൧൩. വിമുത്തിഞാണനിദ്ദേസോ

൬൪. കഥം ഛിന്നവടുമാനുപസ്സനേ പഞ്ഞാ വിമുത്തിഞാണം? സോതാപത്തിമഗ്ഗേന സക്കായദിട്ഠി, വിചികിച്ഛാ, സീലബ്ബതപരാമാസോ, ദിട്ഠാനുസയോ, വിചികിച്ഛാനുസയോ അത്തനോ ചിത്തസ്സ ഉപക്കിലേസാ സമ്മാ സമുച്ഛിന്നാ ഹോന്തി. ഇമേഹി പഞ്ചഹി ഉപക്കിലേസേഹി സപരിയുട്ഠാനേഹി ചിത്തം വിമുത്തം ഹോതി സുവിമുത്തം. തംവിമുത്തി ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘ഛിന്നവടുമാനുപസ്സനേ പഞ്ഞാ വിമുത്തിഞാണം’’.

സകദാഗാമിമഗ്ഗേന ഓളാരികം കാമരാഗസഞ്ഞോജനം, പടിഘസഞ്ഞോജനം, ഓളാരികോ കാമരാഗാനുസയോ, പടിഘാനുസയോ – അത്തനോ ചിത്തസ്സ ഉപക്കിലേസാ സമ്മാ സമുച്ഛിന്നാ ഹോന്തി. ഇമേഹി ചതൂഹി ഉപക്കിലേസേഹി സപരിയുട്ഠാനേഹി ചിത്തം വിമുത്തം ഹോതി സുവിമുത്തം. തംവിമുത്തി ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘ഛിന്നവടുമാനുപസ്സനേ പഞ്ഞാ വിമുത്തിഞാണം’’.

അനാഗാമിമഗ്ഗേന അനുസഹഗതം കാമരാഗസഞ്ഞോജനം, പടിഘസഞ്ഞോജനം, അനുസഹഗതോ കാമരാഗാനുസയോ, പടിഘാനുസയോ – അത്തനോ ചിത്തസ്സ ഉപക്കിലേസാ സമ്മാ സമുച്ഛിന്നാ ഹോന്തി. ഇമേഹി ചതൂഹി ഉപക്കിലേസേഹി സപരിയുട്ഠാനേഹി ചിത്തം വിമുത്തം ഹോതി സുവിമുത്തം. തംവിമുത്തി ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘ഛിന്നവടുമാനുപസ്സനേ പഞ്ഞാ വിമുത്തിഞാണം’’.

അരഹത്തമഗ്ഗേന രൂപരാഗോ, അരൂപരാഗോ, മാനോ, ഉദ്ധച്ചം, അവിജ്ജാ, മാനാനുസയോ, ഭവരാഗാനുസയോ, അവിജ്ജാനുസയോ – അത്തനോ ചിത്തസ്സ ഉപക്കിലേസാ സമ്മാ സമുച്ഛിന്നാ ഹോന്തി. ഇമേഹി അട്ഠഹി ഉപക്കിലേസേഹി സപരിയുട്ഠാനേഹി ചിത്തം വിമുത്തം ഹോതി സുവിമുത്തം. തംവിമുത്തി ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘ഛിന്നവടുമാനുപസ്സനേ പഞ്ഞാ വിമുത്തിഞാണം’’. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘ഛിന്നവടുമാനുപസ്സനേ പഞ്ഞാ വിമുത്തിഞാണം’’.

വിമുത്തിഞാണനിദ്ദേസോ തേരസമോ.