൧. ചോദനാദിപുച്ഛാവിസ്സജ്ജനാ

൩൫൯. ചോദനാ കിമത്ഥായ, സാരണാ കിസ്സ കാരണാ;

സങ്ഘോ കിമത്ഥായ, മതികമ്മം പന കിസ്സ കാരണാ.

ചോദനാ സാരണത്ഥായ, നിഗ്ഗഹത്ഥായ സാരണാ;

സങ്ഘോ പരിഗ്ഗഹത്ഥായ, മതികമ്മം പന പാടിയേക്കം.

മാ ഖോ തുരിതോ അഭണി, മാ ഖോ ചണ്ഡികതോ ഭണി;

മാ ഖോ പടിഘം ജനയി, സചേ അനുവിജ്ജകോ തുവം.

മാ ഖോ സഹസാ അഭണി, കഥം വിഗ്ഗാഹികം അനത്ഥസംഹിതം;

സുത്തേ വിനയേ അനുലോമേ, പഞ്ഞത്തേ അനുലോമികേ.

അനുയോഗവത്തം നിസാമയ, കുസലേന ബുദ്ധിമതാ കതം;

സുവുത്തം സിക്ഖാപദാനുലോമികം, ഗതിം ന നാസേന്തോ സമ്പരായികം;

ഹിതേസീ അനുയുഞ്ജസ്സു, കാലേനത്ഥൂപസംഹിതം.

ചുദിതസ്സ ച ചോദകസ്സ ച;

സഹസാ വോഹാരം മാ പധാരേസി;

ചോദകോ ആഹ ആപന്നോതി;

ചുദിതകോ ആഹ അനാപന്നോതി.

ഉഭോ അനുക്ഖിപന്തോ, പടിഞ്ഞാനുസന്ധിതേന കാരയേ;

പടിഞ്ഞാ ലജ്ജീസു കതാ, അലജ്ജീസു ഏവം ന വിജ്ജതി;

ബഹുമ്പി അലജ്ജീ ഭാസേയ്യ, വത്താനുസന്ധിതേന [വുത്താനുസന്ധിതേന (സീ. സ്യാ. ക.)] കാരയേ.

അലജ്ജീ കീദിസോ ഹോതി, പടിഞ്ഞാ യസ്സ ന രൂഹതി;

ഏതഞ്ച [ഏവഞ്ച (ക.)] താഹം പുച്ഛാമി, കീദിസോ വുച്ചതി അലജ്ജീ പുഗ്ഗലോ.

സഞ്ചിച്ച ആപത്തിം ആപജ്ജതി, ആപത്തിം പരിഗൂഹതി;

അഗതിഗമനഞ്ച ഗച്ഛതി, ഏദിസോ വുച്ചതി അലജ്ജീപുഗ്ഗലോ.

സച്ചം അഹമ്പി ജാനാമി, ഏദിസോ വുച്ചതി അലജ്ജീപുഗ്ഗലോ;

അഞ്ഞഞ്ച താഹം പുച്ഛാമി, കീദിസോ വുച്ചതി ലജ്ജീപുഗ്ഗലോ.

സഞ്ചിച്ച ആപത്തിം നാപജ്ജതി, ആപത്തിം ന പരിഗൂഹതി;

അഗതിഗമനം ന ഗച്ഛതി, ഏദിസോ വുച്ചതി ലജ്ജീപുഗ്ഗലോ.

സച്ചം അഹമ്പി ജാനാമി, ഏദിസോ വുച്ചതി ലജ്ജീപുഗ്ഗലോ;

അഞ്ഞഞ്ച താഹം പുച്ഛാമി, കീദിസോ വുച്ചതി അധമ്മചോദകോ.

അകാലേ ചോദേതി അഭൂതേന;

ഫരുസേന അനത്ഥസംഹിതേന;

ദോസന്തരോ ചോദേതി നോ മേത്താചിത്തോ;

ഏദിസോ വുച്ചതി അധമ്മചോദകോ.

സച്ചം അഹമ്പി ജാനാമി, ഏദിസോ വുച്ചതി അധമ്മചോദകോ;

അഞ്ഞഞ്ച താഹം പുച്ഛാമി, കീദിസോ വുച്ചതി ധമ്മചോദകോ.

കാലേന ചോദേതി ഭൂതേന, സണ്ഹേന അത്ഥസംഹിതേന;

മേത്താചിത്തോ ചോദേതി നോ ദോസന്തരോ;

ഏദിസോ വുച്ചതി ധമ്മചോദകോ.

സച്ചം അഹമ്പി ജാനാമി, ഏദിസോ വുച്ചതി ധമ്മചോദകോ;

അഞ്ഞഞ്ച താഹം പുച്ഛാമി, കീദിസോ വുച്ചതി ബാലചോദകോ.

പുബ്ബാപരം ന ജാനാതി, പുബ്ബാപരസ്സ അകോവിദോ;

അനുസന്ധിവചനപഥം ന ജാനാതി;

അനുസന്ധിവചനപഥസ്സ അകോവിദോ;

ഏദിസോ വുച്ചതി ബാലചോദകോ.

സച്ചം അഹമ്പി ജാനാമി, ഏദിസോ വുച്ചതി ബാലചോദകോ;

അഞ്ഞഞ്ച താഹം പുച്ഛാമി, കീദിസോ വുച്ചതി പണ്ഡിതചോദകോ.

പുബ്ബാപരമ്പി ജാനാതി, പുബ്ബാപരസ്സ കോവിദോ;

അനുസന്ധിവചനപഥം ജാനാതി, അനുസന്ധിവചനപഥസ്സ കോവിദോ;

ഏദിസോ വുച്ചതി പണ്ഡിതചോദകോ.

സച്ചം അഹമ്പി ജാനാമി, ഏദിസോ വുച്ചതി പണ്ഡിതചോദകോ;

അഞ്ഞഞ്ച താഹം പുച്ഛാമി, ചോദനാ കിന്തി വുച്ചതി.

സീലവിപത്തിയാ ചോദേതി, അഥോ ആചാരദിട്ഠിയാ;

ആജീവേനപി ചോദേതി, ചോദനാ തേന വുച്ചതീതി.

അപരം ഗാഥാസങ്ഗണികം നിട്ഠിതം.