စ ဟောတီ’’တိ. သတ္တမံ.

၄၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယံ ဧဝံ လဟုပရိဝတ္တံ ယထယိဒံ စိတ္တံ. ယာဝဉ္စိဒံ၊ ဘိက္ခဝေ၊ ဥပမာပိ န သုကရာ ယာဝ လဟုပရိဝတ္တံ စိတ္တ’’န္တိ. အဋ္ဌမံ.

၄၉. ‘‘ပဘဿရမိဒံ၊ ဘိက္ခဝေ၊ စိတ္တံ. တဉ္စ ခေါ အာဂန္တုကေဟိ ဥပက္ကိလေသေဟိ ဥပက္ကိလိဋ္ဌ’’န္တိ. နဝမံ.

၅၀. ‘‘ပဘဿရမိဒံ၊ ဘိက္ခဝေ၊ စိတ္တံ. တဉ္စ ခေါ အာဂန္တုကေဟိ ဥပက္ကိလေသေဟိ ဝိပ္ပမုတ္တ’’န္တိ. ဒသမံ.

ပဏိဟိတအစ္ဆဝဂ္ဂေါ ပဉ္စမော.

၆. အစ္ဆရာသင်္ဃာတဝဂ္ဂေါ

၅၁. ‘‘ပဘဿရမိဒံ၊ ဘိက္ခဝေ၊ စိတ္တံ. တဉ္စ ခေါ အာဂန္တုကေဟိ ဥပက္ကိလေသေဟိ ဥပက္ကိလိဋ္ဌံ. တံ အဿုတဝါ ပုထုဇ္ဇနော ယထာဘူတံ နပ္ပဇာနာတိ. တသ္မာ ‘အဿုတဝတော ပုထုဇ္ဇနဿ စိတ္တဘာဝနာ နတ္ထီ’တိ ဝဒါမီ’’တိ. ပဌမံ.

၅၂. ‘‘ပဘဿရမိဒံ၊ ဘိက္ခဝေ၊ စိတ္တံ. တဉ္စ ခေါ အာဂန္တုကေဟိ ဥပက္ကိလေသေဟိ ဝိပ္ပမုတ္တံ. တံ သုတဝါ အရိယသာဝကော ယထာဘူတံ ပဇာနာတိ. တသ္မာ ‘သုတဝတော အရိယသာဝကဿ စိတ္တဘာဝနာ အတ္ထီ’တိ ဝဒါမီ’’တိ. ဒုတိယံ.

၅၃. ‘‘အစ္ဆရာသင်္ဃာတမတ္တမ္ပိ စေ၊ ဘိက္ခဝေ၊ ဘိက္ခု မေတ္တာစိတ္တံ [မေတ္တံ စိတ္တံ (သီ.)၊ မေတ္တစိတ္တံ (သျာ. ကံ. ပီ. က.)] အာသေဝတိ၊ အယံ ဝုစ္စတိ၊ ဘိက္ခဝေ – ‘ဘိက္ခု အရိတ္တဇ္ဈာနော ဝိဟရတိ သတ္ထုသာသနကရော ဩဝါဒပတိကရော၊ အမောဃံ ရဋ္ဌပိဏ္ဍံ ဘုဉ္ဇတိ’. ကော ပန ဝါဒေါ ယေ နံ ဗဟုလီကရောန္တီ’’တိ! တတိယံ.

၅၄. ‘‘အစ္ဆရာသင်္ဃာတမတ္တမ္ပိ စေ၊ ဘိက္ခဝေ၊ ဘိက္ခု မေတ္တာစိတ္တံ ဘာဝေတိ၊ အယံ ဝုစ္စတိ၊ ဘိက္ခဝေ – ‘ဘိက္ခု အရိတ္တဇ္ဈာနော ဝိဟရတိ သတ္ထုသာသနကရော ဩဝါဒပတိကရော၊ အမောဃံ ရဋ္ဌပိဏ္ဍံ ဘုဉ္ဇတိ’. ကော ပန ဝါဒေါ ယေ နံ ဗဟုလီကရောန္တီ’’တိ! စတုတ္ထံ.

