൧൩. ദാനലക്ഖണാദിവിനിച്ഛയകഥാ

൬൯. ഏവം രൂപിയാദിപടിഗ്ഗഹണവിനിച്ഛയം കഥേത്വാ ഇദാനി ദാനവിസ്സാസഗ്ഗാഹലാഭപരിണാമനവിനിച്ഛയം കഥേതും ‘‘ദാനവിസ്സാസഗ്ഗാഹേഹീ’’തിആദിമാഹ. തത്ഥ ദീയതേ ദാനം, ചീവരാദിവത്ഥും ആരമ്മണം കത്വാ പവത്തോ അലോഭപ്പധാനോ കാമാവചരകുസലകിരിയചിത്തുപ്പാദോ. സസനം സാസോ, സസു ഹിംസായന്തി ധാതു, ഹിംസനന്തി അത്ഥോ, വിഗതോ സാസോ ഏതസ്മാ ഗാഹാതി വിസ്സാസോ. ഗഹണം ഗാഹോ, വിസ്സാസേന ഗാഹോ വിസ്സാസഗ്ഗാഹോ. വിസേസനേ ചേത്ഥ കരണവചനം, വിസ്സാസവസേന ഗാഹോ, ന ഥേയ്യചിത്തവസേനാതി അത്ഥോ. ലച്ഛതേതി ലാഭോ, ചീവരാദിവത്ഥു, തസ്സ ലാഭസ്സ. പരിണമിയതേ പരിണാമനം, അഞ്ഞേസം അത്ഥായ പരിണതസ്സ അത്തനോ, അഞ്ഞസ്സ വാ പരിണാമനം, ദാപനന്തി അത്ഥോ. ദാനവിസ്സാസഗ്ഗാഹേഹി ലാഭസ്സ പരിണാമനന്തി ഏത്ഥ ഉദ്ദേസേ സമഭിനിവിട്ഠസ്സ ‘‘ദാന’’ന്തി പദസ്സ അത്ഥവിനിച്ഛയോ താവ പഠമം ഏവം വേദിതബ്ബോതി യോജനാ. അത്തനോ സന്തകസ്സ ചീവരാദിപരിക്ഖാരസ്സ ദാനന്തി സമ്ബന്ധോ. യസ്സ കസ്സചീതി സമ്പദാനനിദ്ദേസോ, യസ്സ കസ്സചി പടിഗ്ഗാഹകസ്സാതി അത്ഥോ.

യദിദം ‘‘ദാന’’ന്തി വുത്തം, തത്ഥ കിം ലക്ഖണന്തി ആഹ ‘‘തത്രിദം ദാനലക്ഖണ’’ന്തി. ‘‘ഇദം തുയ്ഹം ദേമീ’’തി വദതീതി ഇദം തിവങ്ഗസമ്പന്നം ദാനലക്ഖണം ഹോതീതി യോജനാ. തത്ഥ ഇദന്തി ദേയ്യധമ്മനിദസ്സനം. തുയ്ഹന്തി പടിഗ്ഗാഹകനിദസ്സനം. ദേമീതി ദായകനിദസ്സനം. ദദാമീതിആദീനി പന പരിയായവചനാനി. വുത്തഞ്ഹി ‘‘ദേയ്യദായകപടിഗ്ഗാഹകാ വിയ ദാനസ്സാ’’തി, ‘‘തിണ്ണം സമ്മുഖീഭാവാ കുസലം ഹോതീ’’തി ച. ‘‘വത്ഥുപരിച്ചാഗലക്ഖണത്താ ദാനസ്സാ’’തി ഇദം പന ഏകദേസലക്ഖണകഥനമേവ, കിം ഏവം ദീയമാനം സമ്മുഖായേവ ദിന്നം ഹോതി, ഉദാഹു പരമ്മുഖാപീതി ആഹ ‘‘സമ്മുഖാപി പരമ്മുഖാപി ദിന്നംയേവ ഹോതീ’’തി. തുയ്ഹം ഗണ്ഹാഹീതിആദീസു അയമത്ഥോ – ‘‘ഗണ്ഹാഹീ’’തി വുത്തേ ‘‘ദേമീ’’തി വുത്തസദിസം ഹോതി, തസ്മാ മുഖ്യതോ ദിന്നത്താ സുദിന്നം ഹോതി, ‘‘ഗണ്ഹാമീ’’തി ച വുത്തേ മുഖ്യതോ ഗഹണം ഹോതി, തസ്മാ സുഗ്ഗഹിതം ഹോതി. ‘‘തുയ്ഹം മയ്ഹ’’ന്തി ഇമാനി പന പടിഗ്ഗാഹകപടിബന്ധതാകരണേ വചനാനി. തവ സന്തകം കരോഹീതിആദീനി പന പരിയായതോ ദാനഗ്ഗഹണാനി, തസ്മാ ദുദിന്നം ദുഗ്ഗഹിതഞ്ച ഹോതി. ലോകേ ഹി അപരിച്ചജിതുകാമാപി പുന ഗണ്ഹിതുകാമാപി ‘‘തവ സന്തകം ഹോതൂ’’തി നിയ്യാതേന്തി യഥാ തം കുസരഞ്ഞോ മാതു രജ്ജനിയ്യാതനം. തേനാഹ ‘‘നേവ ദാതാ ദാതും ജാനാതി, ന ഇതരോ ഗഹേതു’’ന്തി. സചേ പനാതിആദീസു പന ദായകേന പഞ്ഞത്തിയം അകോവിദതായ പരിയായവചനേ വുത്തേപി പടിഗ്ഗാഹകോ അത്തനോ പഞ്ഞത്തിയം കോവിദതായ മുഖ്യവചനേന ഗണ്ഹാതി, തസ്മാ ‘‘സുഗ്ഗഹിത’’ന്തി വുത്തം.

