ചൂളവഗ്ഗോ

പാരിവാസികക്ഖന്ധകകഥാ

൨൭൪൮. തജ്ജനീയം നിയസ്സഞ്ച, പബ്ബാജം പടിസാരണം;

തിവിധുക്ഖേപനഞ്ചാതി, സത്ത കമ്മാനി ദീപയേ.

൨൭൪൯. തേചത്താലീസ വത്താനി, ഖന്ധകേ കമ്മസഞ്ഞിതേ;

നവാധികാനി തിംസേവ, ഖന്ധകേ തദനന്തരേ.

൨൭൫൦. ഏവം സബ്ബാനി വത്താനി, ദ്വാസീതേവ മഹേസിനാ;

ഹോന്തി ഖന്ധകവത്താനി, ഗഹിതാഗഹണേന തു.

൨൭൫൧. പാരിവാസഞ്ച വത്തഞ്ച, സമാദിന്നസ്സ ഭിക്ഖുനോ;

രത്തിച്ഛേദോ കഥം വുത്തോ, വത്തഭേദോ കഥം ഭവേ?

൨൭൫൨. സഹവാസോ വിനാവാസോ, അനാരോചനമേവ ച;

പാരിവാസികഭിക്ഖുസ്സ, രത്തിച്ഛേദോ ച ദുക്കടം.

൨൭൫൩. ഏകച്ഛന്നേ പനാവാസേ, പകതത്തേന ഭിക്ഖുനാ;

നിവാസോ ദകപാതേന, ഉക്ഖിത്തസ്സ നിവാരിതോ.

൨൭൫൪. പാരിവാസികഭിക്ഖുസ്സ, അന്തോയേവ ന ലബ്ഭതി;

ഇച്ചേവം പന നിദ്ദിട്ഠം, മഹാപച്ചരിയം പന.

൨൭൫൫. ‘‘അവിസേസേന നിദ്ദിട്ഠം, മഹാഅട്ഠകഥാദിസു;

ഉഭിന്നം ദകപാതേന, നിവാസോ വാരിതോ’’തി ഹി.

൨൭൫൬. അഭിക്ഖുകേ പനാവാസേ, അനാവാസേപി കത്ഥചി;

വിപ്പവാസം വസന്തസ്സ, രത്തിച്ഛേദോ ച ദുക്കടം.

൨൭൫൭. പാരിവാസികഭിക്ഖുസ്സ, ഭിക്ഖും ദിസ്വാന തങ്ഖണേ;

നാരോചേന്തസ്സ ചേതസ്സ, രത്തിച്ഛേദോ ച ദുക്കടം.

൨൭൫൮. പഞ്ചേവ ച യഥാവുഡ്ഢം, ലഭതേ പാരിവാസികോ;

കാതും തത്ഥേവ ച ഠത്വാ, ഉപോസഥപവാരണം.

൨൭൫൯. വസ്സസാടിം യഥാവുഡ്ഢം, ദേന്തി ചേ സങ്ഘദായകാ;

ഓണോജനം തഥാ ഭത്തം, ലഭതേ പഞ്ചിമേ പന.

പാരിവാസികക്ഖന്ധകകഥാ.

സമഥക്ഖന്ധകകഥാ

൨൭൬൦. വിവാദാധാരതാ ചാനു-വാദാധികരണമ്പി ച;

ആപത്താധാരതാ ചേവ, കിച്ചാധികരണമ്പി ച.

൨൭൬൧. ഏതാനി പന ചത്താരി, വുത്താനി ച മഹേസിനാ;

ഭേദകാരകവത്ഥൂനി, വിവാദോ തത്ഥ നിസ്സിതോ.

൨൭൬൨. വിപത്തിയോ ചതസ്സോവ, അനുവാദോ ഉപാഗതോ;

ആപത്താധാരതാ നാമ, സത്ത ആപത്തിയോ മതാ.

൨൭൬൩. സങ്ഘകിച്ചാനി നിസ്സായ, കിച്ചാധികരണം സിയാ;

ഏതേസം തു ചതുന്നമ്പി, സമത്താ സമഥാ മതാ.

൨൭൬൪. സമ്മുഖാ സതി ചാമൂള്ഹോ, പടിഞ്ഞാവിനയോപി ച;

തസ്സപാപിയസീ ചേവ, തഥാ യേഭുയ്യസീപി ച.

൨൭൬൫. തിണവത്ഥാരകോ ചേവ, സത്തമോ വിനയോ മതോ;

സത്തിമേ സമഥാ വുത്താ, ബുദ്ധേനാദിച്ചബന്ധുനാ.

