൧൯൧. സമാദായഛക്കം

൩൧൪. ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി. തസ്സ ബഹിസീമഗതസ്സ ഏവം ഹോതി – ‘‘ഇധേവിമം ചീവരം കാരേസ്സം, ന പച്ചേസ്സ’’ന്തി. സോ തം ചീവരം കാരേതി. തസ്സ ഭിക്ഖുനോ നിട്ഠാനന്തികോ കഥിനുദ്ധാരോ.

ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി. തസ്സ ബഹിസീമഗതസ്സ ഏവം ഹോതി – ‘‘നേവിമം ചീവരം കാരേസ്സം, ന പച്ചേസ്സ’’ന്തി. തസ്സ ഭിക്ഖുനോ സന്നിട്ഠാനന്തികോ കഥിനുദ്ധാരോ.

ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി. തസ്സ ബഹിസീമഗതസ്സ ഏവം ഹോതി – ‘‘ഇധേവിമം ചീവരം കാരേസ്സം, ന പച്ചേസ്സ’’ന്തി. സോ തം ചീവരം കാരേതി. തസ്സ തം ചീവരം കയിരമാനം നസ്സതി. തസ്സ ഭിക്ഖുനോ നാസനന്തികോ കഥിനുദ്ധാരോ.

ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി ‘‘പച്ചേസ്സ’’ന്തി. സോ ബഹിസീമഗതോ തം ചീവരം കാരേതി. സോ കതചീവരോ സുണാതി – ‘‘ഉബ്ഭതം കിര തസ്മിം ആവാസേ കഥിന’’ന്തി. തസ്സ ഭിക്ഖുനോ സവനന്തികോ കഥിനുദ്ധാരോ.

ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി ‘‘പച്ചേസ്സ’’ന്തി. സോ ബഹിസീമഗതോ തം ചീവരം കാരേതി. സോ കതചീവരോ ‘‘പച്ചേസ്സം പച്ചേസ്സ’’ന്തി ബഹിദ്ധാ കഥിനുദ്ധാരം വീതിനാമേതി. തസ്സ ഭിക്ഖുനോ സീമാതിക്കന്തികോ കഥിനുദ്ധാരോ.

ഭിക്ഖു അത്ഥതകഥിനോ വിപ്പകതചീവരം സമാദായ പക്കമതി ‘‘പച്ചേസ്സ’’ന്തി. സോ ബഹിസീമഗതോ തം ചീവരം കാരേതി. സോ കതചീവരോ ‘‘പച്ചേസ്സം പച്ചേസ്സ’’ന്തി സമ്ഭുണാതി കഥിനുദ്ധാരം. തസ്സ ഭിക്ഖുനോ സഹ ഭിക്ഖൂഹി കഥിനുദ്ധാരോ.

സമാദായഛക്കം നിട്ഠിതം.