സചേ പന ഏകോതിആദീസു പന ദായകോ മുഖ്യവചനേന ദേതി, പടിഗ്ഗാഹകോപി മുഖ്യവചനേന പടിക്ഖിപതി, തസ്മാ ദായകസ്സ പുബ്ബേ അധിട്ഠിതമ്പി ചീവരം ദാനവസേന അധിട്ഠാനം വിജഹതി, പരിച്ചത്തത്താ അത്തനോ അസന്തകത്താ അതിരേകചീവരമ്പി ന ഹോതി, തസ്മാ ദസാഹാതിക്കമേപി ആപത്തി ന ഹോതി. പടിഗ്ഗാഹകസ്സപി ന പടിക്ഖിപിതത്താ അത്തനോ സന്തകം ന ഹോതി, തസ്മാ അതിരേകചീവരം ന ഹോതീതി ദസാഹാതിക്കമേപി ആപത്തി നത്ഥി. യസ്സ പന രുച്ചതീതി ഏത്ഥ പന ഇമസ്സ ചീവരസ്സ അസ്സാമികത്താ പംസുകൂലട്ഠാനേ ഠിതത്താ യസ്സ രുച്ചതി, തേന പംസുകൂലഭാവേന ഗഹേത്വാ പരിഭുഞ്ജിതബ്ബം, പരിഭുഞ്ജന്തേന പന ദായകേന പുബ്ബഅധിട്ഠിതമ്പി ദാനവസേന അധിട്ഠാനസ്സ വിജഹിതത്താ പുന അധിട്ഠഹിത്വാ പരിഭുഞ്ജിതബ്ബം ഇതരേന പുബ്ബേ അനധിട്ഠിതത്താതി ദട്ഠബ്ബം.

ഇത്ഥന്നാമസ്സ ദേഹീതിആദീസു പന ആണത്യത്ഥേ പവത്തായ പഞ്ചമീവിഭത്തിയാ വുത്തത്താ ആണത്തേന പടിഗ്ഗാഹകസ്സ ദിന്നകാലേയേവ പടിഗ്ഗാഹകസ്സ സന്തകം ഹോതി, ന തതോ പുബ്ബേ, പുബ്ബേ പന ആണാപകസ്സേവ, തസ്മാ ‘‘യോ പഹിണതി, തസ്സേവ സന്തക’’ന്തി വുത്തം. ഇത്ഥന്നാമസ്സ ദമ്മീതി പന പച്ചുപ്പന്നത്ഥേ പവത്തായ വത്തമാനവിഭത്തിയാ വുത്തത്താ തതോ പട്ഠായ പടിഗ്ഗാഹകസ്സേവ സന്തകം ഹോതി, തസ്മാ ‘‘യസ്സ പഹീയതി, തസ്സ സന്തക’’ന്തി വുത്തം. തസ്മാതി ഇമിനാ ആയസ്മതാ രേവതത്ഥേരേന ആയസ്മതോ സാരിപുത്തസ്സ ചീവരപേസനവത്ഥുസ്മിം ഭഗവതാ ദേസിതേസു അധിട്ഠാനേസു ഇധ വുത്തലക്ഖണേന അസമ്മോഹതോ ജാനിതബ്ബന്തി ദസ്സേതി.