൨൭൬൬. വിവാദോ സമ്മതി ദ്വീഹി, അനുവാദോ ചതൂഹി ച;

ആപത്തി പന തീഹേവ, കിച്ചമേകേന സമ്മതി.

൨൭൬൭. ഛട്ഠേന പഠമേനാപി, വിവാദോ ഏത്ഥ സമ്മതി;

സമ്മുഖാവിനയാദീഹി, അനുപുബ്ബേന തീഹിപി.

൨൭൬൮. തഥേവ പഞ്ചമേനാപി, അനുവാദോ ഹി സമ്മതി;

സമ്മുഖേന പടിഞ്ഞായ, തിണവത്ഥാരകേന ച.

൨൭൬൯. ആപത്തൂപസമം യാതി, തീഹേവ സമഥേഹി സാ;

സമ്മുഖാവിനയേനേവ, കിച്ചമേകേന സമ്മതി.

൨൭൭൦. യേഭുയ്യസികകമ്മേ തു, സലാകം ഗാഹയേ ബുധോ;

ഗൂള്ഹേന വിവടേനാപി, കണ്ണജപ്പേന വാ പന.

൨൭൭൧. അലജ്ജുസ്സദേ ഗൂള്ഹേന, വിവടേനേവ ലജ്ജിസു;

ബാലേസു കണ്ണജപ്പേന, സലാകം ഗാഹയേ ബുധോ.

൨൭൭൨. ലജ്ജീ അലജ്ജീ ബാലോതി, കേന സക്കാ വിജാനിതും?

സകേന കമ്മുനായേവ, തേന സക്കാ വിജാനിതും.

൨൭൭൩. ആപജ്ജതി ച സഞ്ചിച്ച, ആപത്തിം പരിഗൂഹതി;

ഛന്ദാദിഅഗതിം യാതി, അലജ്ജീ ഏദിസോ സിയാ.

൨൭൭൪. നാപജ്ജതി ച സഞ്ചിച്ച, ആപത്തിം ന ച ഗൂഹതി;

ന ഗച്ഛതിഗതിഞ്ചാപി, ഏദിസോ ലജ്ജി പുഗ്ഗലോ.

൨൭൭൫. ദുച്ചിന്തിതോ ച ദുബ്ഭാസീ, തഥാ ദുക്കടകാരികോ;

ഏദിസോ പന ‘‘ബാലോ’’തി, ലക്ഖണേനേവ ഞായതി.

൨൭൭൬. തിധാ സലാകഗാഹേന, ബഹുകാ ധമ്മവാദിനോ;

യേഭുയ്യസികകമ്മേന, കത്തബ്ബന്തി ജിനോബ്രവി.

൨൭൭൭. അലജ്ജീ സാനുവാദോ ച, അസുചീ കമ്മതോ ച യോ;

തസ്സപാപിയസീകമ്മ-യോഗ്ഗോ സോ ഹോതി പുഗ്ഗലോ.

൨൭൭൮. ഭണ്ഡനേ കലഹേ ജാതേ, വിവാദസ്മിം അനപ്പകേ;

ബഹുഅസ്സാമണേ ചിണ്ണേ, അനഗ്ഗേപി ച ഭസ്സകേ.

൨൭൭൯. മൂലമൂലം ഗവേസന്തം, ഹോതി വാളഞ്ച കക്ഖളം;

തിണവത്ഥാരകേനേവ, കാതബ്ബന്തി പകാസിതം.

൨൭൮൦. യഥാ ച തിണപണ്ണേന, ഛന്നം ഗൂഥഞ്ച മുത്തകം;

ന ച വായതി ദുഗ്ഗന്ധം, വൂപസമ്മതി തങ്ഖണേ.

൨൭൮൧. ഠപേത്വാ ഥുല്ലവജ്ജഞ്ച, ഗിഹീഹി പടിസംയുതം;

ദിട്ഠാവികമ്മികഞ്ചേവ, യോ ച തത്ഥ ന ഹോതി തം.

൨൭൮൨. സേസായാപത്തിയാ യാവ, ഉപസമ്പദമാളതോ;

സുദ്ധോ ഹോതി നിരാപത്തി, തിണവത്ഥാരകേ തഥാ.

സമഥക്ഖന്ധകകഥാ.

ഖുദ്ദകവത്ഥുക്ഖന്ധകകഥാ

൨൭൮൩. രുക്ഖേ വാ പന കുട്ടേവാ, അട്ടാനേ ഥമ്ഭകേസു വാ;

ന്ഹായമാനോ സകം കായം, ഉഗ്ഘംസേയ്യസ്സ ദുക്കടം.

