൧. സപ്പിവിഞ്ഞാപനസിക്ഖാപദവണ്ണനാ

പാടിദേസനീയേസു പഠമേ സപ്പിന്തി പുബ്ബേ വുത്തവിനിച്ഛയം പാളിആഗതം (പാചി. ൧൨൩൦) ഗോസപ്പിആദിമേവ. വിഞ്ഞാപേത്വാ ഭുഞ്ജേയ്യാതി ഏത്ഥ ‘‘വിഞ്ഞത്തിയാ പടിലദ്ധം ഭുഞ്ജിസ്സാമീ’’തി ഗഹണേ ദുക്കടം, ഗഹിതസ്സ അജ്ഝോഹാരേ അജ്ഝോഹാരേ പാടിദേസനീയം.

സാവത്ഥിയം ഛബ്ബഗ്ഗിയാ ഭിക്ഖുനിയോ ആരബ്ഭ സപ്പിം വിഞ്ഞാപേത്വാ ഭുഞ്ജനവത്ഥുസ്മിം പഞ്ഞത്തം, ‘‘അഗിലാനാ’’തി അയമേത്ഥ അനുപഞ്ഞത്തി, തികപാടിദേസനീയം, ഗിലാനായ ദ്വികദുക്കടം. യാ പന ഗിലാനാ ഗിലാനസഞ്ഞാ, ഗിലാനകാലേ വാ വിഞ്ഞാപേത്വാ പച്ഛാ അഗിലാനാ ഹുത്വാ ഭുഞ്ജതി, ഗിലാനായ വാ സേസകം, ഞാതകപ്പവാരിതട്ഠാനതോ വാ വിഞ്ഞത്തം, അഞ്ഞസ്സ വാ അത്ഥായ, അത്തനോ വാ ധനേന ഗഹിതം ഭുഞ്ജതി, തസ്സാ, ഉമ്മത്തികാദീനഞ്ച അനാപത്തി. വുത്തലക്ഖണസപ്പിതാ, അനുഞ്ഞാതകാരണാഭാവോ, വിഞ്ഞത്തി, അജ്ഝോഹാരോതി ഇമാനേത്ഥ ചത്താരി അങ്ഗാനി. സമുട്ഠാനാദീനി അദ്ധാനസദിസാനീതി.

സപ്പിവിഞ്ഞാപനസിക്ഖാപദവണ്ണനാ നിട്ഠിതാ.