തത്ഥ ദ്വാധിട്ഠിതം, സ്വാധിട്ഠിതന്തി ച ന തിചീവരാധിട്ഠാനം സന്ധായ വുത്തം, അഥ ഖോ സാമികേ ജീവന്തേ വിസ്സാസഗ്ഗാഹചീവരഭാവേന ച സാമികേ മതേ മതകചീവരഭാവേന ച ഗഹണം സന്ധായ വുത്തം, തതോ പന ദസാഹേ അനതിക്കന്തേയേവ തിചീവരാധിട്ഠാനം വാ പരിക്ഖാരചോളാധിട്ഠാനം വാ വികപ്പനം വാ കാതബ്ബം. യോ പഹിണതീതി ദായകം സന്ധായാഹ, യസ്സ പഹീയതീതി പടിഗ്ഗാഹകം.

പരിച്ചജിത്വാ…പേ… ന ലഭതി, ആഹരാപേന്തോ ഭണ്ഡഗ്ഘേന കാരേതബ്ബോതി അത്ഥോ. അത്തനാ…പേ… നിസ്സഗ്ഗിയന്തി ഇമിനാ പരസന്തകഭൂതത്തം ജാനന്തോ ഥേയ്യപസയ്ഹവസേന അച്ഛിന്ദന്തോ പാരാജികോ ഹോതീതി ദസ്സേതി. പോരാണടീകായം പന ‘‘സകസഞ്ഞായ വിനാ ഗണ്ഹന്തോ ഭണ്ഡം അഗ്ഘാപേത്വാ ആപത്തിയാ കാരേതബ്ബോ’’തി വുത്തം. സകസഞ്ഞായ വിനാപി താവകാലികപംസുകൂലസഞ്ഞാദിവസേന ഗണ്ഹന്തോ ആപത്തിയാ ന കാരേതബ്ബോ. അട്ഠകഥായം പന പസയ്ഹാകാരം സന്ധായ വദതി. തേനാഹ ‘‘അച്ഛിന്ദതോ നിസ്സഗ്ഗിയ’’ന്തി. സചേ പന…പേ… വട്ടതീതി തുട്ഠദാനം ആഹ, അഥ പനാതിആദിനാ കുപിതദാനം. ഉഭയഥാപി സയം ദിന്നത്താ വട്ടതി, ഗഹണേ ആപത്തി നത്ഥീതി അത്ഥോ.

മമ സന്തികേ…പേ… ഏവം പന ദാതും ന വട്ടതീതി വത്ഥുപരിച്ചാഗലക്ഖണത്താ ദാനസ്സ ഏവം ദദന്തോ അപരിച്ചജിത്വാ ദിന്നത്താ ദാനം ന ഹോതീതി ന വട്ടതി, തതോ ഏവ ദുക്കടം ഹോതി. ആഹരാപേതും പന വട്ടതീതി പുബ്ബേ ‘‘അകരോന്തസ്സ ന ദേമീ’’തി വുത്തത്താ യഥാവുത്തഉപജ്ഝായഗ്ഗഹണാദീനി അകരോന്തേ ആചരിയസ്സേവ സന്തകം ഹോതീതി കത്വാ വുത്തം. കരോന്തേ പന അന്തേവാസികസ്സ സന്തകം ഭവേയ്യ സബ്ബസോ അപരിച്ചജിത്വാ ദിന്നത്താ. സകസഞ്ഞായ വിജ്ജമാനത്താ ‘‘ആഹരാപേതും വട്ടതീ’’തി വുത്തം സിയാ. ടീകായം (സാരത്ഥ. ടീ. ൨.൬൩൫) പന ‘‘ഏവം ദിന്നം ഭതിസദിസത്താ ആഹരാപേതും വട്ടതീ’’തി വുത്തം. ഭതിസദിസേ സതിപി കമ്മേ കതേ ഭതി ലദ്ധബ്ബാ ഹോതി, തസ്മാ ആരോപേതും ന വട്ടേയ്യ. വിമതിവിനോദനിയം (വി. വി. ടീ. ൧.൬൩൫) പന ‘‘ആഹരാപേതും വട്ടതീതി കമ്മേ അകതേ ഭതിസദിസത്താ വുത്ത’’ന്തി വുത്തം, തേന കമ്മേ കതേ ആഹരാപേതും ന വട്ടതീതി സിദ്ധം. ഉപജ്ഝം ഗണ്ഹിസ്സതീതി സാമണേരസ്സ ദാനം ദീപേതി, തേന ച സാമണേരകാലേ ദത്വാ ഉപസമ്പന്നകാലേ അച്ഛിന്ദതോപി പാചിത്തിയം ദീപേതി. അയം താവ ദാനേ വിനിച്ഛയോതി ഇമിനാ ദാനവിനിച്ഛയാദീനം തിണ്ണം വിനിച്ഛയാനം ഏകപരിച്ഛേദകതഭാവം ദീപേതി.

