൪൩. പദേസവിഹാരഞാണനിദ്ദേസോ

൯൪. കഥം സമോദഹനേ പഞ്ഞാ പദേസവിഹാരേ ഞാണം? മിച്ഛാദിട്ഠിപച്ചയാപി വേദയിതം, മിച്ഛാദിട്ഠിവൂപസമപച്ചയാപി വേദയിതം. സമ്മാദിട്ഠിപച്ചയാപി വേദയിതം, സമ്മാദിട്ഠിവൂപസമപച്ചയാപി വേദയിതം. മിച്ഛാസങ്കപ്പപച്ചയാപി വേദയിതം, മിച്ഛാസങ്കപ്പവൂപസമപച്ചയാപി വേദയിതം. സമ്മാസങ്കപ്പപച്ചയാപി വേദയിതം, സമ്മാസങ്കപ്പവൂപസമപച്ചയാപി വേദയിതം…പേ… മിച്ഛാവിമുത്തിപച്ചയാപി വേദയിതം, മിച്ഛാവിമുത്തിവൂപസമപച്ചയാപി വേദയിതം. സമ്മാവിമുത്തിപച്ചയാപി വേദയിതം, സമ്മാവിമുത്തിവൂപസമപച്ചയാപി വേദയിതം. ഛന്ദപച്ചയാപി വേദയിതം, ഛന്ദവൂപസമപച്ചയാപി വേദയിതം. വിതക്കപച്ചയാപി വേദയിതം, വിതക്കവൂപസമപച്ചയാപി വേദയിതം. സഞ്ഞാപച്ചയാപി വേദയിതം, സഞ്ഞാവൂപസമപച്ചയാപി വേദയിതം.

ഛന്ദോ ച അവൂപസന്തോ ഹോതി, വിതക്കോ ച അവൂപസന്തോ ഹോതി, സഞ്ഞാ ച അവൂപസന്താ ഹോതി, തപ്പച്ചയാപി വേദയിതം. ഛന്ദോ ച വൂപസന്തോ ഹോതി, വിതക്കോ ച അവൂപസന്തോ ഹോതി, സഞ്ഞാ ച അവൂപസന്താ ഹോതി, തപ്പച്ചയാപി വേദയിതം. ഛന്ദോ ച വൂപസന്തോ ഹോതി, വിതക്കോ ച വൂപസന്തോ ഹോതി, സഞ്ഞാ ച അവൂപസന്താ ഹോതി, തപ്പച്ചയാപി വേദയിതം. ഛന്ദോ ച വൂപസന്തോ ഹോതി, വിതക്കോ ച വൂപസന്തോ ഹോതി, സഞ്ഞാ ച വൂപസന്താ ഹോതി, തപ്പച്ചയാപി വേദയിതം. അപ്പത്തസ്സ പത്തിയാ അത്ഥി ആസവം, തസ്മിമ്പി ഠാനേ അനുപ്പത്തേ തപ്പച്ചയാപി വേദയിതം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘സമോദഹനേ പഞ്ഞാ പദേസവിഹാരേ ഞാണം’’.

പദേസവിഹാരഞാണനിദ്ദേസോ തേചത്താലീസമോ.