൩. വിനയപേയ്യാലം

൨൦൧. ദ്വേമേ, ഭിക്ഖവേ, അത്ഥവസേ പടിച്ചാതി, ഭിക്ഖവേ, ദ്വേ അത്ഥേ നിസ്സായ ദ്വേ കാരണാനി സന്ധായ. സിക്ഖാപദം പഞ്ഞത്തന്തി സിക്ഖാകോട്ഠാസോ ഠപിതോ. സങ്ഘസുട്ഠുതായാതി സങ്ഘസ്സ സുട്ഠുഭാവായ, ‘‘സുട്ഠു, ഭന്തേ’’തി വത്വാ സമ്പടിച്ഛനത്ഥായാതി അത്ഥോ. സങ്ഘഫാസുതായാതി സങ്ഘസ്സ ഫാസുവിഹാരത്ഥായ. ദുമ്മങ്കൂനന്തി ദുസ്സീലാനം. പേസലാനന്തി പീയസീലാനം. ദിട്ഠധമ്മികാനം ആസവാനന്തി ദിട്ഠധമ്മേ ഇമസ്മിംയേവ അത്തഭാവേ വീതിക്കമപച്ചയാ പടിലദ്ധബ്ബാനം വധബന്ധനാദിദുക്ഖധമ്മസങ്ഖാതാനം ആസവാനം. സംവരായാതി പിദഹനത്ഥായ. സമ്പരായികാനന്തി തഥാരൂപാനംയേവ അപായദുക്ഖസങ്ഖാതാനം സമ്പരായേ ഉപ്പജ്ജനകആസവാനം. പടിഘാതായാതി പടിസേധനത്ഥായ. വേരാനന്തി അകുസലവേരാനമ്പി പുഗ്ഗലവേരാനമ്പി. വജ്ജാനന്തി ദോസാനം. തേ ഏവ വാ ദുക്ഖധമ്മാ വജ്ജനീയത്താ ഇധ വജ്ജാതി അധിപ്പേതാ. ഭയാനന്തി ചിത്തുത്രാസഭയാനമ്പി ഭയഹേതൂനം തേസംയേവ ദുക്ഖധമ്മാനമ്പി. അകുസലാനന്തി അക്ഖമട്ഠേന അകുസലസങ്ഖാതാനം ദുക്ഖധമ്മാനം. ഗിഹീനം അനുകമ്പായാതി ഗിഹീസു ഉജ്ഝായന്തേസു പഞ്ഞത്തസിക്ഖാപദം ഗിഹീനം അനുകമ്പായ പഞ്ഞത്തം നാമ. പാപിച്ഛാനം പക്ഖുപച്ഛേദായാതി പാപിച്ഛാ പക്ഖം നിസ്സായ സങ്ഘം ഭിന്ദേയ്യുന്തി തേസം പക്ഖുപച്ഛേദനത്ഥായ. അപ്പസന്നാനം പസാദായാതി പുബ്ബേ അപ്പസന്നാനമ്പി പണ്ഡിതമനുസ്സാനം സിക്ഖാപദപഞ്ഞത്തിസമ്പദം ദിസ്വാ പസാദുപ്പത്തിഅത്ഥായ. പസന്നാനം ഭിയ്യോഭാവായാതി പസന്നാനം ഉപരൂപരിപസാദഭാവായ. സദ്ധമ്മട്ഠിതിയാതി സദ്ധമ്മസ്സ ചിരട്ഠിതത്ഥം. വിനയാനുഗ്ഗഹായാതി പഞ്ചവിധസ്സാപി വിനയസ്സ അനുഗ്ഗണ്ഹനത്ഥായ.