വിസ്സാസഗ്ഗാഹലക്ഖണവിനിച്ഛയകഥാ

൭൦. അനുട്ഠാനസേയ്യാ നാമ യായ സേയ്യായ സയിതോ യാവ ജീവിതിന്ദ്രിയുപച്ഛേദം ന പാപുണാതി, താവ വുച്ചതി. ദദമാനേന ച മതകധനം താവ യേ തസ്സ ധനേ ഇസ്സരാ ഗഹട്ഠാ വാ പബ്ബജിതാ വാ, തേസം ദാതബ്ബന്തി ഏത്ഥ കേ ഗഹട്ഠാ കേ പബ്ബജിതാ കേന കാരണേന തസ്സ ധനേ ഇസ്സരാതി? ഗഹട്ഠാ താവ ഗിലാനുപട്ഠാകഭൂതാ തേന കാരണേന ഗിലാനുപട്ഠാകഭാഗഭൂതേ തസ്സ ധനേ ഇസ്സരാ, യേസഞ്ച വാണിജാനം ഹത്ഥതോ കപ്പിയകാരകേന പത്താദിപരിക്ഖാരോ ഗാഹാപിതോ, തേസം യം ദാതബ്ബമൂലം, തേ ച തസ്സ ധനേ ഇസ്സരാ, യേസഞ്ച മാതാപിതൂനം അത്ഥായ പരിച്ഛിന്ദിത്വാ വത്ഥാനി ഠപിതാനി, തേപി തസ്സ ധനസ്സ ഇസ്സരാ. ഏവമാദിനാ യേന യേന കാരണേന യം യം പരിക്ഖാരധനം യേഹി യേഹി ഗഹട്ഠേഹി ലഭിതബ്ബം ഹോതി, തേന തേന കാരണേന തേ തേ ഗഹട്ഠാ തസ്സ തസ്സ ധനസ്സ ഇസ്സരാ.

പബ്ബജിതാ പന ബാഹിരകാ തഥേവ സതി കാരണേ ഇസ്സരാ. പഞ്ചസു പന സഹധമ്മികേസു ഭിക്ഖൂ സാമണേരാ ച മതാനം ഭിക്ഖുസാമണേരാനം ധനം വിനാപി കാരണേന ദായാദഭാവേന ലഭന്തി, ന ഇതരാ. ഭിക്ഖുനീസിക്ഖമാനസാമണേരീനമ്പി ധനം തായേവ ലഭന്തി, ന ഇതരേ. തം പന മതകധനഭാജനം ചതുപച്ചയഭാജനവിനിച്ഛയേ ആവി ഭവിസ്സതി, ബഹൂ പന വിനയധരത്ഥേരാ ‘‘യേ തസ്സ ധനസ്സ ഇസ്സരാ ഗഹട്ഠാ വാ പബ്ബജിതാ വാ’’തി പാഠം നിസ്സായ ‘‘മതഭിക്ഖുസ്സ ധനം ഗഹട്ഠഭൂതാ ഞാതകാ ലഭന്തീ’’തി വിനിച്ഛിനന്തി, തമ്പി വിനിച്ഛയം തസ്സ ച യുത്തായുത്തഭാവം തത്ഥേവ വക്ഖാമ.

