൨൨. ദ്വാവീസതിമോ പരിച്ഛേദോ

ഞാണദസ്സനവിസുദ്ധിനിദ്ദേസവണ്ണനാ

൧൩൧൯-൨൨. ആവജ്ജനസ്സ ഹിതം ആവജ്ജനിയം, തം ഠാനം ഏതസ്സാതി ആവജ്ജനിയഠാനം, ഗോത്രഭൂതി അത്ഥോ. തം ഗോത്രഭുചിത്തം മഗ്ഗചിത്തസ്സ ആവജ്ജനിയഠാനത്താ. പടിപദാഞാണദസ്സനം കുദാചനം ന ച ഭജതി, തഥേവ ഞാണദസ്സനവിസുദ്ധിം കുദാചനം ന ഭജതേവ. ഉഭിന്നം ഞാണാനം അന്തരാ ഏകം അബ്ബോഹാരികം വോഹാരേ നിയുത്തന്തി വോഹാരികം, ന വോഹാരികം അബ്ബോഹാരികം. വിപസ്സനായ സോതസ്മിം വിപസ്സനായ സോതേ പതിതത്താ വിപസ്സനാ നാമ വോഹരിതബ്ബാ. തതോ നിബ്ബാനതോ.

൧൩൨൫. സൂരം തിക്ഖം വിപസ്സനന്തി ഗോത്രഭുചിത്തം സന്ധായാഹ.

൧൩൨൬-൯. വിസങ്ഖാരന്തി സങ്ഖാരേഹി വിഗതം. പഠമാവജ്ജനഞ്ചേവാതി പഠമാവജ്ജനം വിയ. പഠമാഭോഗതാപി ചാതി പഠമമനസികാരാ വിയ. മഗ്ഗസ്സ അനന്തരാദീഹി പച്ചയേഹി. തസ്സാതി മഗ്ഗസ്സ. സിഖാപത്തായ തായ വിപസ്സനായ മുദ്ധമ്ഹി മത്ഥകേ. അനാവത്തന്തി അനിവത്തം.

൧൩൩൦-൩. ഏകേന ആവജ്ജനേന ഏകിസ്സായേവ വീഥിയാ. അനുലോമഗോത്രഭുചേതസന്തി അനുലോമഗോത്രഭുചിത്താനം നാനാരമ്മണതാ വുത്താ. തം ഗോത്രഭുചിത്തം അനാവജ്ജനമ്പി മഗ്ഗസ്സ ആവജ്ജനട്ഠാനേ ഠത്വാ. സഞ്ഞം ദത്വാ വിയാതി ‘‘അഹം നിബ്ബാനം ആരമ്മണം കരോമി, ത്വമ്പി തമേവാരമ്മണം കരോഹി’’ ഇതി സഞ്ഞം ദത്വാ വിയാതി അധിപ്പായോ. സഞ്ഞിതന്തി സഞ്ഞം. കദാചിപി അനിബ്ബിദ്ധപുബ്ബം മഗ്ഗോ ഏസ ഏസോ മഗ്ഗോ പുബ്ബേ അനിബ്ബിദ്ധപുബ്ബോ.

൧൩൩൬. ഉജ്ഝതീതി ഛിന്ദതി.

൧൩൩൮. അനേകേസം ആനിസംസാനം ദായകേന ആദിമഗ്ഗേന സംയുത്തം. പഠമമഗ്ഗഞാണം.

൧൩൪൧. ഏകസ്സാസേവനം നത്ഥി ഏകസ്സ ചിത്തുപ്പാദസ്സ ആസേവനപച്ചയോ നത്ഥി, തസ്മാ കാരണാ ദ്വേ ചിത്തുപ്പാദാ അനുലോമകാ. തേഹീതി ചിത്തുപ്പാദേഹി ആസേവനപച്ചയം ലദ്ധാ ലഭിത്വാ തതിയം ചിത്തം ഗോത്രഭു ഹോതി.

൧൩൪൫-൭. മഗ്ഗപേക്ഖനഹേതു യസ്സ ആവജ്ജനമനസോ, തം മഗ്ഗപേക്ഖനഹേതുകം. തസ്മിം നിരുദ്ധേതി തസ്മിം ആവജ്ജനചിത്തേ നിരുദ്ധേ മഗ്ഗസ്സ പച്ചവേക്ഖണസഞ്ഞിതാനി സത്ത ജവനാനി പടിപാടിയാ ജായന്തേ. പച്ചവേക്ഖണഞാണാനി ഏകൂനവീസതി ഹോന്തി.

൧൩൫൧. തതോ തദാ വിപസ്സനാവീഥിം ഓതരതി. ദുതിയമഗ്ഗഞാണം.

൧൩൬൧. മൂലഘാതന്തി മൂലഘാതനം. തതിയമഗ്ഗഞാണം.

൧൩൬൩. അനാവത്തിസഭാവതോതി അനിവത്തതോ. ചതുത്ഥമഗ്ഗഞാണം.

ഇതി അഭിധമ്മാവതാരടീകായ

ഞാണദസ്സനവിസുദ്ധിനിദ്ദേസവണ്ണനാ നിട്ഠിതാ.

ദ്വാവീസതിമോ പരിച്ഛേദോ.