൧൧. വലാഹകസംയുത്തവണ്ണനാ

൫൫൦-൬൦൬. ലോകം വാലേന്താ സംവരന്താ ഛാദേന്താ അഹന്തി പരിയേസന്തീതി വലാഹാ, ദേവപുത്താ. തേസം സമൂഹോ വലാഹകദേവകായോതി ആഹ ‘‘വലാഹകകായികാ’’തിആദി. സീതകരണവലാഹകാതി സീതഹരണവലാഹകാ. സേസപദേസൂതി ഉണ്ഹവലാഹകാദിപദേസു. ഏസേവ നയോതി ‘‘ഉണ്ഹകരണവലാഹകാ’’തിആദിനാ അത്ഥോ വേദിതബ്ബോ. ചിത്തട്ഠപനന്തി ‘‘സീതം ഹോതൂ’’തി ഏവം ചിത്തസ്സ ഉപ്പാദനം. വസ്സാനേതി വസ്സകാലേ. ഉതുസമുട്ഠാനമേവാതി പാകതികസീതമേവാതി അത്ഥോ. ഉണ്ഹേപീതി ഉണ്ഹകാലേ. അബ്ഭമണ്ഡപോതി മണ്ഡപസദിസഅബ്ഭപടലവിതാനമാഹ. അബ്ഭം ഉപ്പജ്ജതീതി തഹം തഹം പടലം ഉട്ഠഹതി. അബ്ഭേയേവാതി അബ്ഭകാലേ ഏവ, വസ്സാനേതി അത്ഥോ. അതിഅബ്ഭന്തി സതപടലസഹസ്സപടലം ഹുത്വാ അബ്ഭുട്ഠാനം. ചിത്തവേസാഖമാസേസൂതി വസന്തകാലം സന്ധായാഹ. തദാ ഹി വിദ്ധോ വിഗതവലാഹകോ ദേവോ ഭവിതും യുത്തോ. ഉത്തരദക്ഖിണാദീതി ആദി-സദ്ദേന പച്ഛിമവാതാദിം സങ്ഗണ്ഹാതി. പകതിവാതോതി പകതിയാ സഭാവേന വായനകവാതോ. തം ഉതുസമുട്ഠാനമേവാതി ആഹാരൂപജീവീനം സത്താനം സാധാരണകമ്മൂപനിസ്സയഉതുസമുട്ഠാനമേവ. ഏസ നയോ ഉതുസമുട്ഠാനസീതുണ്ഹവാതേസുപി. തമ്പി ഹി ആഹാരൂപജീവീനം സത്താനം സാധാരണകമ്മൂപനിസ്സയമേവാതി.

ഗീതന്തി മേഘഗീതം. സച്ചകിരിയായാതി താദിസാനം പുരിസവിസേസാനം സച്ചാധിട്ഠാനേന. ഇദ്ധിബലേനാതി ഇദ്ധിമന്താനം ഇദ്ധിആനുഭാവേന. വിനാസമേഘേനാതി കപ്പവിനാസകമേഘേന. അഞ്ഞേനപി കണ്ഹപാപികസത്താനം പാപകമ്മപച്ചയാ ഉപ്പന്നവിനാസമേഘേന വുട്ഠേന സോ സോ ദേസോ വിനസ്സതേവ.

വലാഹകസംയുത്തവണ്ണനാ നിട്ഠിതാ.