൧. ഏകൂപോസഥികാഥേരീഅപദാനം

൧. ‘‘നഗരേ ബന്ധുമതിയാ, ബന്ധുമാ നാമ ഖത്തിയോ;

ദിവസേ പുണ്ണമായ സോ, ഉപവസി ഉപോസഥം.

൨. ‘‘അഹം തേന സമയേന, കുമ്ഭദാസീ അഹം തഹിം;

ദിസ്വാ സരാജകം സേനം, ഏവാഹം ചിന്തയിം തദാ.

൩. ‘രാജാപി രജ്ജം ഛഡ്ഡേത്വാ, ഉപവസി ഉപോസഥം;

സഫലം നൂന തം കമ്മം, ജനകായോ പമോദിതോ’.

൪. ‘‘യോനിസോ പച്ചവേക്ഖിത്വാ, ദുഗ്ഗച്ചഞ്ച [ദുഗ്ഗതിഞ്ച (സ്യാ.)] ദലിദ്ദതം [ദളിദ്ദതം (സീ.)];

മാനസം സമ്പഹംസിത്വാ, ഉപവസിം ഉപോസഥം.

൫. ‘‘അഹം ഉപോസഥം കത്വാ, സമ്മാസമ്ബുദ്ധസാസനേ;

തേന കമ്മേന സുകതേന, താവതിംസമഗച്ഛഹം.

൬. ‘‘തത്ഥ മേ സുകതം ബ്യമ്ഹം, ഉബ്ഭയോജനമുഗ്ഗതം [ഉദ്ധം യോജനമുഗ്ഗതം (സീ. സ്യാ. പീ.)];

കൂടാഗാരവരൂപേതം, മഹാസനസുഭൂസിതം.

൭. ‘‘അച്ഛരാ സതസഹസ്സാ, ഉപതിട്ഠന്തി മം സദാ;

അഞ്ഞേ ദേവേ അതിക്കമ്മ, അതിരോചാമി സബ്ബദാ.

൮. ‘‘ചതുസട്ഠി ദേവരാജൂനം, മഹേസിത്തമകാരയിം;

തേസട്ഠി ചക്കവത്തീനം, മഹേസിത്തമകാരയിം.

൯. ‘‘സുവണ്ണവണ്ണാ ഹുത്വാന, ഭവേസു സംസരാമഹം;

സബ്ബത്ഥ പവരാ ഹോമി, ഉപോസഥസ്സിദം ഫലം.

൧൦. ‘‘ഹത്ഥിയാനം അസ്സയാനം, രഥയാനഞ്ച സീവികം [കേവലം (സീ. സ്യാ. പീ.)];

ലഭാമി സബ്ബമേവേതം, ഉപോസഥസ്സിദം ഫലം.

൧൧. ‘‘സോണ്ണമയം രൂപിമയം, അഥോപി ഫലികാമയം;

ലോഹിതങ്ഗമയഞ്ചേവ, സബ്ബം പടിലഭാമഹം.

൧൨. ‘‘കോസേയ്യകമ്ബലിയാനി, ഖോമകപ്പാസികാനി ച;

മഹഗ്ഘാനി ച വത്ഥാനി, സബ്ബം പടിലഭാമഹം.

൧൩. ‘‘അന്നം പാനം ഖാദനീയം, വത്ഥസേനാസനാനി ച;

സബ്ബമേതം പടിലഭേ, ഉപോസഥസ്സിദം ഫലം.

൧൪. ‘‘വരഗന്ധഞ്ച മാലഞ്ച, ചുണ്ണകഞ്ച വിലേപനം;

സബ്ബമേതം പടിലഭേ, ഉപോസഥസ്സിദം ഫലം.

൧൫. ‘‘കൂടാഗാരഞ്ച പാസാദം, മണ്ഡപം ഹമ്മിയം ഗുഹം;

സബ്ബമേതം പടിലഭേ, ഉപോസഥസ്സിദം ഫലം.

൧൬. ‘‘ജാതിയാ സത്തവസ്സാഹം, പബ്ബജിം അനഗാരിയം;

അഡ്ഢമാസേ അസമ്പത്തേ, അരഹത്തമപാപുണിം.

൧൭. ‘‘കിലേസാ ഝാപിതാ മയ്ഹം, ഭവാ സബ്ബേ സമൂഹതാ;

സബ്ബാസവപരിക്ഖീണാ, നത്ഥി ദാനി പുനബ്ഭവോ.

൧൮. ‘‘ഏകനവുതിതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, ഉപോസഥസ്സിദം ഫലം.

൧൯. ‘‘കിലേസാ ഝാപിതാ മയ്ഹം…പേ… വിഹരാമി അനാസവാ.

൨൦. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ഏകൂപോസഥികാ ഭിക്ഖുനീ ഇമാ ഗാഥായോ അഭാസിത്ഥാതി.

ഏകൂപോസഥികാഥേരിയാപദാനം പഠമം.