൨൦൨-൨൩൦. പാതിമോക്ഖം പഞ്ഞത്തന്തി ഭിക്ഖുപാതിമോക്ഖം ഭിക്ഖുനിപാതിമോക്ഖന്തി ദുവിധം പാതിമോക്ഖം പഞ്ഞത്തം. പാതിമോക്ഖുദ്ദേസോതി ഭിക്ഖൂനം പഞ്ച, ഭിക്ഖുനീനം ചത്താരോതി നവ പാതിമോക്ഖുദ്ദേസാ പഞ്ഞത്താ. പാതിമോക്ഖട്ഠപനന്തി ഉപോസഥട്ഠപനം. പവാരണാ പഞ്ഞത്താതി ചാതുദ്ദസികാ പന്നരസികാതി ദ്വേ പവാരണാ പഞ്ഞത്താ. പവാരണട്ഠപനം പഞ്ഞത്തന്തി സാപത്തികസ്സ ഭിക്ഖുനോ പവാരണാ ഉത്തിയാ വത്തമാനായ പവാരണട്ഠപനം പഞ്ഞത്തം. തജ്ജനീയകമ്മാദീസു ഭിക്ഖൂ വാചാസത്തീഹി വിതുദന്താനം പണ്ഡുകലോഹിതകാനം ഭിക്ഖൂനം തജ്ജനീയകമ്മം (ചൂളവ. ൧ ആദയോ) പഞ്ഞത്തം. ബാലസ്സ അബ്യത്തസ്സ സേയ്യസകസ്സ ഭിക്ഖുനോ നിയസ്സകമ്മം പഞ്ഞത്തം. കുലദൂസകേ അസ്സജിപുനബ്ബസുകേ ഭിക്ഖൂ ആരബ്ഭ പബ്ബാജനീയകമ്മം (ചൂളവ. ൨൧ ആദയോ) പഞ്ഞത്തം. ഗിഹീനം അക്കോസകസ്സ സുധമ്മത്ഥേരസ്സ പടിസാരണീയകമ്മം (ചൂളവ. ൩൩ ആദയോ) പഞ്ഞത്തം. ആപത്തിയാ അദസ്സനാദീസു ഉക്ഖേപനീയകമ്മം പഞ്ഞത്തം. ഗരുകാപത്തിം ആപന്നസ്സ പടിച്ഛന്നായ ആപത്തിയാ പരിവാസദാനം പഞ്ഞത്തം. പരിവാസേ അന്തരാപത്തിം ആപന്നസ്സ മൂലായ പടികസ്സനം പഞ്ഞത്തം. പടിച്ഛന്നായപി അപ്പടിച്ഛന്നായപി ആപത്തിയാ മാനത്തദാനം പഞ്ഞത്തം. ചിണ്ണമാനത്തസ്സ അബ്ഭാനം പഞ്ഞത്തം. സമ്മാ വത്തന്തസ്സ ഓസാരണീയം പഞ്ഞത്തം. അസമ്മാവത്തനാദീസു നിസ്സാരണീയം പഞ്ഞത്തം.

ഏഹിഭിക്ഖൂപസമ്പദാ സരണഗമനൂപസമ്പദാ ഓവാദൂപസമ്പദാ പഞ്ഹാബ്യാകരണൂപസമ്പദാ ഞത്തിചതുത്ഥകമ്മൂപസമ്പദാ ഗരുധമ്മൂപസമ്പദാ ഉഭതോസങ്ഘേ ഉപസമ്പദാ ദൂതേന ഉപസമ്പദാതി അട്ഠവിധാ ഉപസമ്പദാ പഞ്ഞത്താ. ഞത്തികമ്മം നവ ഠാനാനി ഗച്ഛതീതി ഏവം നവട്ഠാനികം ഞത്തികമ്മം പഞ്ഞത്തം. ഞത്തിദുതിയകമ്മം സത്ത ഠാനാനി ഗച്ഛതീതി ഏവം സത്തട്ഠാനികമേവ ഞത്തിദുതിയകമ്മം പഞ്ഞത്തം. ഞത്തിചതുത്ഥകമ്മം സത്ത ഠാനാനി ഗച്ഛതീതി ഏവം സത്തട്ഠാനികമേവ ഞത്തിചതുത്ഥകമ്മം പഞ്ഞത്തം. പഠമപാരാജികാദീനം പഠമപഞ്ഞത്തി അപഞ്ഞത്തേ പഞ്ഞത്തം. തേസംയേവ അനുപഞ്ഞത്തി പഞ്ഞത്തേ അനുപഞ്ഞത്തം. ധമ്മസമ്മുഖതാ വിനയസമ്മുഖതാ സങ്ഘസമ്മുഖതാ പുഗ്ഗലസമ്മുഖതാതി ഇമസ്സ ചതുബ്ബിധസ്സ സമ്മുഖീഭാവസ്സ വസേന സമ്മുഖാവിനയോ പഞ്ഞത്തോ. സതിവേപുല്ലപ്പത്തസ്സ ഖീണാസവസ്സ അചോദനത്ഥായ സതിവിനയോ പഞ്ഞത്തോ. ഉമ്മത്തകസ്സ ഭിക്ഖുനോ അമൂള്ഹവിനയോ പഞ്ഞത്തോ. അപ്പടിഞ്ഞായ ചുദിതകസ്സ ആപത്തിയാ അതരണത്ഥം പടിഞ്ഞാതകരണം പഞ്ഞത്തം. ബഹുതരാനം ധമ്മവാദീനം ലദ്ധിം ഗഹേത്വാ അധികരണവൂപസമനത്ഥം. യേഭുയ്യസികാ പഞ്ഞത്താ. പാപുസ്സന്നസ്സ പുഗ്ഗലസ്സ നിഗ്ഗണ്ഹനത്ഥം തസ്സപാപിയസികാ പഞ്ഞത്താ. ഭണ്ഡനാദിവസേന ബഹും അസ്സാമണകം കത്വാ ആപത്തിം ആപന്നാനം ഭിക്ഖൂനം ഠപേത്വാ ഥുല്ലവജ്ജം ഠപേത്വാ ഗിഹിപടിസംയുത്തഞ്ച അവസേസാപത്തീനം വൂപസമനത്ഥായ തിണവത്ഥാരകോ പഞ്ഞത്തോ.

വിനയപേയ്യാലം നിട്ഠിതം.