അനത്തമനസ്സ സന്തകന്തി ‘‘ദുട്ഠു കതം തയാ മയാ അദിന്നം മമ സന്തകം ഗണ്ഹന്തേനാ’’തി വചീഭേദേന വാ ചിത്തുപ്പാദമത്തേന വാ ദോമനസ്സപ്പത്തസ്സ സന്തകം. യോ പന പഠമംയേവ ‘‘സുട്ഠു കതം തയാ മമ സന്തകം ഗണ്ഹന്തേനാ’’തി വചീഭേദേന വാ ചിത്തുപ്പാദമത്തേന വാ അനുമോദിത്വാ പച്ഛാ കേനചി കാരണേന കുപിതോ, പച്ചാഹരാപേതും ന ലഭതി. യോപി അദാതുകാമോ, ചിത്തേന പന അധിവാസേതി, ന കിഞ്ചി വദതീതി ഏത്ഥ തു പോരാണടീകായം (സാരത്ഥ. ടീ. ൨.൧൩൧) ‘‘ചിത്തേന പന അധിവാസേതീതി വുത്തമേവത്ഥം വിഭാവേതും ‘ന കിഞ്ചി വദതീ’തി വുത്ത’’ന്തി വുത്തം. ഏവം സതി ‘‘ചിത്തേനാ’’തി ഇദം അധിവാസനകിരിയായ കരണം ഹോതി. അദാതുകാമോതി ഏത്ഥാപി തമേവ കരണം സിയാ, തതോ ‘‘ചിത്തേന അദാതുകാമോ, ചിത്തേന അധിവാസേതീ’’തിവചനം ഓചിത്യസമ്പോസകം ന ഭവേയ്യ. തം ഠപേത്വാ ‘‘അദാതുകാമോ’’തി ഏത്ഥ കായേനാതി വാ വാചായാതി വാ അഞ്ഞം കരണമ്പി ന സമ്ഭവതി, തദസമ്ഭവേ സതി വിസേസത്ഥവാചകോ പന-സദ്ദോപി നിരത്ഥകോ. ന കിഞ്ചി വദതീതി ഏത്ഥ തു വദനകിരിയായ കരണം ‘‘വാചായാ’’തി പദം ഇച്ഛിതബ്ബം, തഥാ ച സതി അഞ്ഞം അധിവാസനകിരിയായ കരണം, അഞ്ഞം വദനകിരിയായ കരണം, അഞ്ഞാ അധിവാസനകിരിയാ, അഞ്ഞാ വദനകിരിയാ, തസ്മാ ‘‘വുത്തമേവത്ഥം വിഭാവേതു’’ന്തി വത്തും ന അരഹതി, തസ്മാ യോപി ചിത്തേന അദാതുകാമോ ഹോതി, പന തഥാപി വാചായ അധിവാസേതി, ന കിഞ്ചി വദതീതി യോജനം കത്വാ പന ‘‘അധിവാസേതീതി വുത്തമേവത്ഥം പകാസേതും ന കിഞ്ചി വദതീതി വുത്ത’’ന്തി വത്തുമരഹതി. ഏത്ഥ തു പന-സദ്ദോ അരുചിലക്ഖണസൂചനത്ഥോ. ‘‘ചിത്തേനാ’’തി ഇദം അദാതുകാമകിരിയായ കരണം, ‘‘വാചായാ’’തി അധിവാസനകിരിയായ അവദനകിരിയായ ച കരണം. അധിവാസനകിരിയാ ച അവദനകിരിയായേവ. ‘‘അധിവാസേതീ’’തി വുത്തേ അവദനകിരിയായ അപാകടഭാവതോ തം പകാസേതും ‘‘ന കിഞ്ചി വദതീ’’തി വുത്തം, ഏവം ഗയ്ഹമാനേ പുബ്ബാപരവചനത്ഥോ ഓചിത്യസമ്പോസകോ സിയാ, തസ്മാ ഏത്തകവിവരേഹി വിചാരേത്വാ ഗഹേതബ്ബോതി.

ലാഭപരിണാമനവിനിച്ഛയകഥാ

൭൧. ലാഭപരിണാമനവിനിച്ഛയേ തുമ്ഹാകം സപ്പിആദീനി ആഭതാനീതി തുമ്ഹാകം അത്ഥായ ആഭതാനി സപ്പിആദീനി. പരിണതഭാവം ജാനിത്വാപി വുത്തവിധിനാ വിഞ്ഞാപേന്തേന തേസം സന്തകമേവ വിഞ്ഞാപിതം നാമ ഹോതീതി ആഹ ‘‘മയ്ഹമ്പി ദേഥാതി വദതി, വട്ടതീ’’തി.

