൪. ഭോജനവഗ്ഗോ

൮൪. തതുത്തരി ആവസഥപിണ്ഡം ഭുഞ്ജന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ അനുവസിത്വാ അനുവസിത്വാ ആവസഥപിണ്ഡം ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

൮൫. ഗണഭോജനേ പാചിത്തിയം കത്ഥ പഞ്ഞത്തന്തി? രാജഗഹേ പഞ്ഞത്തം. കം ആരബ്ഭാതി? ദേവദത്തം ആരബ്ഭ. കിസ്മിം വത്ഥുസ്മിന്തി? ദേവദത്തോ സപരിസോ കുലേസു വിഞ്ഞാപേത്വാ വിഞ്ഞാപേത്വാ ഭുഞ്ജി, തസ്മിം വത്ഥുസ്മിം. ഏകാ പഞ്ഞത്തി, സത്ത അനുപഞ്ഞത്തിയോ. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

൮൬. പരമ്പരഭോജനേ പാചിത്തിയം കത്ഥ പഞ്ഞത്തന്തി? വേസാലിയം പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ അഞ്ഞത്ര നിമന്തിതാ അഞ്ഞത്ര ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി, ചതസ്സോ അനുപഞ്ഞത്തിയോ. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി കഥിനകേ…പേ….

൮൭. ദ്വത്തിപത്തപൂരേ പൂവേ പടിഗ്ഗഹേത്വാ തതുത്തരി പടിഗ്ഗണ്ഹന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ ന മത്തം ജാനിത്വാ പടിഗ്ഗഹേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

൮൮. ഭുത്താവിനാ പവാരിതേന അനതിരിത്തം ഖാദനീയം വാ ഭോജനീയം വാ ഭുഞ്ജന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ ഭുത്താവീ പവാരിതാ അഞ്ഞത്ര ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി കഥിനകേ…പേ….

൮൯. ഭിക്ഖും ഭുത്താവിം പവാരിതം അനതിരിത്തേന ഖാദനീയേന വാ ഭോജനീയേന വാ അഭിഹട്ഠും പവാരേന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖും ആരബ്ഭ. കിസ്മിം വത്ഥുസ്മിന്തി? അഞ്ഞതരോ ഭിക്ഖു ഭിക്ഖും ഭുത്താവിം പവാരിതം അനതിരിത്തേന ഭോജനീയേന അഭിഹട്ഠും പവാരേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

൯൦. വികാലേ ഖാദനീയം വാ ഭോജനീയം വാ ഭുഞ്ജന്തസ്സ പാചിത്തിയം കത്ഥ പഞ്ഞത്തന്തി? രാജഗഹേ പഞ്ഞത്തം. കം ആരബ്ഭാതി? സത്തരസവഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സത്തരസവഗ്ഗിയാ ഭിക്ഖൂ വികാലേ ഭോജനം ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

൯൧. സന്നിധികാരകം ഖാദനീയം വാ ഭോജനീയം വാ ഭുഞ്ജന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ആയസ്മന്തം ബേലട്ഠസീസം ആരബ്ഭ. കിസ്മിം വത്ഥുസ്മിന്തി? ആയസ്മാ ബേലട്ഠസീസോ സന്നിധികാരകം ഭോജനം ഭുഞ്ജി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

൯൨. പണീതഭോജനാനി അത്തനോ അത്ഥായ വിഞ്ഞാപേത്വാ ഭുഞ്ജന്തസ്സ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ പണീതഭോജനാനി അത്തനോ അത്ഥായ വിഞ്ഞാപേത്വാ ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ചതൂഹി സമുട്ഠാനേഹി സമുട്ഠാതി…പേ….

൯൩. അദിന്നം മുഖദ്വാരം ആഹാരം ആഹരന്തസ്സ പാചിത്തിയം കത്ഥ പഞ്ഞത്തന്തി? വേസാലിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖും ആരബ്ഭ. കിസ്മിം വത്ഥുസ്മിന്തി? അഞ്ഞതരോ ഭിക്ഖു അദിന്നം മുഖദ്വാരം ആഹാരം ആഹരി, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

ഭോജനവഗ്ഗോ ചതുത്ഥോ.