൨൦. പണാമനാ ഖമാപനാ

൮൦. തേന ഖോ പന സമയേന അന്തേവാസികാ ആചരിയേസു ന സമ്മാ വത്തന്തി…പേ… ഭഗവതോ ഏതമത്ഥം ആരോചേസും…പേ… ന, ഭിക്ഖവേ, അന്തേവാസികേന ആചരിയമ്ഹി ന സമ്മാ വത്തിതബ്ബം. യോ ന സമ്മാ വത്തേയ്യ, ആപത്തി ദുക്കടസ്സാതി. നേവ സമ്മാ വത്തന്തി. ഭഗവതോ ഏതമത്ഥം ആരോചേസും…പേ… അനുജാനാമി, ഭിക്ഖവേ, അസമ്മാവത്തന്തം പണാമേതും. ഏവഞ്ച പന, ഭിക്ഖവേ, പണാമേതബ്ബോ – പണാമേമി തന്തി വാ, മായിധ പടിക്കമീതി വാ, നീഹര തേ പത്തചീവരന്തി വാ, നാഹം തയാ ഉപട്ഠാതബ്ബോതി വാ. കായേന വിഞ്ഞാപേതി, വാചായ വിഞ്ഞാപേതി, കായേന വാചായ വിഞ്ഞാപേതി, പണാമിതോ ഹോതി അന്തേവാസികോ; ന കായേന വിഞ്ഞാപേതി, ന വാചായ വിഞ്ഞാപേതി, ന കായേന വാചായ വിഞ്ഞാപേതി, ന പണാമിതോ ഹോതി അന്തേവാസികോതി.

തേന ഖോ പന സമയേന അന്തേവാസികാ പണാമിതാ ന ഖമാപേന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഖമാപേതുന്തി. നേവ ഖമാപേന്തി. ഭഗവതോ ഏതമത്ഥം ആരോചേസും. ന, ഭിക്ഖവേ, പണാമിതേന ന ഖമാപേതബ്ബോ. യോ ന ഖമാപേയ്യ, ആപത്തി ദുക്കടസ്സാതി.

തേന ഖോ പന സമയേന ആചരിയാ ഖമാപിയമാനാ ന ഖമന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഖമിതുന്തി. നേവ ഖമന്തി. അന്തേവാസികാ പക്കമന്തിപി വിബ്ഭമന്തിപി തിത്ഥിയേസുപി സങ്കമന്തി. ഭഗവതോ ഏതമത്ഥം ആരോചേസും. ന, ഭിക്ഖവേ, ഖമാപിയമാനേന ന ഖമിതബ്ബം. യോ ന ഖമേയ്യ, ആപത്തി ദുക്കടസ്സാതി.

തേന ഖോ പന സമയേന ആചരിയാ സമ്മാവത്തന്തം പണാമേന്തി, അസമ്മാവത്തന്തം ന പണാമേന്തി. ഭഗവതോ ഏതമത്ഥം ആരോചേസും. ന, ഭിക്ഖവേ, സമ്മാവത്തന്തോ പണാമേതബ്ബോ. യോ പണാമേയ്യ, ആപത്തി ദുക്കടസ്സ. ന ച, ഭിക്ഖവേ, അസമ്മാവത്തന്തോ ന പണാമേതബ്ബോ. യോ ന പണാമേയ്യ, ആപത്തി ദുക്കടസ്സ.

൮൧. ‘‘പഞ്ചഹി, ഭിക്ഖവേ, അങ്ഗേഹി സമന്നാഗതോ അന്തേവാസികോ പണാമേതബ്ബോ. ആചരിയമ്ഹി നാധിമത്തം പേമം ഹോതി, നാധിമത്തോ പസാദോ ഹോതി, നാധിമത്താ ഹിരീ ഹോതി, നാധിമത്തോ ഗാരവോ ഹോതി, നാധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതോ അന്തേവാസികോ പണാമേതബ്ബോ.

‘‘പഞ്ചഹി, ഭിക്ഖവേ, അങ്ഗേഹി സമന്നാഗതോ അന്തേവാസികോ ന പണാമേതബ്ബോ. ആചരിയമ്ഹി അധിമത്തം പേമം ഹോതി, അധിമത്തോ പസാദോ ഹോതി, അധിമത്താ ഹിരീ ഹോതി, അധിമത്തോ ഗാരവോ ഹോതി, അധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതോ അന്തേവാസികോ ന പണാമേതബ്ബോ.

‘‘പഞ്ചഹി, ഭിക്ഖവേ, അങ്ഗേഹി സമന്നാഗതോ അന്തേവാസികോ അലം പണാമേതും. ആചരിയമ്ഹി നാധിമത്തം പേമം ഹോതി, നാധിമത്തോ പസാദോ ഹോതി, നാധിമത്താ ഹിരീ ഹോതി, നാധിമത്തോ ഗാരവോ ഹോതി, നാധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതോ അന്തേവാസികോ അലം പണാമേതും.

‘‘പഞ്ചഹി, ഭിക്ഖവേ, അങ്ഗേഹി സമന്നാഗതോ അന്തേവാസികോ നാലം പണാമേതും. ആചരിയമ്ഹി അധിമത്തം പേമം ഹോതി, അധിമത്തോ പസാദോ ഹോതി, അധിമത്താ ഹിരീ ഹോതി, അധിമത്തോ ഗാരവോ ഹോതി, അധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതോ അന്തേവാസികോ നാലം പണാമേതും.

‘‘പഞ്ചഹി, ഭിക്ഖവേ, അങ്ഗേഹി സമന്നാഗതം അന്തേവാസികം അപ്പണാമേന്തോ ആചരിയോ സാതിസാരോ ഹോതി, പണാമേന്തോ അനതിസാരോ ഹോതി. ആചരിയമ്ഹി നാധിമത്തം പേമം ഹോതി, നാധിമത്തോ പസാദോ ഹോതി, നാധിമത്താ ഹിരീ ഹോതി, നാധിമത്തോ ഗാരവോ ഹോതി, നാധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതം അന്തേവാസികം അപ്പണാമേന്തോ ആചരിയോ സാതിസാരോ ഹോതി, പണാമേന്തോ അനതിസാരോ ഹോതി.

‘‘പഞ്ചഹി, ഭിക്ഖവേ, അങ്ഗേഹി സമന്നാഗതം അന്തേവാസികം പണാമേന്തോ ആചരിയോ സാതിസാരോ ഹോതി, അപ്പണാമേന്തോ അനതിസാരോ ഹോതി. ആചരിയമ്ഹി അധിമത്തം പേമം ഹോതി, അധിമത്തോ പസാദോ ഹോതി, അധിമത്താ ഹിരീ ഹോതി, അധിമത്തോ ഗാരവോ ഹോതി, അധിമത്താ ഭാവനാ ഹോതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതം അന്തേവാസികം പണാമേന്തോ ആചരിയോ സാതിസാരോ ഹോതി, അപ്പണാമേന്തോ അനതിസാരോ ഹോതീ’’തി.

പണാമനാ ഖമാപനാ നിട്ഠിതാ.