൪൦. ദസ്സനവിസുദ്ധിഞാണനിദ്ദേസോ

൯൧. കഥം സബ്ബധമ്മാനം ഏകസങ്ഗഹതാനാനത്തേകത്തപടിവേധേ പഞ്ഞാ ദസ്സനവിസുദ്ധിഞാണം? സബ്ബധമ്മാനന്തി പഞ്ചക്ഖന്ധാ…പേ… അപരിയാപന്നാ ധമ്മാ.

ഏകസങ്ഗഹതാതി ദ്വാദസഹി ആകാരേഹി സബ്ബേ ധമ്മാ ഏകസങ്ഗഹിതാ. തഥട്ഠേന, അനത്തട്ഠേന, സച്ചട്ഠേന, പടിവേധട്ഠേന, അഭിജാനനട്ഠേന, പരിജാനനട്ഠേന, ധമ്മട്ഠേന, ധാതുട്ഠേന, ഞാതട്ഠേന, സച്ഛികിരിയട്ഠേന, ഫുസനട്ഠേന, അഭിസമയട്ഠേന – ഇമേഹി ദ്വാദസഹി ആകാരേഹി സബ്ബേ ധമ്മാ ഏകസങ്ഗഹിതാ.

നാനത്തേകത്തന്തി കാമച്ഛന്ദോ നാനത്തം, നേക്ഖമ്മം ഏകത്തം…പേ… സബ്ബകിലേസാ നാനത്തം, അരഹത്തമഗ്ഗോ ഏകത്തം.

പടിവേധേതി ദുക്ഖസച്ചം പരിഞ്ഞാപടിവേധം പടിവിജ്ഝതി. സമുദയസച്ചം പഹാനപടിവേധം പടിവിജ്ഝതി. നിരോധസച്ചം സച്ഛികിരിയാപടിവേധം പടിവിജ്ഝതി. മഗ്ഗസച്ചം ഭാവനാപടിവേധം പടിവിജ്ഝതി.

ദസ്സനവിസുദ്ധീതി സോതാപത്തിമഗ്ഗക്ഖണേ ദസ്സനം വിസുജ്ഝതി; സോതാപത്തിഫലക്ഖണേ ദസ്സനം വിസുദ്ധം. സകദാഗാമിമഗ്ഗക്ഖണേ ദസ്സനം വിസുജ്ഝതി; സകദാഗാമിഫലക്ഖണേ ദസ്സനം വിസുദ്ധം. അനാഗാമിമഗ്ഗക്ഖണേ ദസ്സനം വിസുജ്ഝതി; അനാഗാമിഫലക്ഖണേ ദസ്സനം വിസുദ്ധം. അരഹത്തമഗ്ഗക്ഖണേ ദസ്സനം വിസുജ്ഝതി; അരഹത്തഫലക്ഖണേ ദസ്സനം വിസുദ്ധം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘സബ്ബധമ്മാനം ഏകസങ്ഗഹതാനാനത്തേകത്തപടിവേധേ പഞ്ഞാ ദസ്സനവിസുദ്ധിഞാണം’’.

ദസ്സനവിസുദ്ധിഞാണനിദ്ദേസോ ചത്താലീസമോ.