൨൭൮൪. കായം ഗന്ധബ്ബഹത്ഥേന, കുരുവിന്ദകസുത്തിയാ;

മല്ലകേന ന ഘംസേയ്യ, നാഞ്ഞമഞ്ഞഞ്ച കായതോ.

൨൭൮൫. അകതം മല്ലകം നാമ, ഗിലാനസ്സേവ വട്ടതി;

കതം തം മല്ലകം നാമ, സബ്ബേസമ്പി ന വട്ടതി.

൨൭൮൬. കപാലിട്ഠകഖണ്ഡാനി, സബ്ബസ്സ പുഥുപാണികം;

ഗിലാനസ്സാഗിലാനസ്സ, വത്ഥവട്ടി ച വട്ടതി.

൨൭൮൭. വുത്താ ഫേണകപാസാണ-കഥലാ പാദഘംസനേ;

വട്ടം വാ ചതുരസ്സം വാ, കതകം ന ച വട്ടതി.

൨൭൮൮. യം കിഞ്ചിപി അലങ്കാരം, ധാരേന്തസ്സപി ദുക്കടം;

ഹോതി അന്തമസോ താല-പണ്ണമത്തമ്പി ഭിക്ഖുനോ.

൨൭൮൯. ഓസണ്ഹേയ്യ സകേ കേസേ, യോ ഹത്ഥഫണകേന വാ;

ഫണകേനപി കോച്ഛേന, ദുക്കടം തസ്സ നിദ്ദിസേ.

൨൭൯൦. സിത്ഥതേലോദതേലേഹി, മണ്ഡനത്ഥം ന വട്ടതി;

അനുലോമനിപാതത്ഥം, ഉദ്ധംലോമേന ഭിക്ഖുനാ.

൨൭൯൧. ഹത്ഥം തേലേന തേമേത്വാ, പുഞ്ഛിതബ്ബാ സിരോരുഹാ;

വട്ടതുണ്ഹാഭിതത്തസ്സ, അല്ലഹത്ഥേന പുഞ്ഛിതും.

൨൭൯൨. ആദാസേ ഉദപത്തേ വാ, യത്ഥ കത്ഥചി അത്തനോ;

മുഖബിമ്ബം വിനാ ഹേതും, ഓലോകേന്തസ്സ ദുക്കടം.

൨൭൯൩. ‘‘സഞ്ഛവിം തു മുഖം, നോ’’തി, ദട്ഠുമാബാധപച്ചയാ;

‘‘ജിണ്ണോ നോ’’തായുസങ്ഖാര-ജാനനത്ഥഞ്ച വട്ടതി.

൨൭൯൪. നച്ചം വാ പന ഗീതം വാ, വാദിതം വാപി ഭിക്ഖുനോ;

ദട്ഠും വാ പന സോതും വാ, ഗച്ഛതോ ഹോതി ദുക്കടം.

൨൭൯൫. ദട്ഠുമന്തമസോ മോര-നച്ചമ്പി ച ന വട്ടതി;

സോതുമന്തമസോ ദന്ത-ഗീതമ്പി ച ന വട്ടതി.

൨൭൯൬. നച്ചന്തസ്സ സയം വാപി, നച്ചാപേന്തസ്സ ദുക്കടം;

അനാപത്തന്തരാരാമേ, ഠത്വാ സുണാതി പസ്സതി.

൨൭൯൭. ‘‘പസ്സിസ്സാമീ’’തി നച്ചം വാ, ഗീതം വാ പന വാദിതം;

വിഹാരതോ വിഹാരം വാ, ഗച്ഛതോ ഹോതി ദുക്കടം.

൨൭൯൮. ആപത്തന്തോവിഹാരേപി, ഉട്ഠഹിത്വാന ഗച്ഛതോ;

ഠത്വാ ഗീവം പസാരേത്വാ, പസ്സതോപി ച വീഥിയം.

൨൭൯൯. കേസാ ദീഘാ ന ധാരേയ്യാ, യോ ധാരേയ്യസ്സ ദുക്കടം;

ദ്വങ്ഗുലം വാ ദുമാസം വാ, തതോ ഉദ്ധം ന വട്ടതി.

൨൮൦൦. നഖേ നാസികലോമാനി, ദീഘാനി ന തു ധാരയേ;

ന ച വീസതിമട്ഠം വാ, കാതും വട്ടതി ഭിക്ഖുനോ.

൨൮൦൧. കപ്പാപേയ്യ വിസും മസ്സും, ദാഠികം വാ ഠപേയ്യ യോ;

സംഹരാപേയ്യ വാ ലോമം, സമ്ബാധേ തസ്സ ദുക്കടം.