၅၅. ‘‘အစ္ဆရာသင်္ဃာတမတ္တမ္ပိ စေ၊ ဘိက္ခဝေ၊ ဘိက္ခု မေတ္တာစိတ္တံ မနသိ ကရောတိ၊ အယံ ဝုစ္စတိ၊ ဘိက္ခဝေ – ‘ဘိက္ခု အရိတ္တဇ္ဈာနော ဝိဟရတိ သတ္ထုသာသနကရော ဩဝါဒပတိကရော အမောဃံ ရဋ္ဌပိဏ္ဍံ ဘုဉ္ဇတိ’. ကော ပန ဝါဒေါ ယေ နံ ဗဟုလီကရောန္တီ’’တိ! ပဉ္စမံ.

၅၆. ‘‘ယေ ကေစိ၊ ဘိက္ခဝေ၊ ဓမ္မာ အကုသလာ အကုသလဘာဂိယာ အကုသလပက္ခိကာ၊ သဗ္ဗေ တေ မနောပုဗ္ဗင်္ဂမာ. မနော တေသံ ဓမ္မာနံ ပဌမံ ဥပ္ပဇ္ဇတိ၊ အနွဒေဝ အကုသလာ ဓမ္မာ’’တိ. ဆဋ္ဌံ.

၅၇. ‘‘ယေ ကေစိ၊ ဘိက္ခဝေ၊ ဓမ္မာ ကုသလာ ကုသလဘာဂိယာ ကုသလပက္ခိကာ၊ သဗ္ဗေ တေ မနောပုဗ္ဗင်္ဂမာ. မနော တေသံ ဓမ္မာနံ ပဌမံ ဥပ္ပဇ္ဇတိ၊ အနွဒေဝ ကုသလာ ဓမ္မာ’’တိ. သတ္တမံ.

၅၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ပမာဒေါ. ပမတ္တဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. အဋ္ဌမံ.

၅၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အပ္ပမာဒေါ. အပ္ပမတ္တဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. နဝမံ.

၆၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ကောသဇ္ဇံ. ကုသီတဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. ဒသမံ.

အစ္ဆရာသင်္ဃာတဝဂ္ဂေါ ဆဋ္ဌော.

၇. ဝီရိယာရမ္ဘာဒိဝဂ္ဂေါ

၆၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ဝီရိယာရမ္ဘော [ဝိရိယာရမ္ဘော (သီ. သျာ. ကံ. ပီ.)]. အာရဒ္ဓဝီရိယဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. ပဌမံ.

၆၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ မဟိစ္ဆတာ. မဟိစ္ဆဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. ဒုတိယံ.

၆၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အပ္ပိစ္ဆတာ. အပ္ပိစ္ဆဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. တတိယံ.

၆၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အသန္တုဋ္ဌိတာ. အသန္တုဋ္ဌဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. စတုတ္ထံ.

၆၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ သန္တုဋ္ဌိတာ. သန္တုဋ္ဌဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. ပဉ္စမံ.

၆၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အယောနိသောမနသိကာရော. အယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. ဆဋ္ဌံ.

၆၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ယောနိသောမနသိကာရော. ယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. သတ္တမံ.

၆၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အသမ္ပဇညံ. အသမ္ပဇာနဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. အဋ္ဌမံ.

၆၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ သမ္ပဇညံ. သမ္ပဇာနဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. နဝမံ.

၇၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ပါပမိတ္တတာ. ပါပမိတ္တဿ၊ ဘိက္ခဝေ၊ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. ဒသမံ.

ဝီရိယာရမ္ဘာဒိဝဂ္ဂေါ သတ္တမော.

၈. ကလျာဏမိတ္တာဒိဝဂ္ဂေါ

၇၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ ကလျာဏမိတ္တတာ. ကလျာဏမိတ္တဿ၊ ဘိက္ခဝေ၊ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. ပဌမံ.

၇၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ ကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အနုယောဂေါ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ. အနုယောဂါ၊ ဘိက္ခဝေ၊ အကုသလာနံ ဓမ္မာနံ၊ အနနုယောဂါ ကုသလာနံ ဓမ္မာနံ အနုပ္ပန္နာ စေဝ အကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ ကုသလာ ဓမ္မာ ပရိဟာယန္တီ’’တိ. ဒုတိယံ.

