൧൩. പഠമസുണിസാവിമാനവണ്ണനാ

അഭിക്കന്തേന വണ്ണേനാതി സുണിസാവിമാനം. തസ്സ കാ ഉപ്പത്തി? സാവത്ഥിയം അഞ്ഞതരസ്മിം ഗേഹേ ഏകാ കുലസുണ്ഹാ ഗേഹം പിണ്ഡായ പവിട്ഠം ഖീണാസവത്ഥേരം ദിസ്വാ സഞ്ജാതപീതിസോമനസ്സാ ‘‘ഇദം മയ്ഹം ഉത്തമം പുഞ്ഞക്ഖേത്തം ഉപട്ഠിത’’ന്തി അത്തനാ ലദ്ധം പൂവഭാഗം ആദായ ആദരേന ഥേരസ്സ ഉപനേസി, ഥേരോ തം പടിഗ്ഗഹേത്വാ അനുമോദനം കത്വാ ഗതോ. സാ അപരഭാഗേ കാലം കത്വാ താവതിംസഭവനേ ഉപ്പജ്ജി. സേസം സബ്ബം ഹേട്ഠാ വുത്തസദിസമേവ. തേന വുത്തം –

൧൦൮. ‘‘അഭിക്കന്തേന വണ്ണേന, യാ ത്വം തിട്ഠസി ദേവതേ;

ഓഭാസേന്തീ ദിസാ സബ്ബാ, ഓസധീ വിയ താരകാ.

൧൦൯. ‘‘കേന തേതാദിസോ വണ്ണോ, കേന തേ ഇധ മിജ്ഝതി;

ഉപ്പജ്ജന്തി ച തേ ഭോഗാ, യേ കേചി മനസോ പിയാ.

൧൧൦. ‘‘പുച്ഛാമി തം ദേവി മഹാനുഭാവേ, മനുസ്സഭൂതാ കിമകാസി പുഞ്ഞം;

കേനാസി ഏവം ജലിതാനുഭാവാ, വണ്ണോ ച തേ സബ്ബദിസാ പഭാസതീ’’തി.

൧൧൧. ‘‘സാ ദേവതാ അത്തമനാ, മോഗ്ഗല്ലാനേന പുച്ഛിതാ;

പഞ്ഹം പുട്ഠാ വിയാകാസി, യസ്സ കമ്മസ്സിദം ഫലം’’.

൧൧൨. ‘‘അഹം മനുസ്സേസു മനുസ്സഭൂതാ, സുണിസാ അഹോസിം സസുരസ്സ ഗേഹേ.

൧൧൩. ‘‘അദ്ദസം വിരജം ഭിക്ഖും, വിപ്പസന്നമനാവിലം;

തസ്സ അദാസഹം പൂവം, പസന്നാ സേഹി പാണിഭി;

ഭാഗഡ്ഢഭാഗം ദത്വാന, മോദാമി നന്ദനേ വനേ.

൧൧൪. ‘‘തേന മേതാദിസോ വണ്ണോ, തേന മേ ഇധ മിജ്ഝതി;

ഉപ്പജ്ജന്തി ച മേ ഭോഗാ, യേ കേചി മനസോ പിയാ.

൧൧൫. ‘‘അക്ഖാമി തേ ഭിക്ഖു മഹാനുഭാവ, മനുസ്സഭൂതാ യമകാസി പുഞ്ഞം;

തേനമ്ഹി ഏവം ജലിതാനുഭാവാ, വണ്ണോ ച മേ സബ്ബദിസാ പഭാസതീ’’തി.

൧൧൨. തത്ഥ സുണിസാതി പുത്തസ്സ ഭരിയാ. ഇത്ഥിയാ ഹി സാമികസ്സ പിതാ ‘‘സസുരോ’’തി വുച്ചതി, തസ്സ ച സാ ‘‘സുണിസാ’’തി. തം സന്ധായ ‘‘സുണിസാ അഹോസിം സസുരസ്സ ഗേഹേ’’തി.

൧൧൩. ഭാഗഡ്ഢഭാഗന്തി അത്തനാ ലദ്ധപടിവീസതോ ഉപഡ്ഢഭാഗം. മോദാമി നന്ദനേ വനേതി ഥേരേന നന്ദനവനേ ദിട്ഠതായ ആഹ. സേസം വുത്തനയമേവ.

സുണിസാവിമാനവണ്ണനാ നിട്ഠിതാ.