൨൮൦൨. ഛിന്ദതോ ദുക്കടം വുത്തം, കേസേ കത്തരികായ വാ;

അഗിലാനസ്സ അഞ്ഞേന, ഛിന്ദാപേന്തസ്സ വാ തഥാ.

൨൮൦൩. ഛിന്ദതോ അത്തനോ അങ്ഗ-ജാതം ഥുല്ലച്ചയം സിയാ;

സേസങ്ഗഛേദനേ അത്ത-വധേ ആപത്തി ദുക്കടം.

൨൮൦൪. അഹികീടാദിദട്ഠസ്സ, താദിസാബാധപച്ചയാ;

ന ദോസോ ഛിന്ദതോ അങ്ഗം, മോചേന്തസ്സ ച ലോഹിതം.

൨൮൦൫. അപരിസ്സാവനോ മഗ്ഗം, സചേ ഗച്ഛതി ദുക്കടം;

യാചമാനസ്സ വാ മഗ്ഗേ, തഥേവാദദതോപി തം.

൨൮൦൬. ന ഭുഞ്ജേ ന പിവേ നഗ്ഗോ, ന ഖാദേ ന ച സായയേ;

ന ദദേ ന ച ഗണ്ഹേയ്യ, ന ഗച്ഛേയ്യപി അഞ്ജസം.

൨൮൦൭. വന്ദിതബ്ബം ന നഗ്ഗേന, വന്ദാപേതബ്ബമേവ വാ;

പരികമ്മം ന കാതബ്ബം, ന നഗ്ഗേന ച കാരയേ.

൨൮൦൮. പരികമ്മേ പടിച്ഛാദീ, തിസ്സോ ജന്താഘരാദികാ;

വുത്താ, വത്ഥപടിച്ഛാദീ, സബ്ബത്ഥ പന വട്ടതി.

൨൮൦൯. യത്ഥ കത്ഥചി പേളായം, ഭുഞ്ജിതും ന ച വട്ടതി;

ഏകതോ ഭുഞ്ജതോ ഹോതി, ദുക്കടം ഏകഭാജനേ.

൨൮൧൦. ഏകപാവുരണാ ഏക-ത്ഥരണാ വാ നിപജ്ജരേ;

ഏകമഞ്ചേപി വാ തേസം, ഹോതി ആപത്തി ദുക്കടം.

൨൮൧൧. ന നിസീദേയ്യ സങ്ഘാടി-പല്ലത്ഥികമുപാഗതോ;

കിഞ്ചി കീളം ന കീളേയ്യ, പലിതം ന ച ഗാഹയേ.

൨൮൧൨. ഭമുകായ നലാടേ വാ, ദാഠികായപി ഉഗ്ഗതം;

താദിസം പലിതം ചഞ്ഞം, ഗാഹാപേതുമ്പി വട്ടതി.

൨൮൧൩. അഗിലാനോ സചേ ഭിക്ഖു, ഛത്തം ധാരേയ്യ ദുക്കടം;

അത്തനോ ചീവരാദീനം, ഗുത്തത്ഥം പന വട്ടതി.

൨൮൧൪. ഹത്ഥിസോണ്ഡം ചതുക്കണ്ണം, വസനം മച്ഛവാളകം;

വേല്ലിയം താലവണ്ടഞ്ച, നിവാസേന്തസ്സ ദുക്കടം.

൨൮൧൫. ഗഹിപാരുപനം വാപി, പാരുപന്തസ്സ ദുക്കടം;

നിവാസനേ പാരുപനേ, പരിമണ്ഡലതാ മതാ.

൨൮൧൬. ലോകായതം ന വാചേയ്യ, ന ച തം പരിയാപുണേ;

ന തിരച്ഛാനവിജ്ജാ വാ, വാചേതബ്ബാവ ഭിക്ഖുനാ.

൨൮൧൭. ന ച വട്ടതി ധാരേതും, സബ്ബാ ചാമരിബീജനീ;

ന ചാലിമ്പേയ്യ ദായം വാ, ന ച ലഞ്ജേ മുഖമ്പി ച.

൨൮൧൮. ന വഹേ ഉഭതോകാജം, വട്ടതന്തരകാജകം;

സീസക്ഖന്ധകടോലമ്ബ-ഭാരേ ദോസോ ന വിജ്ജതി.

൨൮൧൯. അട്ഠങ്ഗുലാദികം ഭിക്ഖു, പച്ഛിമം ചതുരങ്ഗുലാ;

ഖാദതോ ദന്തകട്ഠഞ്ച, ഹോതി ആപത്തി ദുക്കടം.