၇၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ ဝါ အကုသလာ ဓမ္မာ ပရိဟာယန္တိ ယထယိဒံ၊ ဘိက္ခဝေ၊ အနုယောဂေါ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ. အနုယောဂါ၊ ဘိက္ခဝေ၊ ကုသလာနံ ဓမ္မာနံ၊ အနနုယောဂါ အကုသလာနံ ဓမ္မာနံ အနုပ္ပန္နာ စေဝ ကုသလာ ဓမ္မာ ဥပ္ပဇ္ဇန္တိ ဥပ္ပန္နာ စ အကုသလာ ဓမ္မာ ပရိဟာယန္တီ’’တိ. တတိယံ.

၇၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ဗောဇ္ဈင်္ဂါ နုပ္ပဇ္ဇန္တိ ဥပ္ပန္နာ ဝါ ဗောဇ္ဈင်္ဂါ န ဘာဝနာပါရိပူရိံ ဂစ္ဆန္တိ ယထယိဒံ၊ ဘိက္ခဝေ၊ အယောနိသောမနသိကာရော. အယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ ဗောဇ္ဈင်္ဂါ နုပ္ပဇ္ဇန္တိ ဥပ္ပန္နာ စ ဗောဇ္ဈင်္ဂါ န ဘာဝနာပါရိပူရိံ ဂစ္ဆန္တီ’’တိ. စတုတ္ထံ.

၇၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယေန အနုပ္ပန္နာ ဝါ ဗောဇ္ဈင်္ဂါ ဥပ္ပဇ္ဇန္တိ ဥပ္ပန္နာ ဝါ ဗောဇ္ဈင်္ဂါ ဘာဝနာပါရိပူရိံ ဂစ္ဆန္တိ ယထယိဒံ၊ ဘိက္ခဝေ၊ ယောနိသောမနသိကာရော. ယောနိသော၊ ဘိက္ခဝေ၊ မနသိ ကရောတော အနုပ္ပန္နာ စေဝ ဗောဇ္ဈင်္ဂါ ဥပ္ပဇ္ဇန္တိ ဥပ္ပန္နာ စ ဗောဇ္ဈင်္ဂါ ဘာဝနာပါရိပူရိံ ဂစ္ဆန္တီ’’တိ. ပဉ္စမံ.

၇၆. ‘‘အပ္ပမတ္တိကာ ဧသာ၊ ဘိက္ခဝေ၊ ပရိဟာနိ ယဒိဒံ ဉာတိပရိဟာနိ. ဧတံ ပတိကိဋ္ဌံ၊ ဘိက္ခဝေ၊ ပရိဟာနီနံ ယဒိဒံ ပညာပရိဟာနီ’’တိ. ဆဋ္ဌံ.

၇၇. ‘‘အပ္ပမတ္တိကာ ဧသာ၊ ဘိက္ခဝေ၊ ဝုဒ္ဓိ ယဒိဒံ ဉာတိဝုဒ္ဓိ. ဧတဒဂ္ဂံ၊ ဘိက္ခဝေ၊ ဝုဒ္ဓီနံ ယဒိဒံ ပညာဝုဒ္ဓိ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ပညာဝုဒ္ဓိယာ ဝဒ္ဓိဿာမာ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. သတ္တမံ.

၇၈. ‘‘အပ္ပမတ္တိကာ ဧသာ၊ ဘိက္ခဝေ၊ ပရိဟာနိ ယဒိဒံ ဘောဂပရိဟာနိ. ဧတံ ပတိကိဋ္ဌံ၊ ဘိက္ခဝေ၊ ပရိဟာနီနံ ယဒိဒံ ပညာပရိဟာနီ’’တိ. အဋ္ဌမံ.

၇၉. ‘‘အပ္ပမတ္တိကာ ဧသာ၊ ဘိက္ခဝေ၊ ဝုဒ္ဓိ ယဒိဒံ ဘောဂဝုဒ္ဓိ. ဧတဒဂ္ဂံ၊ ဘိက္ခဝေ၊ ဝုဒ္ဓီနံ ယဒိဒံ ပညာဝုဒ္ဓိ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ပညာဝုဒ္ဓိယာ ဝဒ္ဓိဿာမာ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. နဝမံ.

