൬൬. ആപത്തിയാ അദസ്സനേ ഉക്ഖിത്തകവത്ഥൂനി

൧൩൦. തേന ഖോ പന സമയേന അഞ്ഞതരോ ഭിക്ഖു ആപത്തിയാ അദസ്സനേ ഉക്ഖിത്തകോ വിബ്ഭമി. സോ പുന പച്ചാഗന്ത്വാ ഭിക്ഖൂ ഉപസമ്പദം യാചി. ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, ഭിക്ഖു ആപത്തിയാ അദസ്സനേ ഉക്ഖിത്തകോ വിബ്ഭമതി. സോ പുന പച്ചാഗന്ത്വാ ഭിക്ഖൂ ഉപസമ്പദം യാചതി. സോ ഏവമസ്സ വചനീയോ – ‘‘പസ്സിസ്സസി തം ആപത്തി’’ന്തി? സചാഹം പസ്സിസ്സാമീതി, പബ്ബാജേതബ്ബോ. സചാഹം ന പസ്സിസ്സാമീതി, ന പബ്ബാജേതബ്ബോ. പബ്ബാജേത്വാ വത്തബ്ബോ – ‘‘പസ്സിസ്സസി തം ആപത്തി’’ന്തി? സചാഹം പസ്സിസ്സാമീതി, ഉപസമ്പാദേതബ്ബോ. സചാഹം ന പസ്സിസ്സാമീതി, ന ഉപസമ്പാദേതബ്ബോ. ഉപസമ്പാദേത്വാ വത്തബ്ബോ – ‘‘പസ്സിസ്സസി തം ആപത്തി’’ന്തി? സചാഹം പസ്സിസ്സാമീതി, ഓസാരേതബ്ബോ. സചാഹം ന പസ്സിസ്സാമീതി, ന ഓസാരേതബ്ബോ. ഓസാരേത്വാ വത്തബ്ബോ – ‘‘പസ്സസി [പസ്സാഹി (സീ.)] തം ആപത്തി’’ന്തി? സചേ പസ്സതി, ഇച്ചേതം കുസലം. നോ ചേ പസ്സതി, ലബ്ഭമാനായ സാമഗ്ഗിയാ പുന ഉക്ഖിപിതബ്ബോ. അലബ്ഭമാനായ സാമഗ്ഗിയാ അനാപത്തി സമ്ഭോഗേ സംവാസേ.

ഇധ പന, ഭിക്ഖവേ, ഭിക്ഖു ആപത്തിയാ അപ്പടികമ്മേ ഉക്ഖിത്തകോ വിബ്ഭമതി. സോ പുന പച്ചാഗന്ത്വാ ഭിക്ഖൂ ഉപസമ്പദം യാചതി. സോ ഏവമസ്സ വചനീയോ – ‘‘പടികരിസ്സസി തം ആപത്തി’’ന്തി? സചാഹം പടികരിസ്സാമീതി, പബ്ബാജേതബ്ബോ. സചാഹം ന പടികരിസ്സാമീതി, ന പബ്ബാജേതബ്ബോ. പബ്ബാജേത്വാ വത്തബ്ബോ – ‘‘പടികരിസ്സസി തം ആപത്തി’’ന്തി? സചാഹം പടികരിസ്സാമീതി, ഉപസമ്പാദേതബ്ബോ. സചാഹം ന പടികരിസ്സാമീതി, ന ഉപസമ്പാദേതബ്ബോ. ഉപസമ്പാദേത്വാ വത്തബ്ബോ – ‘‘പടികരിസ്സസി തം ആപത്തി’’ന്തി? സചാഹം പടികരിസ്സാമീതി, ഓസാരേതബ്ബോ. സചാഹം ന പടികരിസ്സാമീതി, ന ഓസാരേതബ്ബോ. ഓസാരേത്വാ വത്തബ്ബോ – ‘‘പടികരോഹി തം ആപത്തി’’ന്തി. സചേ പടികരോതി, ഇച്ചേതം കുസലം. നോ ചേ പടികരോതി ലബ്ഭമാനായ സാമഗ്ഗിയാ പുന ഉക്ഖിപിതബ്ബോ. അലബ്ഭമാനായ സാമഗ്ഗിയാ അനാപത്തി സമ്ഭോഗേ സംവാസേ.

ഇധ പന, ഭിക്ഖവേ, ഭിക്ഖു പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ വിബ്ഭമതി. സോ പുന പച്ചാഗന്ത്വാ ഭിക്ഖൂ ഉപസമ്പദം യാചതി. സോ ഏവമസ്സ വചനീയോ – ‘‘പടിനിസ്സജ്ജിസ്സസി തം പാപികം ദിട്ഠി’’ന്തി? സചാഹം പടിനിസ്സജ്ജിസ്സാമീതി, പബ്ബാജേതബ്ബോ. സചാഹം ന പടിനിസ്സജ്ജിസ്സാമീതി, ന പബ്ബാജേതബ്ബോ. പബ്ബാജേത്വാ വത്തബ്ബോ – ‘‘പടിനിസ്സജ്ജിസ്സസി തം പാപികം ദിട്ഠി’’ന്തി? സചാഹം പടിനിസ്സജ്ജിസ്സാമീതി, ഉപസമ്പാദേതബ്ബോ. സചാഹം ന പടിനിസ്സജ്ജിസ്സാമീതി, ന ഉപസമ്പാദേതബ്ബോ. ഉപസമ്പാദേത്വാ വത്തബ്ബോ – ‘‘പടിനിസ്സജ്ജിസ്സസി തം പാപികം ദിട്ഠി’’ന്തി? സചാഹം പടിനിസ്സജ്ജിസ്സാമീതി, ഓസാരേതബ്ബോ. സചാഹം ന പടിനിസ്സജ്ജിസ്സാമീതി, ന ഓസാരേതബ്ബോ. ഓസാരേത്വാ വത്തബ്ബോ – ‘‘പടിനിസ്സജ്ജേഹി തം പാപികം ദിട്ഠി’’ന്തി. സചേ പടിനിസ്സജ്ജതി, ഇച്ചേതം കുസലം. നോ ചേ പടിനിസ്സജ്ജതി, ലബ്ഭമാനായ സാമഗ്ഗിയാ പുന ഉക്ഖിപിതബ്ബോ. അലബ്ഭമാനായ സാമഗ്ഗിയാ അനാപത്തി സമ്ഭോഗേ സംവാസേതി.

മഹാഖന്ധകോ പഠമോ.