൧൦. ഖന്ധസുത്തം

൩൧൧. സാവത്ഥിനിദാനം. ‘‘രൂപം, ഭിക്ഖവേ, അനിച്ചം വിപരിണാമി അഞ്ഞഥാഭാവി; വേദനാ അനിച്ചാ വിപരിണാമീ അഞ്ഞഥാഭാവീ; സഞ്ഞാ… സങ്ഖാരാ അനിച്ചാ വിപരിണാമിനോ അഞ്ഞഥാഭാവിനോ; വിഞ്ഞാണം അനിച്ചം വിപരിണാമി അഞ്ഞഥാഭാവി. യോ, ഭിക്ഖവേ, ഇമേ ധമ്മേ ഏവം സദ്ദഹതി അധിമുച്ചതി, അയം വുച്ചതി സദ്ധാനുസാരീ, ഓക്കന്തോ സമ്മത്തനിയാമം, സപ്പുരിസഭൂമിം ഓക്കന്തോ, വീതിവത്തോ പുഥുജ്ജനഭൂമിം; അഭബ്ബോ തം കമ്മം കാതും, യം കമ്മം കത്വാ നിരയം വാ തിരച്ഛാനയോനിം വാ പേത്തിവിസയം വാ ഉപപജ്ജേയ്യ; അഭബ്ബോ ച താവ കാലം കാതും യാവ ന സോതാപത്തിഫലം സച്ഛികരോതി’’.

‘‘യസ്സ ഖോ, ഭിക്ഖവേ, ഇമേ ധമ്മാ ഏവം പഞ്ഞായ മത്തസോ നിജ്ഝാനം ഖമന്തി, അയം വുച്ചതി – ‘ധമ്മാനുസാരീ, ഓക്കന്തോ സമ്മത്തനിയാമം, സപ്പുരിസഭൂമിം ഓക്കന്തോ, വീതിവത്തോ പുഥുജ്ജനഭൂമിം; അഭബ്ബോ തം കമ്മം കാതും, യം കമ്മം കത്വാ നിരയം വാ തിരച്ഛാനയോനിം വാ പേത്തിവിസയം വാ ഉപപജ്ജേയ്യ; അഭബ്ബോ ച താവ കാലം കാതും യാവ ന സോതാപത്തിഫലം സച്ഛികരോതി’. യോ, ഭിക്ഖവേ, ഇമേ ധമ്മേ ഏവം പജാനാതി ഏവം പസ്സതി, അയം വുച്ചതി – ‘സോതാപന്നോ അവിനിപാതധമ്മോ നിയതോ സമ്ബോധിപരായനോ’’’തി. ദസമം.

ഓക്കന്തസംയുത്തം [ഓക്കന്തികസംയുത്തം (പീ. ക.)] സമത്തം.