၈၀. ‘‘အပ္ပမတ္တိကာ ဧသာ၊ ဘိက္ခဝေ၊ ပရိဟာနိ ယဒိဒံ ယသောပရိဟာနိ. ဧတံ ပတိကိဋ္ဌံ၊ ဘိက္ခဝေ၊ ပရိဟာနီနံ ယဒိဒံ ပညာပရိဟာနီ’’တိ. ဒသမံ.

ကလျာဏမိတ္တာဒိဝဂ္ဂေါ အဋ္ဌမော.

၉. ပမာဒါဒိဝဂ္ဂေါ

၈၁. ‘‘အပ္ပမတ္တိကာ ဧသာ၊ ဘိက္ခဝေ၊ ဝုဒ္ဓိ ယဒိဒံ ယသောဝုဒ္ဓိ. ဧတဒဂ္ဂံ၊ ဘိက္ခဝေ၊ ဝုဒ္ဓီနံ ယဒိဒံ ပညာဝုဒ္ဓိ. တသ္မာတိဟ၊ ဘိက္ခဝေ၊ ဧဝံ သိက္ခိတဗ္ဗံ – ‘ပညာဝုဒ္ဓိယာ ဝဒ္ဓိဿာမာ’တိ. ဧဝဉှိ ဝေါ၊ ဘိက္ခဝေ၊ သိက္ခိတဗ္ဗ’’န္တိ. ပဌမံ.

၈၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ပမာဒေါ. ပမာဒေါ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. ဒုတိယံ.

၈၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ အပ္ပမာဒေါ. အပ္ပမာဒေါ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. တတိယံ.

၈၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ကောသဇ္ဇံ. ကောသဇ္ဇံ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. စတုတ္ထံ.

၈၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ ဝီရိယာရမ္ဘော. ဝီရိယာရမ္ဘော၊ ဘိက္ခဝေ၊ မဟတော အတ္ထာယ သံဝတ္တတီ’’တိ. ပဉ္စမံ.

၈၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ မဟိစ္ဆတာ. မဟိစ္ဆတာ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. ဆဋ္ဌံ.

၈၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ အပ္ပိစ္ဆတာ. အပ္ပိစ္ဆတာ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. သတ္တမံ.

၈၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ အသန္တုဋ္ဌိတာ. အသန္တုဋ္ဌိတာ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. အဋ္ဌမံ.

၈၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ သန္တုဋ္ဌိတာ. သန္တုဋ္ဌိတာ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. နဝမံ.

၉၀. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ အယောနိသော မနသိကာရော. အယောနိသောမနသိကာရော၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. ဒသမံ.

၉၁. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ ယောနိသော မနသိကာရော. ယောနိသောမနသိကာရော၊ ဘိက္ခဝေ၊ မဟတော အတ္ထာယ သံဝတ္တတီ’’တိ. ဧကာဒသမံ.

၉၂. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ အသမ္ပဇညံ. အသမ္ပဇညံ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. ဒွါဒသမံ.

၉၃. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ သမ္ပဇညံ. သမ္ပဇညံ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. တေရသမံ.

၉၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ပါပမိတ္တတာ. ပါပမိတ္တတာ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. စုဒ္ဒသမံ.

၉၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ ကလျာဏမိတ္တတာ. ကလျာဏမိတ္တတာ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. ပန္နရသမံ.

၉၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ အနုယောဂေါ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ. အနုယောဂေါ၊ ဘိက္ခဝေ၊ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ မဟတော အနတ္ထာယ သံဝတ္တတီ’’တိ. သောဠသမံ.

၉၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ အနုယောဂေါ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ. အနုယောဂေါ၊ ဘိက္ခဝေ၊ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ မဟတော အတ္ထာယ သံဝတ္တတီ’’တိ. သတ္တရသမံ.

ပမာဒါဒိဝဂ္ဂေါ နဝမော.

၁၀. ဒုတိယပမာဒါဒိဝဂ္ဂေါ

၉၈. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ပမာဒေါ. ပမာဒေါ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. ပဌမံ.

၉၉. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ အပ္ပမာဒေါ. အပ္ပမာဒေါ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. ဒုတိယံ.

၁၀၀. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ကောသဇ္ဇံ. ကောသဇ္ဇံ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. တတိယံ.

