൧. പരിമണ്ഡലവഗ്ഗോ

൧൫൦. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന അനാദരിയം പടിച്ച പുരതോ വാ പച്ഛതോ വാ ഓലമ്ബേന്തേന നിവാസേന്തസ്സ ദുക്കടം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ പുരതോപി പച്ഛതോപി ഓലമ്ബേന്താ നിവാസേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച പുരതോ വാ പച്ഛതോ വാ ഓലമ്ബേന്തേന പാരുപന്തസ്സ ദുക്കടം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ പുരതോപി പച്ഛതോപി ഓലമ്ബേന്താ പാരുപിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച കായം വിവരിത്വാ അന്തരഘരേ ഗച്ഛന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച കായം വിവരിത്വാ അന്തരഘരേ നിസീദന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഹത്ഥം വാ പാദം വാ കീളാപേന്തേന അന്തരഘരേ ഗച്ഛന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഹത്ഥം വാ പാദം വാ കീളാപേന്തേന അന്തരഘരേ നിസീദന്തസ്സ ദുക്കടം …പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച തഹം തഹം ഓലോകേന്തേന അന്തരഘരേ ഗച്ഛന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച തഹം തഹം ഓലോകേന്തേന അന്തരഘരേ നിസീദന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഉക്ഖിത്തകായ അന്തരഘരേ ഗച്ഛന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഉക്ഖിത്തകായ അന്തരഘരേ നിസീദന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

പരിമണ്ഡലവഗ്ഗോ പഠമോ.