൪൫൮. ഉദയജാതകം (൪)

൩൭. ഏകാ നിസിന്നാ സുചി സഞ്ഞതൂരൂ, പാസാദമാരുയ്ഹ അനിന്ദിതങ്ഗീ;

യാചാമി തം കിന്നരനേത്തചക്ഖു, ഇമേകരത്തിം ഉഭയോ വസേമ.

൩൮. ഓകിണ്ണന്തരപരിഖം, ദള്ഹമട്ടാലകോട്ഠകം;

രക്ഖിതം ഖഗ്ഗഹത്ഥേഹി, ദുപ്പവേസമിദം പുരം.

൩൯. ദഹരസ്സ യുവിനോ ചാപി, ആഗമോ ച ന വിജ്ജതി;

അഥ കേന നു വണ്ണേന, സങ്ഗമം ഇച്ഛസേ മയാ.

൪൦. യക്ഖോഹമസ്മി കല്യാണി, ആഗതോസ്മി തവന്തികേ [തവന്തികം (സീ. പീ.)];

ത്വം മം നന്ദയ [നന്ദസ്സു (സ്യാ. ക.)] ഭദ്ദന്തേ, പുണ്ണകംസം ദദാമി തേ.

൪൧. ദേവം വ യക്ഖം അഥ വാ മനുസ്സം, ന പത്ഥയേ ഉദയമതിച്ച അഞ്ഞം;

ഗച്ഛേവ ത്വം യക്ഖ മഹാനുഭാവ, മാ ചസ്സു ഗന്ത്വാ പുനരാവജിത്ഥ.

൪൨. യാ സാ രതി ഉത്തമാ കാമഭോഗിനം, യം ഹേതു സത്താ വിസമം ചരന്തി;

മാ തം രതിം ജീയി തുവം സുചിമ്ഹി തേ, ദദാമി തേ രൂപിയം കംസപൂരം.

൪൩. നാരിം നരോ നിജ്ഝപയം ധനേന, ഉക്കംസതീ യത്ഥ കരോതി ഛന്ദം;

വിപച്ചനീകോ തവ ദേവധമ്മോ, പച്ചക്ഖതോ ഥോകതരേന ഏസി.

൪൪. ആയു ച വണ്ണോ ച [ആയും ച വണ്ണം ച (ക. സീ. പീ.)] മനുസ്സലോകേ, നിഹീയതി മനുജാനം സുഗ്ഗത്തേ;

തേനേവ വണ്ണേന ധനമ്പി തുയ്ഹം, നിഹീയതി ജിണ്ണതരാസി അജ്ജ.

൪൫. ഏവം മേ പേക്ഖമാനസ്സ, രാജപുത്തി യസസ്സിനി;

ഹായതേവ തവ [ഹായതേ വത തേ (സീ. സ്യാ. ക.), ഹായതേവ തതോ (പീ.)] വണ്ണോ, അഹോരത്താനമച്ചയേ.

൪൬. ഇമിനാവ ത്വം വയസാ, രാജപുത്തി സുമേധസേ;

ബ്രഹ്മചരിയം ചരേയ്യാസി, ഭിയ്യോ വണ്ണവതീ സിയാ.

൪൭. ദേവാ ന ജീരന്തി യഥാ മനുസ്സാ, ഗത്തേസു തേസം വലിയോ ന ഹോന്തി;

പുച്ഛാമി തം യക്ഖ മഹാനുഭാവ, കഥം നു ദേവാന [കഥം ന ദേവാനം (പീ.)] സരീരദേഹോ.

൪൮. ദേവാ ന ജീരന്തി യഥാ മനുസ്സാ, ഗത്തേസു തേസം വലിയോ ന ഹോന്തി;

സുവേ സുവേ ഭിയ്യതരോവ [ഭിയ്യതരോ ച (ക.)] തേസം, ദിബ്ബോ ച വണ്ണോ വിപുലാ ച ഭോഗാ.

