൪൪൩. ചൂളബോധിജാതകം (൫)

൪൯. യോ തേ ഇമം വിസാലക്ഖിം, പിയം സമ്ഹിതഭാസിനിം [സമ്മില്ലഭാസിനിം (സീ. പീ.), സമ്മില്ലഹാസിനിം (സ്യാ.)];

ആദായ ബലാ ഗച്ഛേയ്യ, കിം നു കയിരാസി ബ്രാഹ്മണ.

൫൦. ഉപ്പജ്ജേ [ഉപ്പജ്ജ (സീ. പീ.)] മേ ന മുച്ചേയ്യ, ന മേ മുച്ചേയ്യ ജീവതോ;

രജംവ വിപുലാ വുട്ഠി, ഖിപ്പമേവ നിവാരയേ [നിവാരയിം (ക.)].

൫൧. യം നു പുബ്ബേ വികത്ഥിത്ഥോ [വികത്ഥിതോ (ക. സീ. സ്യാ. ക.)], ബലമ്ഹിവ അപസ്സിതോ;

സ്വജ്ജ തുണ്ഹികതോ [തുണ്ഹികതോ (സീ.), തുണ്ഹിക്ഖകോ (പീ.)] ദാനി, സങ്ഘാടിം സിബ്ബമച്ഛസി.

൫൨. ഉപ്പജ്ജി മേ ന മുച്ചിത്ഥ, ന മേ മുച്ചിത്ഥ ജീവതോ;

രജംവ വിപുലാ വുട്ഠി, ഖിപ്പമേവ നിവാരയിം.

൫൩. കിം തേ ഉപ്പജ്ജി നോ മുച്ചി, കിം തേ ന മുച്ചി ജീവതോ;

രജംവ വിപുലാ വുട്ഠി, കതമം ത്വം നിവാരയി.

൫൪. യമ്ഹി ജാതേ ന പസ്സതി, അജാതേ സാധു പസ്സതി;

സോ മേ ഉപ്പജ്ജി നോ മുച്ചി, കോധോ ദുമ്മേധഗോചരോ.

൫൫. യേന ജാതേന നന്ദന്തി, അമിത്താ ദുക്ഖമേസിനോ;

സോ മേ ഉപ്പജ്ജി നോ മുച്ചി, കോധോ ദുമ്മേധഗോചരോ.

൫൬. യസ്മിഞ്ച ജായമാനമ്ഹി, സദത്ഥം നാവബുജ്ഝതി;

സോ മേ ഉപ്പജ്ജി നോ മുച്ചി, കോധോ ദുമ്മേധഗോചരോ.

൫൭. യേനാഭിഭൂതോ കുസലം ജഹാതി, പരക്കരേ വിപുലഞ്ചാപി അത്ഥം;

സ ഭീമസേനോ ബലവാ പമദ്ദീ, കോധോ മഹാരാജ ന മേ അമുച്ചഥ.

൫൮. കട്ഠസ്മിം മത്ഥമാനസ്മിം [മന്ഥമാനസ്മിം (പീ.), മദ്ദമാനസ്മിം (ക.)], പാവകോ നാമ ജായതി;

തമേവ കട്ഠം ഡഹതി, യസ്മാ സോ ജായതേ ഗിനി.

൫൯. ഏവം മന്ദസ്സ പോസസ്സ, ബാലസ്സ അവിജാനതോ;

സാരമ്ഭാ [സാരബ്ഭാ (ക.)] ജായതേ കോധോ, സോപി തേനേവ ഡയ്ഹതി.

൬൦. അഗ്ഗീവ തിണകട്ഠസ്മിം, കോധോ യസ്സ പവഡ്ഢതി;

നിഹീയതി തസ്സ യസോ, കാളപക്ഖേവ ചന്ദിമാ.

൬൧. അനേധോ [അനിന്ധോ (സീ. ക.), അനിന്ദോ (സ്യാ.)] ധൂമകേതൂവ, കോധോ യസ്സൂപസമ്മതി;

ആപൂരതി തസ്സ യസോ, സുക്കപക്ഖേവ ചന്ദിമാതി.

ചൂളബോധിജാതകം പഞ്ചമം.