൨. കതാപത്തിവാരോ

൧. പാരാജികകണ്ഡം

൧൯൩. മേഥുനം ധമ്മം പടിസേവനപച്ചയാ കതി ആപത്തിയോ ആപജ്ജതി? മേഥുനം ധമ്മം പടിസേവനപച്ചയാ ചതസ്സോ ആപത്തിയോ ആപജ്ജതി – അക്ഖായിതേ സരീരേ മേഥുനം ധമ്മം പടിസേവതി, ആപത്തി പാരാജികസ്സ; യേഭുയ്യേന ഖായിതേ സരീരേ മേഥുനം ധമ്മം പടിസേവതി, ആപത്തി ഥുല്ലച്ചയസ്സ; വട്ടകതേ മുഖേ അച്ഛുപന്തം അങ്ഗജാതം പവേസേതി, ആപത്തി ദുക്കടസ്സ; ജതുമട്ഠകേ പാചിത്തിയം – മേഥുനം ധമ്മം പടിസേവനപച്ചയാ ഇമാ ചതസ്സോ ആപത്തിയോ ആപജ്ജതി.

അദിന്നം ആദിയനപച്ചയാ കതി ആപത്തിയോ ആപജ്ജതി? അദിന്നം ആദിയനപച്ചയാ തിസ്സോ ആപത്തിയോ ആപജ്ജതി. പഞ്ചമാസകം വാ അതിരേകപഞ്ചമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി പാരാജികസ്സ; അതിരേകമാസകം വാ ഊനപഞ്ചമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി ഥുല്ലച്ചയസ്സ; മാസകം വാ ഊനമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി ദുക്കടസ്സ – അദിന്നം ആദിയനപച്ചയാ ഇമാ തിസ്സോ ആപത്തിയോ ആപജ്ജതി.

സഞ്ചിച്ച മനുസ്സവിഗ്ഗഹം ജീവിതാ വോരോപനപച്ചയാ കതി ആപത്തിയോ ആപജ്ജതി? സഞ്ചിച്ച മനുസ്സവിഗ്ഗഹം ജീവിതാ വോരോപനപച്ചയാ തിസ്സോ ആപത്തിയോ ആപജ്ജതി. മനുസ്സം ഓദിസ്സ ഓപാതം ഖണതി ‘‘പപതിത്വാ മരിസ്സതീ’’തി, ആപത്തി ദുക്കടസ്സ; പപതിതേ ദുക്ഖാ വേദനാ ഉപ്പജ്ജതി, ആപത്തി ഥുല്ലച്ചയസ്സ; മരതി, ആപത്തി പാരാജികസ്സ – സഞ്ചിച്ച മനുസ്സവിഗ്ഗഹം ജീവിതാ വോരോപനപച്ചയാ ഇമാ തിസ്സോ ആപത്തിയോ ആപജ്ജതി.

അസന്തം അഭൂതം ഉത്തരിമനുസ്സധമ്മം ഉല്ലപനപച്ചയാ കതി ആപത്തിയോ ആപജ്ജതി? അസന്തം അഭൂതം ഉത്തരിമനുസ്സധമ്മം ഉല്ലപനപച്ചയാ തിസ്സോ ആപത്തിയോ ആപജ്ജതി – പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപതി, ആപത്തി പാരാജികസ്സ, ‘‘യോ തേ വിഹാരേ വസതി സോ ഭിക്ഖു അരഹാ’’തി ഭണതി, പടിവിജാനന്തസ്സ ആപത്തി ഥുല്ലച്ചയസ്സ; ന പടിവിജാനന്തസ്സ ആപത്തി ദുക്കടസ്സ – അസന്തം അഭൂതം ഉത്തരിമനുസ്സധമ്മം ഉല്ലപനപച്ചയാ ഇമാ തിസ്സോ ആപത്തിയോ ആപജ്ജതി.

ചത്താരോ പാരാജികാ നിട്ഠിതാ.

൨. സങ്ഘാദിസേസകണ്ഡാദി

൧൯൪. ഉപക്കമിത്വാ അസുചിം മോചനപച്ചയാ കതി ആപത്തിയോ ആപജ്ജതി? ഉപക്കമിത്വാ അസുചിമോചനപച്ചയാ തിസ്സോ ആപത്തിയോ ആപജ്ജതി – ചേതേതി ഉപക്കമതി മുച്ചതി, ആപത്തി സങ്ഘാദിസേസസ്സ; ചേതേതി ഉപക്കമതി ന മുച്ചതി, ആപത്തി ഥുല്ലച്ചയസ്സ; പയോഗേ ദുക്കടം – ഉപക്കമിത്വാ അസുചിമോചനപച്ചയാ ഇമാ തിസ്സോ ആപത്തിയോ ആപജ്ജതി.

