൮. മാരകഥാ

൩൨. അഥ ഖോ ഭഗവാ തേ ഭിക്ഖൂ ആമന്തേസി [സം. നി. ൧.൧൪൧ മാരസംയുത്തേപി] – ‘‘മുത്താഹം, ഭിക്ഖവേ, സബ്ബപാസേഹി, യേ ദിബ്ബാ യേ ച മാനുസാ. തുമ്ഹേപി, ഭിക്ഖവേ, മുത്താ സബ്ബപാസേഹി, യേ ദിബ്ബാ യേ ച മാനുസാ. ചരഥ, ഭിക്ഖവേ, ചാരികം ബഹുജനഹിതായ ബഹുജനസുഖായ ലോകാനുകമ്പായ അത്ഥായ ഹിതായ സുഖായ ദേവമനുസ്സാനം. മാ ഏകേന ദ്വേ അഗമിത്ഥ. ദേസേഥ, ഭിക്ഖവേ, ധമ്മം ആദികല്യാണം മജ്ഝേകല്യാണം പരിയോസാനകല്യാണം സാത്ഥം സബ്യഞ്ജനം കേവലപരിപുണ്ണം പരിസുദ്ധം ബ്രഹ്മചരിയം പകാസേഥ. സന്തി സത്താ അപ്പരജക്ഖജാതികാ, അസ്സവനതാ ധമ്മസ്സ പരിഹായന്തി, ഭവിസ്സന്തി ധമ്മസ്സ അഞ്ഞാതാരോ. അഹമ്പി, ഭിക്ഖവേ, യേന ഉരുവേലാ സേനാനിഗമോ തേനുപസങ്കമിസ്സാമി ധമ്മദേസനായാ’’തി.

൩൩. അഥ ഖോ മാരോ പാപിമാ യേന ഭഗവാ തേനുപസങ്കമി, ഉപസങ്കമിത്വാ ഭഗവന്തം ഗാഥായ അജ്ഝഭാസി –

‘‘ബദ്ധോസി സബ്ബപാസേഹി, യേ ദിബ്ബാ യേ ച മാനുസാ;

മഹാബന്ധനബദ്ധോസി, ന മേ സമണ മോക്ഖസീ’’തി.

‘‘മുത്താഹം [മുത്തോഹം (സീ. സ്യാ.)] സബ്ബപാസേഹി, യേ ദിബ്ബാ യേ ച മാനുസാ;

മഹാബന്ധനമുത്തോമ്ഹി, നിഹതോ ത്വമസി അന്തകാതി.

[സം. നി. ൧.൧൫൧ മാരസംയുത്തേപി] ‘‘അന്തലിക്ഖചരോ പാസോ, യ്വായം ചരതി മാനസോ;

തേന തം ബാധയിസ്സാമി, ന മേ സമണ മോക്ഖസീതി.

[സം. നി. ൧.൧൧൫൧ മാരസംയുത്തേപി] ‘‘രൂപാ സദ്ദാ രസാ ഗന്ധാ, ഫോട്ഠബ്ബാ ച മനോരമാ;

ഏത്ഥ മേ വിഗതോ ഛന്ദോ, നിഹതോ ത്വമസി അന്തകാ’’തി.

അഥ ഖോ മാരോ പാപിമാ – ജാനാതി മം ഭഗവാ, ജാനാതി മം സുഗതോതി ദുക്ഖീ ദുമ്മനോ

തത്ഥേവന്തരധായീതി.

മാരകഥാ നിട്ഠിതാ.