൫൩. ഭിക്ഖുനീദൂസകവത്ഥു

൧൧൫. തേന ഖോ പന സമയേന സമ്ബഹുലാ ഭിക്ഖുനിയോ സാകേതാ സാവത്ഥിം അദ്ധാനമഗ്ഗപ്പടിപന്നാ ഹോന്തി. അന്തരാമഗ്ഗേ ചോരാ നിക്ഖമിത്വാ ഏകച്ചാ ഭിക്ഖുനിയോ അച്ഛിന്ദിംസു, ഏകച്ചാ ഭിക്ഖുനിയോ ദൂസേസും. സാവത്ഥിയാ രാജഭടാ നിക്ഖമിത്വാ ഏകച്ചേ ചോരേ അഗ്ഗഹേസും, ഏകച്ചേ ചോരാ പലായിംസു. യേ തേ പലായിംസു, തേ ഭിക്ഖൂസു പബ്ബജിംസു. യേ തേ ഗഹിതാ, തേ വധായ ഓനിയ്യന്തി. അദ്ദസംസു ഖോ തേ പലായിത്വാ പബ്ബജിതാ തേ ചോരേ വധായ ഓനിയ്യമാനേ, ദിസ്വാന ഏവമാഹംസു ‘‘സാധു ഖോ മയം പലായിമ്ഹാ, സചാ ച മയം ഗയ്ഹേയ്യാമ, മയമ്പി ഏവമേവ ഹഞ്ഞേയ്യാമാ’’തി. ഭിക്ഖൂ ഏവമാഹംസു ‘‘കിം പന തുമ്ഹേ, ആവുസോ, അകത്ഥാ’’തി. അഥ ഖോ തേ പബ്ബജിതാ ഭിക്ഖൂനം ഏതമത്ഥം ആരോചേസും. ഭിക്ഖൂ ഭഗവതോ ഏതമത്ഥം ആരോചേസും. ഭിക്ഖുനിദൂസകോ, ഭിക്ഖവേ, അനുപസമ്പന്നോ ന ഉപസമ്പാദേതബ്ബോ, ഉപസമ്പന്നോ നാസേതബ്ബോതി. സങ്ഘഭേദകോ, ഭിക്ഖവേ, അനുപസമ്പന്നോ ന ഉപസമ്പാദേതബ്ബോ, ഉപസമ്പന്നോ നാസേതബ്ബോതി. ലോഹിതുപ്പാദകോ, ഭിക്ഖവേ, അനുപസമ്പന്നോ ന ഉപസമ്പാദേതബ്ബോ, ഉപസമ്പന്നോ നാസേതബ്ബോതി.