൨൯-൩൧. ഞാണത്തയനിദ്ദേസോ

൭൮. കഥം വിഹാരനാനത്തേ പഞ്ഞാ വിഹാരട്ഠേ ഞാണം, സമാപത്തിനാനത്തേ പഞ്ഞാ സമാപത്തട്ഠേ ഞാണം, വിഹാരസമാപത്തിനാനത്തേ പഞ്ഞാ വിഹാരസമാപത്തട്ഠേ ഞാണം? നിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി – അനിമിത്തോ വിഹാരോ. പണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി – അപ്പണിഹിതോ വിഹാരോ. അഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി – സുഞ്ഞതോ വിഹാരോ.

നിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്താ സമാപത്തി. പണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതാ സമാപത്തി. അഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതാ സമാപത്തി.

നിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്തവിഹാരസമാപത്തി. പണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതവിഹാരസമാപത്തി. അഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതവിഹാരസമാപത്തി.

൭൯. രൂപനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി – അനിമിത്തോ വിഹാരോ. രൂപപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി – അപ്പണിഹിതോ വിഹാരോ. രൂപാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി – സുഞ്ഞതോ വിഹാരോ.

രൂപനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്താ സമാപത്തി. രൂപപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതാ സമാപത്തി. രൂപാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതാ സമാപത്തി.

രൂപനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്തവിഹാരസമാപത്തി. രൂപപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതവിഹാരസമാപത്തി. രൂപാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതവിഹാരസമാപത്തി.

വേദനാനിമിത്തം …പേ… സഞ്ഞാനിമിത്തം… സങ്ഖാരനിമിത്തം… വിഞ്ഞാണനിമിത്തം… ചക്ഖുനിമിത്തം…പേ… ജരാമരണനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി – അനിമിത്തോ വിഹാരോ. ജരാമരണപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി – അപ്പണിഹിതോ വിഹാരോ. ജരാമരണാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി – സുഞ്ഞതോ വിഹാരോ.

ജരാമരണനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്താ സമാപത്തി. ജരാമരണപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതാ സമാപത്തി. ജരാമരണാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതാ സമാപത്തി.

ജരാമരണനിമിത്തം ഭയതോ സമ്പസ്സമാനോ അനിമിത്തേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അനിമിത്തം ആവജ്ജിത്വാ സമാപജ്ജതി – അനിമിത്തവിഹാരസമാപത്തി. ജരാമരണപണിധിം ഭയതോ സമ്പസ്സമാനോ അപ്പണിഹിതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം അപ്പണിഹിതം ആവജ്ജിത്വാ സമാപജ്ജതി – അപ്പണിഹിതവിഹാരസമാപത്തി. ജരാമരണാഭിനിവേസം ഭയതോ സമ്പസ്സമാനോ സുഞ്ഞതേ അധിമുത്തത്താ ഫുസ്സ ഫുസ്സ വയം പസ്സതി, പവത്തം അജ്ഝുപേക്ഖിത്വാ നിരോധം നിബ്ബാനം സുഞ്ഞതം ആവജ്ജിത്വാ സമാപജ്ജതി – സുഞ്ഞതവിഹാരസമാപത്തി. അഞ്ഞോ അനിമിത്തോ വിഹാരോ, അഞ്ഞോ അപ്പണിഹിതോ വിഹാരോ, അഞ്ഞോ സുഞ്ഞതോ വിഹാരോ. അഞ്ഞാ അനിമിത്തസമാപത്തി, അഞ്ഞാ അപ്പണിഹിതസമാപത്തി, അഞ്ഞാ സുഞ്ഞതസമാപത്തി. അഞ്ഞാ അനിമിത്താ വിഹാരസമാപത്തി, അഞ്ഞാ അപ്പണിഹിതാ വിഹാരസമാപത്തി, അഞ്ഞാ സുഞ്ഞതാ വിഹാരസമാപത്തി. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘വിഹാരനാനത്തേ പഞ്ഞാ വിഹാരട്ഠേ ഞാണം, സമാപത്തിനാനത്തേ പഞ്ഞാ സമാപത്തട്ഠേ ഞാണം, വിഹാരസമാപത്തിനാനത്തേ പഞ്ഞാ വിഹാരസമാപത്തട്ഠേ ഞാണം’’.

ഞാണത്തയനിദ്ദേസോ ഏകതിംസതിമോ.