൨൭. രാജഭടവത്ഥു

൯൦. തേന ഖോ പന സമയേന രഞ്ഞോ മാഗധസ്സ സേനിയസ്സ ബിമ്ബിസാരസ്സ പച്ചന്തോ കുപിതോ ഹോതി. അഥ ഖോ രാജാ മാഗധോ സേനിയോ ബിമ്ബിസാരോ സേനാനായകേ മഹാമത്തേ ആണാപേസി – ‘‘ഗച്ഛഥ, ഭണേ, പച്ചന്തം ഉച്ചിനഥാ’’തി. ‘‘ഏവം, ദേവാ’’തി ഖോ സേനാനായകാ മഹാമത്താ രഞ്ഞോ മാഗധസ്സ സേനിയസ്സ ബിമ്ബിസാരസ്സ പച്ചസ്സോസും. അഥ ഖോ അഭിഞ്ഞാതാനം അഭിഞ്ഞാതാനം യോധാനം ഏതദഹോസി – ‘‘മയം ഖോ യുദ്ധാഭിനന്ദിനോ ഗച്ഛന്താ പാപഞ്ച കരോമ, ബഹുഞ്ച അപുഞ്ഞം പസവാമ. കേന നു ഖോ മയം ഉപായേന പാപാ ച വിരമേയ്യാമ കല്യാണഞ്ച കരേയ്യാമാ’’തി? അഥ ഖോ തേസം യോധാനം ഏതദഹോസി – ‘‘ഇമേ ഖോ സമണാ സക്യപുത്തിയാ ധമ്മചാരിനോ സമചാരിനോ ബ്രഹ്മചാരിനോ സച്ചവാദിനോ സീലവന്തോ കല്യാണധമ്മാ. സചേ ഖോ മയം സമണേസു സക്യപുത്തിയേസു പബ്ബജേയ്യാമ, ഏവം മയം പാപാ ച വിരമേയ്യാമ കല്യാണഞ്ച കരേയ്യാമാ’’തി. അഥ ഖോ തേ യോധാ ഭിക്ഖൂ ഉപസങ്കമിത്വാ പബ്ബജ്ജം യാചിംസു. തേ ഭിക്ഖൂ പബ്ബാജേസും, ഉപസമ്പാദേസും. സേനാനായകാ മഹാമത്താ രാജഭടേ പുച്ഛിംസു – ‘‘കിം നു ഖോ, ഭണേ, ഇത്ഥന്നാമോ ച ഇത്ഥന്നാമോ ച യോധാ ന ദിസ്സന്തീ’’തി? ‘‘ഇത്ഥന്നാമോ ച ഇത്ഥന്നാമോ ച, സാമി, യോധാ ഭിക്ഖൂസു പബ്ബജിതാ’’തി. സേനാനായകാ മഹാമത്താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സമണാ സക്യപുത്തിയാ രാജഭടം പബ്ബാജേസ്സന്തീ’’തി. സേനാനായകാ മഹാമത്താ രഞ്ഞോ മാഗധസ്സ സേനിയസ്സ ബിമ്ബിസാരസ്സ ഏതമത്ഥം ആരോചേസും. അഥ ഖോ രാജാ മാഗധോ സേനിയോ ബിമ്ബിസാരോ വോഹാരികേ മഹാമത്തേ പുച്ഛി – ‘‘യോ, ഭണേ, രാജഭടം പബ്ബാജേതി, കിം സോ പസവതീ’’തി? ‘‘ഉപജ്ഝായസ്സ, ദേവ, സീസം ഛേതബ്ബം, അനുസ്സാവകസ്സ [അനുസാവകസ്സ (ക.)] ജിവ്ഹാ ഉദ്ധരിതബ്ബാ, ഗണസ്സ ഉപഡ്ഢഫാസുകാ ഭഞ്ജിതബ്ബാ’’തി. അഥ ഖോ രാജാ മാഗധോ സേനിയോ ബിമ്ബിസാരോ യേന ഭഗവാ തേനുപസങ്കമി, ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ രാജാ മാഗധോ സേനിയോ ബിമ്ബിസാരോ ഭഗവന്തം ഏതദവോച – ‘‘സന്തി, ഭന്തേ, രാജാനോ അസ്സദ്ധാ അപ്പസന്നാ. തേ അപ്പമത്തകേനപി ഭിക്ഖൂ വിഹേഠേയ്യും. സാധു, ഭന്തേ, അയ്യാ രാജഭടം ന പബ്ബാജേയ്യു’’ന്തി. അഥ ഖോ ഭഗവാ രാജാനം മാഗധം സേനിയം ബിമ്ബിസാരം ധമ്മിയാ കഥായ സന്ദസ്സേസി സമാദപേസി സമുത്തേജേസി സമ്പഹംസേസി. അഥ ഖോ രാജാ മാഗധോ സേനിയോ ബിമ്ബിസാരോ ഭഗവതാ ധമ്മിയാ കഥായ സന്ദസ്സിതോ സമാദപിതോ സമുത്തേജിതോ സമ്പഹംസിതോ ഉട്ഠായാസനാ ഭഗവന്തം അഭിവാദേത്വാ പദക്ഖിണം കത്വാ പക്കാമി. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, രാജഭടോ പബ്ബാജേതബ്ബോ. യോ പബ്ബാജേയ്യ, ആപത്തി ദുക്കടസ്സാ’’തി.

രാജഭടവത്ഥു നിട്ഠിതം.