൪൬൨. സംവരജാതകം (൮)

൯൭. ജാനന്തോ നോ മഹാരാജ, തവ സീലം ജനാധിപോ;

ഇമേ കുമാരേ പൂജേന്തോ, ന തം കേനചി മഞ്ഞഥ.

൯൮. തിട്ഠന്തേ നോ മഹാരാജേ, അദു [ആദു (സീ. പീ.), ആദൂ (സ്യാ.)] ദേവേ ദിവങ്ഗതേ;

ഞാതീ തം സമനുഞ്ഞിംസു, സമ്പസ്സം അത്ഥമത്തനോ.

൯൯. കേന സംവരവത്തേന, സഞ്ജാതേ അഭിതിട്ഠസി;

കേന തം നാതിവത്തന്തി, ഞാതിസങ്ഘാ സമാഗതാ.

൧൦൦. ന രാജപുത്ത ഉസൂയാമി [രാജപുത്ത നുസ്സുയ്യാമി (ക.)], സമണാനം മഹേസിനം;

സക്കച്ചം തേ നമസ്സാമി, പാദേ വന്ദാമി താദിനം.

൧൦൧. തേ മം ധമ്മഗുണേ യുത്തം, സുസ്സൂസമനുസൂയകം;

സമണാ മനുസാസന്തി [സമനുസാസന്തി (സീ. സ്യാ. പീ.)], ഇസീ ധമ്മഗുണേ രതാ.

൧൦൨. തേസാഹം വചനം സുത്വാ, സമണാനം മഹേസിനം;

ന കിഞ്ചി അതിമഞ്ഞാമി, ധമ്മേ മേ നിരതോ മനോ.

൧൦൩. ഹത്ഥാരോഹാ അനീകട്ഠാ, രഥികാ പത്തികാരകാ;

തേസം [തേസു (പീ.)] നപ്പടിബന്ധാമി, നിവിട്ഠം [നിബദ്ധം (സീ. പീ.)] ഭത്തവേതനം.

൧൦൪. മഹാമത്താ ച മേ അത്ഥി, മന്തിനോ പരിചാരകാ;

ബാരാണസിം വോഹരന്തി, ബഹുമംസസുരോദകം.

൧൦൫. അഥോപി വാണിജാ ഫീതാ, നാനാരട്ഠേഹി ആഗതാ;

തേസു മേ വിഹിതാ രക്ഖാ, ഏവം ജാനാഹുപോസഥ.

൧൦൬. ധമ്മേന കിര ഞാതീനം, രജ്ജം കാരേഹി സംവര;

മേധാവീ പണ്ഡിതോ ചാസി [ചാപി (സീ. പീ.)], അഥോപി ഞാതിനം ഹിതോ.

൧൦൭. തം തം ഞാതിപരിബ്യൂള്ഹം, നാനാരതനമോചിതം;

അമിത്താ നപ്പസഹന്തി, ഇന്ദംവ അസുരാധിപോതി.

സംവരജാതകം അട്ഠമം.