၁၀၁. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ ဝီရိယာရမ္ဘော. ဝီရိယာရမ္ဘော၊ ဘိက္ခဝေ၊ မဟတော အတ္ထာယ သံဝတ္တတီ’’တိ. စတုတ္ထံ.

၁၀၂-၁၀၉. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ မဟိစ္ဆတာ။ပေ။ အပ္ပိစ္ဆတာ။ အသန္တုဋ္ဌိတာ။ သန္တုဋ္ဌိတာ။ အယောနိသောမနသိကာရော။ ယောနိသောမနသိကာရော။ အသမ္ပဇညံ။ သမ္ပဇညံ။ ဒွါဒသမံ.

၁၁၀. ‘‘ဗာဟိရံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ ပါပမိတ္တတာ. ပါပမိတ္တတာ၊ ဘိက္ခဝေ၊ မဟတော အနတ္ထာယ သံဝတ္တတီ’’တိ. တေရသမံ.

၁၁၁. ‘‘ဗာဟိရံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ ကလျာဏမိတ္တတာ. ကလျာဏမိတ္တတာ၊ ဘိက္ခဝေ၊ မဟတော အတ္ထာယ သံဝတ္တတီ’’တိ. စုဒ္ဒသမံ.

၁၁၂. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အနတ္ထာယ သံဝတ္တတိ ယထယိဒံ၊ ဘိက္ခဝေ၊ အနုယောဂေါ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ. အနုယောဂေါ၊ ဘိက္ခဝေ၊ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ မဟတော အနတ္ထာယ သံဝတ္တတီ’’တိ. ပန္နရသမံ.

၁၁၃. ‘‘အဇ္ဈတ္တိကံ၊ ဘိက္ခဝေ၊ အင်္ဂန္တိ ကရိတွာ နာညံ ဧကင်္ဂမ္ပိ သမနုပဿာမိ ယံ ဧဝံ မဟတော အတ္ထာယ သံဝတ္တတိ ယထယိဒံ၊ ဘိက္ခဝေ၊ အနုယောဂေါ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ. အနုယောဂေါ၊ ဘိက္ခဝေ၊ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ မဟတော အတ္ထာယ သံဝတ္တတီ’’တိ. သောဠသမံ.

၁၁၄. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ သမ္မောသာယ အန္တရဓာနာယ သံဝတ္တတိ ယထယိဒံ၊ ဘိက္ခဝေ၊ ပမာဒေါ. ပမာဒေါ၊ ဘိက္ခဝေ၊ သဒ္ဓမ္မဿ သမ္မောသာယ အန္တရဓာနာယ သံဝတ္တတီ’’တိ. သတ္တရသမံ.

၁၁၅. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတိ ယထယိဒံ၊ ဘိက္ခဝေ၊ အပ္ပမာဒေါ. အပ္ပမာဒေါ၊ ဘိက္ခဝေ၊ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတီ’’တိ. အဋ္ဌာရသမံ.

၁၁၆. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ သမ္မောသာယ အန္တရဓာနာယ သံဝတ္တတိ ယထယိဒံ၊ ဘိက္ခဝေ၊ ကောသဇ္ဇံ. ကောသဇ္ဇံ၊ ဘိက္ခဝေ၊ သဒ္ဓမ္မဿ သမ္မောသာယ အန္တရဓာနာယ သံဝတ္တတီ’’တိ. ဧကူနဝီသတိမံ.

၁၁၇. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတိ ယထယိဒံ၊ ဘိက္ခဝေ၊ ဝီရိယာရမ္ဘော. ဝီရိယာရမ္ဘော၊ ဘိက္ခဝေ၊ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတီ’’တိ. ဝီသတိမံ.

၁၁၈-၁၂၈. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ သမ္မောသာယ အန္တရဓာနာယ သံဝတ္တတိ ယထယိဒံ၊ ဘိက္ခဝေ၊ မဟိစ္ဆတာ။ပေ။ အပ္ပိစ္ဆတာ။ အသန္တုဋ္ဌိတာ။ သန္တုဋ္ဌိတာ။ အယောနိသောမနသိကာရော။ ယောနိသောမနသိကာရော။ အသမ္ပဇညံ။ သမ္ပဇညံ ။ ပါပမိတ္တတာ။ ကလျာဏမိတ္တတာ။ အနုယောဂေါ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ. အနုယောဂေါ၊ ဘိက္ခဝေ၊ အကုသလာနံ ဓမ္မာနံ၊ အနနုယောဂေါ ကုသလာနံ ဓမ္မာနံ သဒ္ဓမ္မဿ သမ္မောသာယ အန္တရဓာနာယ သံဝတ္တတီ’’တိ. ဧကတ္တိံသတိမံ.