൪൯. കിംസൂധ ഭീതാ ജനതാ അനേകാ, മഗ്ഗോ ച നേകായതനം പവുത്തോ;

പുച്ഛാമി തം യക്ഖ മഹാനുഭാവ, കത്ഥട്ഠിതോ പരലോകം ന ഭായേ.

൫൦. വാചം മനഞ്ച പണിധായ സമ്മാ, കായേന പാപാനി അകുബ്ബമാനോ;

ബഹുന്നപാനം ഘരമാവസന്തോ, സദ്ധോ മുദൂ സംവിഭാഗീ വദഞ്ഞൂ;

സങ്ഗാഹകോ സഖിലോ സണ്ഹവാചോ, ഏത്ഥട്ഠിതോ പരലോകം ന ഭായേ.

൫൧. അനുസാസസി മം യക്ഖ, യഥാ മാതാ യഥാ പിതാ;

ഉളാരവണ്ണം പുച്ഛാമി, കോ നു ത്വമസി സുബ്രഹാ.

൫൨. ഉദയോഹമസ്മി കല്യാണി, സങ്കരത്താ ഇധാഗതോ [സങ്ഗരത്ഥാ ഇധാഗതോ (സീ. പീ.), സങ്ഗരത്ഥായിധാഗതോ (സ്യാ.)];

ആമന്ത ഖോ തം ഗച്ഛാമി, മുത്തോസ്മി തവ സങ്കരാ [സങ്ഗരാ (സീ. സ്യാ. പീ.)].

൫൩. സചേ ഖോ ത്വം ഉദയോസി, സങ്കരത്താ ഇധാഗതോ;

അനുസാസ മം രാജപുത്ത, യഥാസ്സ പുന സങ്ഗമോ.

൫൪. അതിപതതി [അധിപതതീ (സീ. പീ.)] വയോ ഖണോ തഥേവ, ഠാനം നത്ഥി ധുവം ചവന്തി സത്താ;

പരിജിയ്യതി അദ്ധുവം സരീരം, ഉദയേ മാ പമാദ [മാ പമാദം (സീ.)] ചരസ്സു ധമ്മം.

൫൫. കസിണാ പഥവീ ധനസ്സ പൂരാ, ഏകസ്സേവ സിയാ അനഞ്ഞധേയ്യാ;

തഞ്ചാപി ജഹതി [ജഹാതി (സീ. സ്യാ. പീ.), ജഹാതീ (?)] അവീതരാഗോ, ഉദയേ മാ പമാദ ചരസ്സു ധമ്മം.

൫൬. മാതാ ച പിതാ ച ഭാതരോ ച, ഭരിയാ യാപി ധനേന ഹോതി കീതാ [ഭരിയാപി ധനേന ഹോന്തി അതിത്താ (ക.)];

തേ ചാപി ജഹന്തി അഞ്ഞമഞ്ഞം, ഉദയേ മാ പമാദ ചരസ്സു ധമ്മം.

൫൭. കായോ പരഭോജനന്തി ഞത്വാ [കായോ ച പരഭോജനം വിദിത്വാ (ക.)], സംസാരേ സുഗതിഞ്ച ദുഗ്ഗതിഞ്ച [സുഗതീ ച ദുഗ്ഗതീ ച (സീ. സ്യാ. പീ.), സുഗ്ഗതിം ദുഗ്ഗതിഞ്ച (ക.)];

ഇത്തരവാസോതി ജാനിയാന, ഉദയേ മാ പമാദ ചരസ്സു ധമ്മം.

൫൮. സാധു ഭാസതിയം [ഭാസതയം (സീ. പീ.)] യക്ഖോ, അപ്പം മച്ചാന ജീവിതം;

കസിരഞ്ച പരിത്തഞ്ച, തഞ്ച ദുക്ഖേന സംയുതം;

സാഹം ഏകാ പബ്ബജിസ്സാമി, ഹിത്വാ കാസിം സുരുന്ധനന്തി.

ഉദയജാതകം ചതുത്ഥം.