൬. കിലേസസംയുത്തവണ്ണനാ

൩൨൨-൩൩൧. ഏസോതി ചക്ഖുസ്മിം ഛന്ദരാഗോ. ഉപേച്ച കിലേസേതീതി ഉപക്കിലേസോ. ചിത്തസ്സാതി സാമഞ്ഞവചനം അനിച്ഛന്തോ ചോദകോ ‘‘കതരചിത്തസ്സാ’’തി ആഹ. ഇതരോ കാമം ഉപതാപനമലീനഭാവകരണവസേന ഉപക്കിലേസോ ലോകുത്തരസ്സ നത്ഥി, വിബാധനട്ഠോ പന അത്ഥേവ ഉപ്പത്തിനിവാരണതോതി അധിപ്പായേനാഹ ‘‘ചതുഭൂമകചിത്തസ്സാ’’തി. ചോദകോ ‘‘തേഭൂമകാ’’തിആദിനാ അത്തനോ അധിപ്പായം വിവരതി, ഇതരോ ‘‘ഉപ്പത്തിനിവാരണതോ’’തിആദിനാ. അരിയഫലപടിപ്പസ്സദ്ധിപഹാനവസേന പവത്തിയാ സബ്ബസംകിലേസതോ നിക്ഖന്തത്താ നേക്ഖമ്മം, മഗ്ഗനിബ്ബാനാനം പന നേക്ഖമ്മഭാവോ ഉക്കംസതോ ഗഹിതോ ഏവാതി ആഹ ‘‘നേക്ഖമ്മനിന്നന്തി നവലോകുത്തരധമ്മനിന്ന’’ന്തി. അഭിജാനിത്വാതി അഭിമുഖഭാവേന ജാനിത്വാ. സച്ഛികാതബ്ബേസൂതി പച്ചക്ഖകാതബ്ബേസു. ഛളഭിഞ്ഞാധമ്മേസൂതി അരിയമഗ്ഗസമ്പയുത്തധമ്മേസു.

കിലേസസംയുത്തവണ്ണനാ നിട്ഠിതാ.