၁၂၉. ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ယော ဧဝံ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတိ ယထယိဒံ၊ ဘိက္ခဝေ၊ အနုယောဂေါ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ. အနုယောဂေါ၊ ဘိက္ခဝေ၊ ကုသလာနံ ဓမ္မာနံ၊ အနနုယောဂေါ အကုသလာနံ ဓမ္မာနံ သဒ္ဓမ္မဿ ဌိတိယာ အသမ္မောသာယ အနန္တရဓာနာယ သံဝတ္တတီ’’တိ. စတုက္ကောဋိကံ နိဋ္ဌိတံ. ဗာတ္တိံသတိမံ.

၁၃၀. ‘‘ယေ တေ၊ ဘိက္ခဝေ၊ ဘိက္ခူ အဓမ္မံ ဓမ္မောတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ [တေပိမံ (သီ.)] သဒ္ဓမ္မံ အန္တရဓာပေန္တီ’’တိ. တေတ္တိံသတိမံ.

၁၃၁. ‘‘ယေ တေ၊ ဘိက္ခဝေ၊ ဘိက္ခူ ဓမ္မံ အဓမ္မောတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ သဒ္ဓမ္မံ အန္တရဓာပေန္တီ’’တိ. စတုတ္တိံသတိမံ.

၁၃၂-၁၃၉. ‘‘ယေ တေ၊ ဘိက္ခဝေ၊ ဘိက္ခူ အဝိနယံ ဝိနယောတိ ဒီပေန္တိ။ပေ။ ဝိနယံ အဝိနယောတိ ဒီပေန္တိ။ပေ။ အဘာသိတံ အလပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ။ပေ။ ဘာသိတံ လပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ။ပေ။ အနာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ။ပေ။ အာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ။ပေ။ အပညတ္တံ တထာဂတေန ပညတ္တံ တထာဂတေနာတိ ဒီပေန္တိ။ပေ။ ပညတ္တံ တထာဂတေန အပညတ္တံ တထာဂတေနာတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ သဒ္ဓမ္မံ အန္တရဓာပေန္တီ’’တိ. ဒွါစတ္တာလီသတိမံ.

ဒုတိယပမာဒါဒိဝဂ္ဂေါ ဒသမော.

၁၁. အဓမ္မဝဂ္ဂေါ

၁၄၀. ‘‘ယေ တေ၊ ဘိက္ခဝေ၊ ဘိက္ခူ အဓမ္မံ အဓမ္မောတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနဟိတာယ ပဋိပန္နာ ဗဟုဇနသုခါယ၊ ဗဟုနော ဇနဿ အတ္ထာယ ဟိတာယ သုခါယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ ပုညံ ပသဝန္တိ၊ တေ စိမံ သဒ္ဓမ္မံ ဌပေန္တီ’’တိ [ထပေန္တီတိ (က.)]. ပဌမံ.

၁၄၁. ‘‘ယေ တေ၊ ဘိက္ခဝေ၊ ဘိက္ခူ ဓမ္မံ ဓမ္မောတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနဟိတာယ ပဋိပန္နာ ဗဟုဇနသုခါယ၊ ဗဟုနော ဇနဿ အတ္ထာယ ဟိတာယ သုခါယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ ပုညံ ပသဝန္တိ၊ တေ စိမံ သဒ္ဓမ္မံ ဌပေန္တီ’’တိ. ဒုတိယံ.