‘‘പുപ്ഫമ്പി ആരോപേതും ന വട്ടതീതി ഇദം പരിണതം സന്ധായ വുത്തം, സചേ പന ഏകസ്മിം ചേതിയേ പൂജിതം പുപ്ഫം ഗഹേത്വാ അഞ്ഞസ്മിം ചേതിയേ പൂജേതി, വട്ടതീ’’തി സാരത്ഥദീപനിയം (സാരത്ഥ. ടീ. ൨.൬൬൦) വുത്തം. അട്ഠകഥായം (പാരാ. അട്ഠ. ൨.൬൬൦) പന നിയമേത്വാ ‘‘അഞ്ഞസ്സ ചേതിയസ്സ അത്ഥായ രോപിതമാലാവച്ഛതോ’’തി വുത്തത്താ ന കേവലം പരിണതഭാവോയേവ കഥിതോ, അഥ ഖോ നിയമേത്വാ രോപിതഭാവോപി. പുപ്ഫമ്പീതി പി-സദ്ദേന കുതോ മാലാവച്ഛന്തി ദസ്സേതി. വിമതിവിനോദനിയം (വി. വി. ടീ. ൧.൬൬൦) പന ‘‘രോപിതമാലാവച്ഛതോതി കേനചി നിയമേത്വാ രോപിതം സന്ധായ വുത്തം, അനോചിതം മിലായമാനം ഓചിനിത്വാ യത്ഥ കത്ഥചി പൂജേതും വട്ടതീ’’തി വുത്തം. ഠിതം ദിസ്വാതി സേസകം ഗഹേത്വാ ഠിതം ദിസ്വാ. ഇമസ്സ സുനഖസ്സ മാ ദേഹി, ഏതസ്സ ദേഹീതി ഇദം പരിണതേയേവ, തിരച്ഛാനഗതസ്സ പരിച്ചജിത്വാ ദിന്നേ പന തം പലാപേത്വാ അഞ്ഞം ഭുഞ്ജാപേതും വട്ടതി, തസ്മാ ‘‘കത്ഥ ദേമാതിആദിനാ ഏകേനാകാരേന അനാപത്തി ദസ്സിതാ. ഏവം പന അപുച്ഛിതേപി ‘അപരിണതം ഇദ’ന്തി ജാനന്തേന അത്തനോ രുചിയാ യത്ഥ ഇച്ഛതി, തത്ഥ ദാപേതും വട്ടതീ’’തി തീസുപി ഗണ്ഠിപദേസു വുത്തം. യത്ഥ ഇച്ഛഥ, തത്ഥ ദേഥാതി ഏത്ഥാപി ‘‘തുമ്ഹാകം രുചിയാ’’തി വുത്തത്താ യത്ഥ ഇച്ഛതി, തത്ഥ ദാപേതും ലഭതി.

പരിവാരേ (പരി. അട്ഠ. ൩൨൯) പന നവ അധമ്മികാനി ദാനാനീതി സങ്ഘസ്സ പരിണതം അഞ്ഞസങ്ഘസ്സ വാ ചേതിയസ്സ വാ പുഗ്ഗലസ്സ വാ പരിണാമേതി, ചേതിയസ്സ പരിണതം അഞ്ഞചേതിയസ്സ വാ സങ്ഘസ്സ വാ പുഗ്ഗലസ്സ വാ പരിണാമേതി, പുഗ്ഗലസ്സ പരിണതം അഞ്ഞപുഗ്ഗലസ്സ വാ സങ്ഘസ്സ വാ ചേതിയസ്സ വാ പരിണാമേതീതി ഏവം വുത്താനി. നവ പടിഗ്ഗഹാ പരിഭോഗാ ചാതി ഏതേസംയേവ ദാനാനം പടിഗ്ഗഹാ ച പരിഭോഗാ ച. തീണി ധമ്മികാനി ദാനാനീതി സങ്ഘസ്സ നിന്നം സങ്ഘസ്സേവ ദേതി, ചേതിയസ്സ നിന്നം ചേതിയസ്സേവ ദേതി, പുഗ്ഗലസ്സ നിന്നം പുഗ്ഗലസ്സേവ ദേതീതി ഇമാനി തീണി. പടിഗ്ഗഹപടിഭോഗാപി തേസംയേവ പടിഗ്ഗഹാ ച പരിഭോഗാ ചാതി ആഗതം.

ഇതി വിനയസങ്ഗഹസംവണ്ണനാഭൂതേ വിനയാലങ്കാരേ

ദാനലക്ഖണാദിവിനിച്ഛയകഥാലങ്കാരോ നാമ

തേരസമോ പരിച്ഛേദോ.