കായസംസഗ്ഗം സമാപജ്ജനപച്ചയാ കതി ആപത്തിയോ ആപജ്ജതി? കായസംസഗ്ഗം സമാപജ്ജനപച്ചയാ പഞ്ച ആപത്തിയോ ആപജ്ജതി – അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ അധക്ഖകം ഉബ്ഭജാണുമണ്ഡലം ഗഹണം സാദിയതി, ആപത്തി പാരാജികസ്സ; ഭിക്ഖു കായേന കായം ആമസതി, ആപത്തി സങ്ഘാദിസേസസ്സ; കായേന കായപടിബദ്ധം ആമസതി, ആപത്തി ഥുല്ലച്ചയസ്സ; കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ; അങ്ഗുലിപതോദകേ പാചിത്തിയം – കായസംസഗ്ഗം സമാപജ്ജനപച്ചയാ ഇമാ പഞ്ച ആപത്തിയോ ആപജ്ജതി.

മാതുഗാമം ദുട്ഠുല്ലാഹി വാചാഹി ഓഭാസനപച്ചയാ തിസ്സോ ആപത്തിയോ ആപജ്ജതി – വച്ചമഗ്ഗം പസ്സാവമഗ്ഗം ആദിസ്സ വണ്ണമ്പി ഭണതി അവണ്ണമ്പി ഭണതി, ആപത്തി സങ്ഘാദിസേസസ്സ; വച്ചമഗ്ഗം പസ്സാവമഗ്ഗം ഠപേത്വാ അധക്ഖകം ഉബ്ഭജാണുമണ്ഡലം ആദിസ്സ വണ്ണമ്പി ഭണതി അവണ്ണമ്പി ഭണതി, ആപത്തി ഥുല്ലച്ചയസ്സ; കായപടിബദ്ധം ആദിസ്സ വണ്ണമ്പി ഭണതി അവണ്ണമ്പി ഭണതി, ആപത്തി ദുക്കടസ്സ.

അത്തകാമപാരിചരിയായ വണ്ണം ഭാസനപച്ചയാ തിസ്സോ ആപത്തിയോ ആപജ്ജതി – മാതുഗാമസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി സങ്ഘാദിസേസസ്സ; പണ്ഡകസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി ഥുല്ലച്ചയസ്സ; തിരച്ഛാനഗതസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി ദുക്കടസ്സ.

സഞ്ചരിത്തം സമാപജ്ജനപച്ചയാ തിസ്സോ ആപത്തിയോ ആപജ്ജതി – പടിഗ്ഗണ്ഹാതി വീമംസതി പച്ചാഹരതി, ആപത്തി സങ്ഘാദിസേസസ്സ; പടിഗ്ഗണ്ഹാതി വീമംസതി ന പച്ചാഹരതി, ആപത്തി ഥുല്ലച്ചയസ്സ; പടിഗ്ഗണ്ഹാതി ന വീമംസതി ന പച്ചാഹരതി, ആപത്തി ദുക്കടസ്സ.

സഞ്ഞാചികായ കുടിം കാരാപനപച്ചയാ തിസ്സോ ആപത്തിയോ ആപജ്ജതി – കാരാപേതി, പയോഗേ ദുക്കടം; ഏകം പിണ്ഡം [ഏകപിണ്ഡേ (സ്യാ.)] അനാഗതേ ആപത്തി ഥുല്ലച്ചയസ്സ; തസ്മിം പിണ്ഡേ ആഗതേ ആപത്തി സങ്ഘാദിസേസസ്സ.

മഹല്ലകം വിഹാരം കാരാപനപച്ചയാ തിസ്സോ ആപത്തിയോ ആപജ്ജതി – കാരാപേതി, പയോഗേ ദുക്കടം; ഏകം പിണ്ഡം അനാഗതേ, ആപത്തി ഥുല്ലച്ചയസ്സ; തസ്മിം പിണ്ഡേ ആഗതേ ആപത്തി സങ്ഘാദിസേസസ്സ.

ഭിക്ഖും അമൂലകേന പാരാജികേന ധമ്മേന അനുദ്ധംസനപച്ചയാ തിസ്സോ ആപത്തിയോ ആപജ്ജതി – അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ; ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

ഭിക്ഖും അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസനപച്ചയാ തിസ്സോ ആപത്തിയോ ആപജ്ജതി – അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ; ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

സങ്ഘഭേദകോ ഭിക്ഖു യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി – ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ഭേദകാനുവത്തകാ ഭിക്ഖൂ യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി – ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ദുബ്ബചോ ഭിക്ഖു യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി – ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

കുലദൂസകോ ഭിക്ഖു യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി – ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ…പേ….

അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരണപച്ചയാ കതി ആപത്തിയോ ആപജ്ജതി? അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരണപച്ചയാ ഏകം ആപത്തിം ആപജ്ജതി. ദുക്കടം – അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരണപച്ചയാ ഇമം ഏകം ആപത്തിം ആപജ്ജതി.

കതാപത്തിവാരോ നിട്ഠിതോ ദുതിയോ.