൬൪. ചത്താരോ നിസ്സയാ

൧൨൮. താവദേവ ഛായാ മേതബ്ബാ, ഉതുപ്പമാണം ആചിക്ഖിതബ്ബം, ദിവസഭാഗോ ആചിക്ഖിതബ്ബോ, സങ്ഗീതി ആചിക്ഖിതബ്ബാ, ചത്താരോ നിസ്സയാ ആചിക്ഖിതബ്ബാ [ആചിക്ഖിതബ്ബാ, ചത്താരി അകരണീയാനി ആചിക്ഖിതബ്ബാനി. (ക.)] –

‘‘പിണ്ഡിയാലോപഭോജനം നിസ്സായ പബ്ബജ്ജാ. തത്ഥ തേ യാവജീവം ഉസ്സാഹോ കരണീയോ. അതിരേകലാഭോ – സങ്ഘഭത്തം, ഉദ്ദേസഭത്തം, നിമന്തനം, സലാകഭത്തം, പക്ഖികം, ഉപോസഥികം, പാടിപദികം.

‘‘പംസുകൂലചീവരം നിസ്സായ പബ്ബജ്ജാ. തത്ഥ തേ യാവജീവം ഉസ്സാഹോ കരണീയോ. അതിരേകലാഭോ – ഖോമം, കപ്പാസികം, കോസേയ്യം, കമ്ബലം, സാണം, ഭങ്ഗം.

‘‘രുക്ഖമൂലസേനാസനം നിസ്സായ പബ്ബജ്ജാ. തത്ഥ തേ യാവജീവം ഉസ്സാഹോ കരണീയോ. അതിരേകലാഭോ – വിഹാരോ, അഡ്ഢയോഗോ, പാസാദോ, ഹമ്മിയം, ഗുഹാ.

‘‘പൂതിമുത്തഭേസജ്ജം നിസ്സായ പബ്ബജ്ജാ. തത്ഥ തേ യാവജീവം ഉസ്സാഹോ കരണീയോ. അതിരേകലാഭോ – സപ്പി, നവനീതം, തേലം, മധു, ഫാണിത’’ന്തി.

ചത്താരോ നിസ്സയാ നിട്ഠിതാ.