൨. ചോദകാദിപടിപത്തി

൩൬൩. ചോദകേന കഥം പടിപജ്ജിതബ്ബം? ചുദിതകേന കഥം പടിപജ്ജിതബ്ബം? സങ്ഘേന കഥം പടിപജ്ജിതബ്ബം? അനുവിജ്ജകേന കഥം പടിപജ്ജിതബ്ബം? ചോദകേന കഥം പടിപജ്ജിതബ്ബന്തി? ചോദകേന പഞ്ചസു ധമ്മേസു പതിട്ഠായ പരോ ചോദേതബ്ബോ. കാലേന വക്ഖാമി നോ അകാലേന, ഭൂതേന വക്ഖാമി നോ അഭൂതേന, സണ്ഹേന വക്ഖാമി നോ ഫരുസേന, അത്ഥസംഹിതേന വക്ഖാമി നോ അനത്ഥസംഹിതേന, മേത്താചിത്തോ വക്ഖാമി നോ ദോസന്തരോതി – ചോദകേന ഏവം പടിപജ്ജിതബ്ബം. ചുദിതകേന കഥം പടിപജ്ജിതബ്ബന്തി? ചുദിതകേന ദ്വീസു ധമ്മേസു പടിപജ്ജിതബ്ബം. സച്ചേ ച അകുപ്പേ ച – ചുദിതകേന ഏവം പടിപജ്ജിതബ്ബം. സങ്ഘേന കഥം പടിപജ്ജിതബ്ബന്തി? സങ്ഘേന ഓതിണ്ണാനോതിണ്ണം ജാനിതബ്ബം. സങ്ഘേന ഏവം പടിപജ്ജിതബ്ബം. അനുവിജ്ജകേന കഥം പടിപജ്ജിതബ്ബന്തി? അനുവിജ്ജകേന യേന ധമ്മേന യേന വിനയേന യേന സത്ഥുസാസനേന തം അധികരണം വൂപസമ്മതി തഥാ തം അധികരണം വൂപസമേതബ്ബം. അനുവിജ്ജകേന ഏവം പടിപജ്ജിതബ്ബം.

൩൬൪. ഉപോസഥോ കിമത്ഥായ, പവാരണാ കിസ്സ കാരണാ;

പരിവാസോ കിമത്ഥായ, മൂലായപടികസ്സനാ കിസ്സ കാരണാ;

മാനത്തം കിമത്ഥായ, അബ്ഭാനം കിസ്സ കാരണാ.

ഉപോസഥോ സാമഗ്ഗത്ഥായ, വിസുദ്ധത്ഥായ പവാരണാ;

പരിവാസോ മാനത്തത്ഥായ, മൂലായപടികസ്സനാ നിഗ്ഗഹത്ഥായ;

മാനത്തം അബ്ഭാനത്ഥായ, വിസുദ്ധത്ഥായ അബ്ഭാനം.

ഛന്ദാ ദോസാ ഭയാ മോഹാ, ഥേരേ ച പരിഭാസതി;

കായസ്സ ഭേദാ ദുപ്പഞ്ഞോ, ഖതോ ഉപഹതിന്ദ്രിയോ;

നിരയം ഗച്ഛതി ദുമ്മേധോ, ന ച സിക്ഖായ ഗാരവോ.

ന ച ആമിസം നിസ്സായ;

ന ച നിസ്സായ പുഗ്ഗലം;

ഉഭോ ഏതേ വിവജ്ജേത്വാ;

യഥാധമ്മോ തഥാ കരേ.