൯. രാജവഗ്ഗോ

൧൩൬. പുബ്ബേ അപ്പടിസംവിദിതേന രഞ്ഞോ അന്തേപുരം പവിസന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ആയസ്മന്തം ആനന്ദം ആരബ്ഭ. കിസ്മിം വത്ഥുസ്മിന്തി? ആയസ്മാ ആനന്ദോ പുബ്ബേ അപ്പടിസംവിദിതോ രഞ്ഞോ അന്തേപുരം പാവിസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി കഥിനകേ…പേ….

൧൩൭. രതനം ഉഗ്ഗണ്ഹന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖും ആരബ്ഭ. കിസ്മിം വത്ഥുസ്മിന്തി? അഞ്ഞതരോ ഭിക്ഖു രതനം ഉഗ്ഗഹേസി, തസ്മിം വത്ഥുസ്മിം. ഏകാ പഞ്ഞത്തി, ദ്വേ അനുപഞ്ഞത്തിയോ. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൩൮. സന്തം ഭിക്ഖും അനാപുച്ഛാ വികാലേ ഗാമം പവിസന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ വികാലേ ഗാമം പവിസിംസു, തസ്മിം വത്ഥുസ്മിം. ഏകാ പഞ്ഞത്തി, തിസ്സോ അനുപഞ്ഞത്തിയോ. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി കഥിനകേ…പേ….

൧൩൯. അട്ഠിമയം വാ ദന്തമയം വാ വിസാണമയം വാ സൂചിഘരം കാരാപേന്തസ്സ പാചിത്തിയം കത്ഥ പഞ്ഞത്തന്തി? സക്കേസു പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ ന മത്തം ജാനിത്വാ ബഹൂ സൂചിഘരേ വിഞ്ഞാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൦. പമാണാതിക്കന്തം മഞ്ചം വാ പീഠം വാ കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ആയസ്മന്തം ഉപനന്ദം സക്യപുത്തം ആരബ്ഭ. കിസ്മിം വത്ഥുസ്മിന്തി? ആയസ്മാ ഉപനന്ദോ സക്യപുത്തോ ഉച്ചേ മഞ്ചേ സയി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൧. മഞ്ചം വാ പീഠം വാ തൂലോനദ്ധം കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ മഞ്ചം വാ പീഠം വാ തൂലോനദ്ധം കാരാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൨. പമാണാതിക്കന്തം നിസീദനം കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ അപ്പമാണികാനി നിസീദനാനി ധാരേസും, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൩. പമാണാതിക്കന്തം കണ്ഡുപ്പടിച്ഛാദിം കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ അപ്പമാണികായോ കണ്ഡുപ്പടിച്ഛാദിയോ ധാരേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൪. പമാണാതിക്കന്തം വസ്സികസാടികം കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ അപ്പമാണികായോ വസ്സികസാടികായോ ധാരേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൧൪൫. സുഗതചീവരപ്പമാണം ചീവരം കാരാപേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ആയസ്മന്തം നന്ദം ആരബ്ഭ. കിസ്മിം വത്ഥുസ്മിന്തി? ആയസ്മാ നന്ദോ സുഗതചീവരപ്പമാണം ചീവരം ധാരേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

രാജവഗ്ഗോ നവമോ.

ദ്വേനവുതി പാചിത്തിയാ നിട്ഠിതാ.

ഖുദ്ദകം സമത്തം.

തസ്സുദ്ദാനം –

മുസാ ഓമസപേസുഞ്ഞം, പദസേയ്യാ ച ഇത്ഥിയാ;

അഞ്ഞത്ര വിഞ്ഞുനാ ഭൂതാ [ദേസനാരോചനാ ചേവ (സീ. സ്യാ.)], ദുട്ഠുല്ലാപത്തി ഖണനാ.

ഭൂതം അഞ്ഞായ ഉജ്ഝായി [ഭൂതഞ്ഞവാദഉജ്ഝായി (സീ.)], മഞ്ചോ സേയ്യോ ച വുച്ചതി;

പുബ്ബേ നിക്കഡ്ഢനാഹച്ച, ദ്വാരം സപ്പാണകേന ച.

അസമ്മതാ അത്ഥങ്ഗതേ, ഉപസ്സയാമിസേന ച;

ദദേ സിബ്ബേ വിധാനേന, നാവാ ഭുഞ്ജേയ്യ ഏകതോ.

പിണ്ഡം ഗണം പരം പൂവം, പവാരിതോ പവാരിതം;

വികാലം സന്നിധി ഖീരം, ദന്തപോനേന തേ ദസ.

അചേലകം ഉയ്യോഖജ്ജ [അചേലകാനുപഖജ്ജ (ക.)], പടിച്ഛന്നം രഹേന ച;

നിമന്തിതോ പച്ചയേഹി, സേനാവസനുയ്യോധികം.

സുരാ അങ്ഗുലി ഹാസോ ച, അനാദരിയഞ്ച ഭിംസനം;

ജോതി നഹാന ദുബ്ബണ്ണം, സാമം അപനിധേന ച.

സഞ്ചിച്ചുദകകമ്മാ ച, ദുട്ഠുല്ലം ഊനവീസതി;

ഥേയ്യഇത്ഥിഅവദേസം [അരിട്ഠകം (വിഭങ്ഗേ)], സംവാസേ നാസിതേന ച.

സഹധമ്മികവിലേഖാ, മോഹോ പഹാരേനുഗ്ഗിരേ;

അമൂലകഞ്ച സഞ്ചിച്ച, സോസ്സാമി ഖിയ്യപക്കമേ.

സങ്ഘേന ചീവരം ദത്വാ, പരിണാമേയ്യ പുഗ്ഗലേ;

രഞ്ഞഞ്ച രതനം സന്തം, സൂചി മഞ്ചോ ച തൂലികാ;

നിസീദനം കണ്ഡുച്ഛാദി, വസ്സികാ സുഗതേന ചാതി.

തേസം വഗ്ഗാനം ഉദ്ദാനം –

മുസാ ഭൂതാ ച ഓവാദോ, ഭോജനാചേലകേന ച;

സുരാ സപ്പാണകാ ധമ്മോ, രാജവഗ്ഗേന തേ നവാതി.