൧൦. ഭിക്ഖുനിക്ഖന്ധകോ

മഹാപജാപതിഗോതമീവത്ഥുകഥാവണ്ണനാ

൪൦൩. ഭിക്ഖുനിക്ഖന്ധകേ ‘‘മാതുഗാമസ്സ പബ്ബജിതത്താ’’തി ഇദം പഞ്ചവസ്സസതതോ ഉദ്ധം സദ്ധമ്മസ്സ അപ്പവത്തനകാരണദസ്സനം. സുക്ഖവിപസ്സകഖീണാസവവസേന വസ്സസഹസ്സന്തിആദി ഖന്ധകഭാണകാനം മതം ഗഹേത്വാ വുത്തം. ദീഘനികായട്ഠകഥായം പന ‘‘പടിസമ്ഭിദാപ്പത്തേഹി വസ്സസഹസ്സം അട്ഠാസി, ഛളഭിഞ്ഞേഹി വസ്സസഹസ്സം, തേവിജ്ജേഹി വസ്സസഹസ്സം, സുക്ഖവിപസ്സകേഹി വസ്സസഹസ്സം, പാതിമോക്ഖേഹി വസ്സസഹസ്സം അട്ഠാസീ’’തി (ദീ. നി. അട്ഠ. ൩.൧൬൧) വുത്തം. അങ്ഗുത്തര (അ. നി. അട്ഠ. ൩.൮.൫൧) -സംയുത്തട്ഠകഥാസുപി (സം. നി. അട്ഠ. ൨.൨.൧൫൬) അഞ്ഞഥാവ വുത്തം, തം സബ്ബം അഞ്ഞമഞ്ഞവിരുദ്ധമ്പി തംതംഭാണകാനം മതേന ലിഖിതസീഹളട്ഠകഥാസു ആഗതനയമേവ ഗഹേത്വാ ആചരിയേന ലിഖിതം ഈദിസേ കഥാവിരോധേ സാസനപരിഹാനിയാ അഭാവതോ, സോധനുപായാഭാവാ ച. പരമത്ഥവിരോധോ ഏവ ഹി സുത്താദിനയേന സോധനീയോ, ന കഥാമഗ്ഗവിരോധോതി.

മഹാപജാപതിഗോതമീവത്ഥുകഥാവണ്ണനാ നിട്ഠിതാ.

ഭിക്ഖുനീഉപസമ്പദാനുജാനനകഥാവണ്ണനാ

൪൦൪-൮. പാളിയം യദഗ്ഗേനാതി യസ്മിം ദിവസേ. തദാതി തസ്മിംയേവ ദിവസേ. വിമാനേത്വാതി അവമാനം കത്വാ.

൪൧൦-൧. ആപത്തിഗാമിനിയോതി ആപത്തിം ആപന്നായോ. കമ്മവിഭങ്ഗേതി പരിവാരേ കമ്മവിഭങ്ഗേ (പരി. ൪൮൨ ആദയോ).

൪൧൩-൫. പാളിയം ദ്വേ തിസ്സോ ഭിക്ഖുനിയോതി ദ്വീഹി തീഹി ഭിക്ഖുനീഹി. ന ആരോചേന്തീതി പാതിമോക്ഖുദ്ദേസകസ്സ ന ആരോചേന്തി.

൪൧൬. ദുസ്സവേണിയാതി അനേകദുസ്സപട്ടേ ഏകതോ കത്വാ കതവേണിയാ.

൪൧൭. വിസേസകന്തി പത്തലേഖാദിവണ്ണവിസേസം. പകിണന്തീതി വിക്കിണന്തി. നമനകന്തി പാസുകട്ഠിനമനകബന്ധനം.

൪൨൨-൫. സംവേല്ലിയന്തി കച്ഛം ബന്ധിത്വാ നിവാസനം. തയോ നിസ്സയേതി രുക്ഖമൂലസേനാസനസ്സ താസം അലബ്ഭനതോ വുത്തം.

൪൨൬-൮. അട്ഠേവ ഭിക്ഖുനിയോ യഥാവുഡ്ഢം പടിബാഹന്തീതി അട്ഠ ഭിക്ഖുനിയോ വുഡ്ഢപടിപാടിയാവ ഗണ്ഹന്തിയോ ആഗതപടിപാടിം പടിബാഹന്തി, നാഞ്ഞാതി അത്ഥോ. അനുവാദം പട്ഠപേന്തീതി ഇസ്സരിയം പവത്തേന്തീതി അത്ഥം വദന്തി.

൪൩൦. ഭിക്ഖുദൂതേനാതി ഭിക്ഖുനാ ദൂതഭൂതേന. സിക്ഖമാനദൂതേനാതി സിക്ഖമാനായ ദൂതായ.

൪൩൧. ന സമ്മതീതി നപ്പഹോതി. നവകമ്മന്തി ‘‘നവകമ്മം കത്വാ വസതൂ’’തി അപലോകേത്വാ സങ്ഘികഭൂമിയാ ഓകാസദാനം.

൪൩൨-൬. സന്നിസിന്നഗബ്ഭാതി ദുവിഞ്ഞേയ്യഗബ്ഭാ. മഹിലാതിത്ഥേതി ഇത്ഥീനം സാധാരണതിത്ഥേ.

ഭിക്ഖുനീഉപസമ്പദാനുജാനനകഥാവണ്ണനാ നിട്ഠിതാ.

ഭിക്ഖുനിക്ഖന്ധകവണ്ണനാനയോ നിട്ഠിതോ.