൧൫. ഉത്തരാവിമാനവത്ഥു

൧൨൪. ‘‘അഭിക്കന്തേന വണ്ണേന, യാ ത്വം തിട്ഠസി ദേവതേ;

ഓഭാസേന്തീ ദിസാ സബ്ബാ, ഓസധീ വിയ താരകാ.

൧൨൫. ‘‘കേന തേതാദിസോ വണ്ണോ, കേന തേ ഇധ മിജ്ഝതി;

ഉപ്പജ്ജന്തി ച തേ ഭോഗാ, യേ കേചി മനസോ പിയാ.

൧൨൬. ‘‘പുച്ഛാമി തം ദേവി മഹാനുഭാവേ, മനുസ്സഭൂതാ കിമകാസി പുഞ്ഞം;

കേനാസി ഏവം ജലിതാനുഭാവാ, വണ്ണോ ച തേ സബ്ബദിസാ പഭാസതീ’’തി.

൧൨൭. സാ ദേവതാ അത്തമനാ, മോഗ്ഗല്ലാനേന പുച്ഛിതാ;

പഞ്ഹം പുട്ഠാ വിയാകാസി, യസ്സ കമ്മസ്സിദം ഫലം.

൧൨൮. ‘‘ഇസ്സാ ച മച്ഛേരമഥോ [മച്ഛരിയമഥോ ച (ക.)] പളാസോ, നാഹോസി മയ്ഹം ഘരമാവസന്തിയാ;

അക്കോധനാ ഭത്തുവസാനുവത്തിനീ, ഉപോസഥേ നിച്ചഹമപ്പമത്താ.

൧൨൯. ‘‘ചാതുദ്ദസിം പഞ്ചദസിം, യാ ച [യാവ (സീ. അട്ഠ., ക. അട്ഠ.) ഥേരീഗാഥാഅട്ഠകഥാ പസ്സിതബ്ബാ] പക്ഖസ്സ അട്ഠമീ;

പാടിഹാരിയപക്ഖഞ്ച, അട്ഠങ്ഗസുസമാഗതം.

൧൩൦. ‘‘ഉപോസഥം ഉപവസിസ്സം, സദാ സീലേസു സംവുതാ;

സഞ്ഞമാ സംവിഭാഗാ ച, വിമാനം ആവസാമഹം [ആവസാമിമം (സീ. അട്ഠ., ക.) പരതോ പന സബ്ബത്ഥപി ‘‘ആവസാമഹം’’ ഇച്ചേവ ദിസ്സതി].

൧൩൧. ‘‘പാണാതിപാതാ വിരതാ, മുസാവാദാ ച സഞ്ഞതാ;

ഥേയ്യാ ച അതിചാരാ ച, മജ്ജപാനാ ച ആരകാ [ആരതാ (?)].

൧൩൨. ‘‘പഞ്ചസിക്ഖാപദേ രതാ, അരിയസച്ചാന കോവിദാ;

ഉപാസികാ ചക്ഖുമതോ, ഗോതമസ്സ യസസ്സിനോ.

൧൩൩. ‘‘സാഹം സകേന സീലേന, യസസാ ച യസസ്സിനീ;

അനുഭോമി സകം പുഞ്ഞം, സുഖിതാ ചമ്ഹിനാമയാ.

൧൩൪. ‘‘തേന മേതാദിസോ വണ്ണോ, തേന മേ ഇധ മിജ്ഝതി;

ഉപ്പജ്ജന്തി ച മേ ഭോഗാ, യേ കേചി മനസോ പിയാ.

൧൩൫. ‘‘അക്ഖാമി തേ ഭിക്ഖു മഹാനുഭാവ, മനുസ്സഭൂതാ യമഹം അകാസിം;

തേനമ്ഹി ഏവം ജലിതാനുഭാവാ, വണ്ണോ ച മേ സബ്ബദിസാ പഭാസതീതി.

൧൩൬. ‘‘മമ ച, ഭന്തേ, വചനേന ഭഗവതോ പാദേ സിരസാ വന്ദേയ്യാസി – ‘ഉത്തരാ നാമ, ഭന്തേ, ഉപാസികാ ഭഗവതോ പാദേ സിരസാ വന്ദതീ’തി. അനച്ഛരിയം ഖോ പനേതം, ഭന്തേ, യം മം ഭഗവാ അഞ്ഞതരസ്മിം സാമഞ്ഞഫലേ ബ്യാകരേയ്യ [ബ്യാകരേയ്യാതി (?)], തം ഭഗവാ സകദാഗാമിഫലേ ബ്യാകാസീ’’തി.

ഉത്തരാവിമാനം പന്നരസമം.