൧. അവിപ്പവാസപഞ്ഹാ

൪൭൯. അസംവാസോ ഭിക്ഖൂഹി ച ഭിക്ഖുനീഹി ച;

സമ്ഭോഗോ ഏകച്ചോ തഹിം ന ലബ്ഭതി;

അവിപ്പവാസേന അനാപത്തി;

പഞ്ഹാ മേസാ കുസലേഹി ചിന്തിതാ.

അവിസ്സജ്ജിയം അവേഭങ്ഗിയം;

പഞ്ച വുത്താ മഹേസിനാ;

വിസ്സജ്ജന്തസ്സ പരിഭുഞ്ജന്തസ്സ അനാപത്തി;

പഞ്ഹാ മേസാ കുസലേഹി ചിന്തിതാ.

ദസ പുഗ്ഗലേ ന വദാമി, ഏകാദസ വിവജ്ജിയ;

വുഡ്ഢം വന്ദന്തസ്സ ആപത്തി, പഞ്ഹാ മേസാ കുസലേഹി ചിന്തിതാ.

ന ഉക്ഖിത്തകോ ന ച പന പാരിവാസികോ;

ന സങ്ഘഭിന്നോ ന ച പന പക്ഖസങ്കന്തോ;

സമാനസംവാസകഭൂമിയാ ഠിതോ;

കഥം നു സിക്ഖായ അസാധാരണോ സിയാ;

പഞ്ഹാ മേസാ കുസലേഹി ചിന്തിതാ.

ഉപേതി ധമ്മം പരിപുച്ഛമാനോ, കുസലം അത്ഥൂപസഞ്ഹിതം;

ന ജീവതി ന മതോ ന നിബ്ബുതോ, തം പുഗ്ഗലം കതമം വദന്തി ബുദ്ധാ;

പഞ്ഹാ മേസാ കുസലേഹി ചിന്തിതാ.

ഉബ്ഭക്ഖകേ ന വദാമി, അധോ നാഭിം വിവജ്ജിയ;

മേഥുനധമ്മപച്ചയാ, കഥം പാരാജികോ സിയാ;

പഞ്ഹാ മേസാ കുസലേഹി ചിന്തിതാ.

ഭിക്ഖു സഞ്ഞാചികായ കുടിം കരോതി;

അദേസിതവത്ഥുകം പമാണാതിക്കന്തം;

സാരമ്ഭം അപരിക്കമനം അനാപത്തി;

പഞ്ഹാ മേസാ കുസലേഹി ചിന്തിതാ.

ഭിക്ഖു സഞ്ഞാചികായ കുടിം കരോതി;

ദേസിതവത്ഥുകം പമാണികം;

അനാരമ്ഭം സപരിക്കമനം ആപത്തി;

പഞ്ഹാ മേസാ കുസലേഹി ചിന്തിതാ.

ന കായികം കിഞ്ചി പയോഗമാചരേ;

ന ചാപി വാചായ പരേ ഭണേയ്യ;

ആപജ്ജേയ്യ ഗരുകം ഛേജ്ജവത്ഥും;

പഞ്ഹാ മേസാ കുസലേഹി ചിന്തിതാ.

ന കായികം വാചസികഞ്ച കിഞ്ചി;

മനസാപി സന്തോ ന കരേയ്യ പാപം;

സോ നാസിതോ കിന്തി സുനാസിതോ ഭവേ;

പഞ്ഹാ മേസാ കുസലേഹി ചിന്തിതാ.

അനാലപന്തോ മനുജേന കേനചി;

വാചാഗിരം നോ ച പരേ ഭണേയ്യ;

ആപജ്ജേയ്യ വാചസികം ന കായികം;

പഞ്ഹാ മേസാ കുസലേഹി ചിന്തിതാ.

സിക്ഖാപദാ ബുദ്ധവരേന വണ്ണിതാ;

സങ്ഘാദിസേസാ ചതുരോ ഭവേയ്യും;

ആപജ്ജേയ്യ ഏകപയോഗേന സബ്ബേ;

പഞ്ഹാ മേസാ കുസലേഹി ചിന്തിതാ.

ഉഭോ ഏകതോ ഉപസമ്പന്നാ;

ഉഭിന്നം ഹത്ഥതോ ചീവരം പടിഗ്ഗണ്ഹേയ്യ;

സിയാ ആപത്തിയോ നാനാ;

പഞ്ഹാ മേസാ കുസലേഹി ചിന്തിതാ.

ചതുരോ ജനാ സംവിധായ;

ഗരുഭണ്ഡം അവാഹരും;

തയോ പാരാജികാ ഏകോ ന പാരാജികോ;

പഞ്ഹാ മേസാ കുസലേഹി ചിന്തിതാ.