၁၄၂-၁၄၉. ‘‘ယေ တေ၊ ဘိက္ခဝေ၊ ဘိက္ခူ အဝိနယံ အဝိနယောတိ ဒီပေန္တိ။ပေ။ ဝိနယံ ဝိနယောတိ ဒီပေန္တိ။ပေ။ အဘာသိတံ အလပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ။ပေ။ ဘာသိတံ လပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ။ပေ။ အနာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ။ပေ။ အာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ။ပေ။ အပညတ္တံ တထာဂတေန အပညတ္တံ တထာဂတေနာတိ ဒီပေန္တိ။ပေ။ ပညတ္တံ တထာဂတေန ပညတ္တံ တထာဂတေနာတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနဟိတာယ ပဋိပန္နာ ဗဟုဇနသုခါယ၊ ဗဟုနော ဇနဿ အတ္ထာယ ဟိတာယ သုခါယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ ပုညံ ပသဝန္တိ၊ တေ စိမံ သဒ္ဓမ္မံ ဌပေန္တီ’’တိ. ဒသမံ.

အဓမ္မဝဂ္ဂေါ ဧကာဒသမော.

၁၂. အနာပတ္တိဝဂ္ဂေါ

၁၅၀. ‘‘ယေ တေ၊ ဘိက္ခဝေ၊ ဘိက္ခူ အနာပတ္တိံ အာပတ္တီတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ သဒ္ဓမ္မံ အန္တရဓာပေန္တီ’’တိ. ပဌမံ.

၁၅၁. ‘‘ယေ တေ၊ ဘိက္ခဝေ၊ ဘိက္ခူ အာပတ္တိံ အနာပတ္တီတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ သဒ္ဓမ္မံ အန္တရဓာပေန္တီ’’တိ. ဒုတိယံ.

၁၅၂-၁၅၉. ‘‘ယေ တေ၊ ဘိက္ခဝေ၊ ဘိက္ခူ လဟုကံ အာပတ္တိံ ဂရုကာ အာပတ္တီတိ ဒီပေန္တိ။ပေ။ ဂရုကံ အာပတ္တိံ လဟုကာ အာပတ္တီတိ ဒီပေန္တိ။ပေ။ ဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေန္တိ။ပေ။ အဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေန္တိ။ပေ။ သာဝသေသံ အာပတ္တိံ အနဝသေသာ အာပတ္တီတိ ဒီပေန္တိ။ပေ။ အနဝသေသံ အာပတ္တိံ သာဝသေသာ အာပတ္တီတိ ဒီပေန္တိ။ပေ။ သပ္ပဋိကမ္မံ အာပတ္တိံ အပ္ပဋိကမ္မာ အာပတ္တီတိ ဒီပေန္တိ။ပေ။ အပ္ပဋိကမ္မံ အာပတ္တိံ သပ္ပဋိကမ္မာ အာပတ္တီတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနအဟိတာယ ပဋိပန္နာ ဗဟုဇနအသုခါယ၊ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ အပုညံ ပသဝန္တိ၊ တေ စိမံ သဒ္ဓမ္မံ အန္တရဓာပေန္တီ’’တိ. ဒသမံ.

၁၆၀. ‘‘ယေ တေ၊ ဘိက္ခဝေ၊ ဘိက္ခူ အနာပတ္တိံ အနာပတ္တီတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနဟိတာယ ပဋိပန္နာ ဗဟုဇနသုခါယ၊ ဗဟုနော ဇနဿ အတ္ထာယ ဟိတာယ သုခါယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ ပုညံ ပသဝန္တိ၊ တေ စိမံ သဒ္ဓမ္မံ ဌပေန္တီ’’တိ. ဧကာဒသမံ.

၁၆၁. ‘‘ယေ တေ၊ ဘိက္ခဝေ၊ ဘိက္ခူ အာပတ္တိံ အာပတ္တီတိ ဒီပေန္တိ တေ၊ ဘိက္ခဝေ၊ ဘိက္ခူ ဗဟုဇနဟိတာယ ပဋိပန္နာ ဗဟုဇနသုခါယ၊ ဗဟုနော ဇနဿ အတ္ထာယ ဟိတာယ သုခါယ ဒေဝမနုဿာနံ. ဗဟုဉ္စ တေ၊ ဘိက္ခဝေ၊ ဘိက္ခူ ပုညံ ပသဝန္တိ၊ တေ စိမံ သဒ္ဓမ္မံ ဌပေန္တီ’’တိ. ဒွါဒသမံ.