൭. അപ്പടിവിദിതസുത്തവണ്ണനാ

൭. പവത്തിനിവത്തിതദുഭയഹേതുവിഭാഗസ്സ ധമ്മസ്സപി ചതുസച്ചന്തോഗധത്താ ആഹ ‘‘ധമ്മാതി ചതുസച്ചധമ്മാ’’തി. ചത്താരിപി ഹി അരിയസച്ചാനി ചതുസച്ചന്തോഗധാനി. അപ്പടിവിദ്ധാതി പരിഞ്ഞാഭിസമയാദിവസേന അനഭിസമിതാ. ദിട്ഠിഗതവാദേസൂതി ദിട്ഠിഗതസഞ്ഞിതേസു വാദേസു. ദിട്ഠിഗതേഹി തേ പവത്തിതാ. ഇതോ പരേസന്തി ഇതോ സാസനികേഹി പരേസം അഞ്ഞേസം. ധമ്മതായാതി സഭാവേന, സയമേവാതി അത്ഥോ. ഗച്ഛന്തീതി പവത്തന്തി ദിട്ഠിവാദം പഗ്ഗയ്ഹ തിട്ഠന്തി. പരേനാതി ദിട്ഠിഗതികേന. നീയന്തീതി ദിട്ഠിവാദസങ്ഗണ്ഹനേ ഉയ്യോജീയന്തി. തേനാഹ ‘‘തത്ഥാ’’തിആദി. പബുജ്ഝിതുന്തി പമാദനിദ്ദായ പടിബുജ്ഝിതും. പടിപദാ യഥാദേസിതസ്സ ധമ്മസ്സ കഥിതതായ, പടിബുജ്ഝിതും യോനിസോ പവത്തിയമാനത്താ ഭദ്ദികാ.

ഹേതുനാതി ഞായേന. കാരണേനാതി ചതുസച്ചാനം സമ്ബോധയുത്തിയാ. ഹത്ഥതലേ ആമലകം വിയ സബ്ബം ഞേയ്യം ജാനാതീതി സബ്ബഞ്ഞൂ, തേനേവ സബ്ബഞ്ഞുതാഭിസമ്ബോധേന ബുദ്ധോതി സബ്ബഞ്ഞുബുദ്ധോ. പച്ചേകം പരേഹി അസാധാരണതായ വിസും സയമ്ഭുഞാണേന സച്ചാനി ബുദ്ധവാതി പച്ചേകബുദ്ധോ. പരോപദേസേന ചതുസച്ചം ബുജ്ഝതീതി ചതുസച്ചബുദ്ധോ. തഥാ ഹി സോ സയമ്ഭുതായ അഭാവതോ കേവലം ചതുസച്ചബുദ്ധോതി വുച്ചതി. സുതേന സുതമയഞാണേന ഖന്ധാദിഭേദം ഞേയ്യം ബുദ്ധവാതി സുതബുദ്ധോ. സബ്ബഞ്ഞുബുദ്ധപച്ചേകബുദ്ധേ ഠപേത്വാ അവസേസാ അഗ്ഗസാവകമഹാസാവകാപി പകതിസാവകാപി വീതരാഗാ അവസേസാ ഖീണാസവാ. തയോപി പുരിമാ വട്ടന്തി സമ്ബുദ്ധാതിആദിവചനതോ. സന്നിവസതി ഏതേനാതി സന്നിവാസോ, ചരിതം. ലോകസ്സ സന്നിവാസോ ലോകസന്നിവാസോ, തസ്മിം. കായദുച്ചരിതാദിഭേദേ വിസമേ. സതിസമ്മോസേന വിസമേ വാ സത്തനികായേ. സോ ഹി വിസമയോഗതോ വിസമോ. രാഗവിസമാദികേ വിസമേ വാ കിലേസജാതേ. തം വിസമം പഹായ തം വിസമം അജ്ഝുപേക്ഖിത്വാ സമം സദിസം യുത്തരൂപം, പുരിമകേഹി വാ സമ്ബുദ്ധേഹി സമം സദിസം ചരന്തി വത്തന്തി.

അപ്പടിവിദിതസുത്തവണ്ണനാ നിട്ഠിതാ.