൨൦൦. പലിബോധാപലിബോധകഥാ

൩൨൫. ദ്വേമേ, ഭിക്ഖവേ, കഥിനസ്സ പലിബോധാ, ദ്വേ അപലിബോധാ. കതമേ ച, ഭിക്ഖവേ, ദ്വേ കഥിനസ്സ പലിബോധാ? ആവാസപലിബോധോ ച ചീവരപലിബോധോ ച. കഥഞ്ച, ഭിക്ഖവേ, ആവാസപലിബോധോ ഹോതി? ഇധ, ഭിക്ഖവേ, ഭിക്ഖു വസതി വാ തസ്മിം ആവാസേ, സാപേക്ഖോ വാ പക്കമതി ‘‘പച്ചേസ്സ’’ന്തി. ഏവം ഖോ, ഭിക്ഖവേ, ആവാസപലിബോധോ ഹോതി. കഥഞ്ച, ഭിക്ഖവേ, ചീവരപലിബോധോ ഹോതി? ഇധ, ഭിക്ഖവേ, ഭിക്ഖുനോ ചീവരം അകതം വാ ഹോതി വിപ്പകതം വാ, ചീവരാസാ വാ അനുപച്ഛിന്നാ. ഏവം ഖോ, ഭിക്ഖവേ, ചീവരപലിബോധോ ഹോതി. ഇമേ ഖോ, ഭിക്ഖവേ, ദ്വേ കഥിനസ്സ പലിബോധാ.

കതമേ ച, ഭിക്ഖവേ, ദ്വേ കഥിനസ്സ അപലിബോധാ? ആവാസഅപലിബോധോ ച ചീവരഅപലിബോധോ ച. കഥഞ്ച, ഭിക്ഖവേ, ആവാസഅപലിബോധോ ഹോതി? ഇധ, ഭിക്ഖവേ, ഭിക്ഖു പക്കമതി തമ്ഹാ ആവാസാ ചത്തേന വന്തേന മുത്തേന അനപേക്ഖോ [അനപേക്ഖേന (ക.)] ‘‘ന പച്ചേസ്സ’’ന്തി. ഏവം ഖോ, ഭിക്ഖവേ, ആവാസഅപലിബോധോ ഹോതി. കഥഞ്ച, ഭിക്ഖവേ, ചീവരഅപലിബോധോ ഹോതി? ഇധ, ഭിക്ഖവേ, ഭിക്ഖുനോ ചീവരം കതം വാ ഹോതി, നട്ഠം വാ വിനട്ഠം വാ ദഡ്ഢം വാ, ചീവരാസാ വാ ഉപച്ഛിന്നാ. ഏവം ഖോ, ഭിക്ഖവേ, ചീവരഅപലിബോധോ ഹോതി. ഇമേ ഖോ, ഭിക്ഖവേ, ദ്വേ കഥിനസ്സ അപലിബോധാതി.

പലിബോധാപലിബോധകഥാ നിട്ഠിതാ.

കഥിനക്ഖന്ധകോ നിട്ഠിതോ സത്തമോ.