൧. പദസോധനവാരോ

(ക) അനുലോമം

൯൪. (ക) ചക്ഖു ചക്ഖുന്ദ്രിയന്തി?

ദിബ്ബചക്ഖു പഞ്ഞാചക്ഖു ചക്ഖു, ന ചക്ഖുന്ദ്രിയം. ചക്ഖുന്ദ്രിയം ചക്ഖു ചേവ ചക്ഖുന്ദ്രിയഞ്ച.

(ഖ) ചക്ഖുന്ദ്രിയം ചക്ഖൂതി? ആമന്താ.

(ക) സോതം സോതിന്ദ്രിയന്തി?

ദിബ്ബസോതം തണ്ഹാസോതം സോതം, ന സോതിന്ദ്രിയം. സോതിന്ദ്രിയം സോതഞ്ചേവ സോതിന്ദ്രിയഞ്ച.

(ഖ) സോതിന്ദ്രിയം സോതന്തി? ആമന്താ.

(ക) ഘാനം ഘാനിന്ദ്രിയന്തി? ആമന്താ.

(ഖ) ഘാനിന്ദ്രിയം ഘാനന്തി? ആമന്താ.

(ക) ജിവ്ഹാ ജിവ്ഹിന്ദ്രിയന്തി? ആമന്താ.

(ഖ) ജിവ്ഹിന്ദ്രിയം ജിവ്ഹാതി? ആമന്താ.

(ക) കായോ കായിന്ദ്രിയന്തി?

കായിന്ദ്രിയം ഠപേത്വാ അവസേസോ കായോ [അവസേസാ കായോ (സീ. സ്യാ. ക.)], ന കായിന്ദ്രിയം. കായിന്ദ്രിയം കായോ ചേവ കായിന്ദ്രിയഞ്ച.

(ഖ) കായിന്ദ്രിയം കായോതി? ആമന്താ.

(ക) മനോ മനിന്ദ്രിയന്തി? ആമന്താ.

(ഖ) മനിന്ദ്രിയം മനോതി? ആമന്താ.

(ക) ഇത്ഥീ ഇത്ഥിന്ദ്രിയന്തി? നോ.

(ഖ) ഇത്ഥിന്ദ്രിയം ഇത്ഥീതി? നോ.

(ക) പുരിസോ പുരിസിന്ദ്രിയന്തി? നോ.

(ഖ) പുരിസിന്ദ്രിയം പുരിസോതി? നോ.

(ക) ജീവിതം ജീവിതിന്ദ്രിയന്തി? ആമന്താ.

(ഖ) ജീവിതിന്ദ്രിയം ജീവിതന്തി? ആമന്താ.

(ക) സുഖം സുഖിന്ദ്രിയന്തി? ആമന്താ.

(ഖ) സുഖിന്ദ്രിയം സുഖന്തി? ആമന്താ.

(ക) ദുക്ഖം ദുക്ഖിന്ദ്രിയന്തി? ആമന്താ.

(ഖ) ദുക്ഖിന്ദ്രിയം ദുക്ഖന്തി? ആമന്താ.

(ക) സോമനസ്സം സോമനസ്സിന്ദ്രിയന്തി? ആമന്താ.

(ഖ) സോമനസ്സിന്ദ്രിയം സോമനസ്സന്തി? ആമന്താ.

(ക) ദോമനസ്സം ദോമനസ്സിന്ദ്രിയന്തി? ആമന്താ.

(ഖ) ദോമനസ്സിന്ദ്രിയം ദോമനസ്സന്തി? ആമന്താ.

(ക) ഉപേക്ഖാ ഉപേക്ഖിന്ദ്രിയന്തി?

ഉപേക്ഖിന്ദ്രിയം ഠപേത്വാ അവസേസാ ഉപേക്ഖാ, ന ഉപേക്ഖിന്ദ്രിയം. ഉപേക്ഖിന്ദ്രിയം ഉപേക്ഖാ ചേവ ഉപേക്ഖിന്ദ്രിയഞ്ച.

(ഖ) ഉപേക്ഖിന്ദ്രിയം ഉപേക്ഖാതി? ആമന്താ.

(ക) സദ്ധാ സദ്ധിന്ദ്രിയന്തി? ആമന്താ.

(ഖ) സദ്ധിന്ദ്രിയം സദ്ധാതി? ആമന്താ.

(ക) വീരിയം വീരിയിന്ദ്രിയന്തി? ആമന്താ.

(ഖ) വീരിയിന്ദ്രിയം വീരിയന്തി? ആമന്താ.

(ക) സതി സതിന്ദ്രിയന്തി? ആമന്താ.

(ഖ) സതിന്ദ്രിയം സതീതി? ആമന്താ.

(ക) സമാധി സമാധിന്ദ്രിയന്തി? ആമന്താ.

(ഖ) സമാധിന്ദ്രിയം സമാധീതി? ആമന്താ.

(ക) പഞ്ഞാ പഞ്ഞിന്ദ്രിയന്തി? ആമന്താ.

(ഖ) പഞ്ഞിന്ദ്രിയം പഞ്ഞാതി? ആമന്താ.

(ക) അനഞ്ഞാതഞ്ഞസ്സാമീതി അനഞ്ഞാതഞ്ഞസ്സാമീതിന്ദ്രിയന്തി? ആമന്താ.

(ഖ) അനഞ്ഞാതഞ്ഞസ്സാമീതിന്ദ്രിയം അനഞ്ഞാതഞ്ഞസ്സാമീതി? ആമന്താ.

(ക) അഞ്ഞം അഞ്ഞിന്ദ്രിയന്തി? ആമന്താ.

(ഖ) അഞ്ഞിന്ദ്രിയം അഞ്ഞന്തി? ആമന്താ.

(ക) അഞ്ഞാതാവീ അഞ്ഞാതാവിന്ദ്രിയന്തി? ആമന്താ.

(ഖ) അഞ്ഞാതാവിന്ദ്രിയം അഞ്ഞാതാവീതി? ആമന്താ.

(ഖ) പച്ചനീകം

൯൫. (ക) ന ചക്ഖു ന ചക്ഖുന്ദ്രിയന്തി? ആമന്താ.

(ഖ) ന ചക്ഖുന്ദ്രിയം ന ചക്ഖൂതി?

ദിബ്ബചക്ഖു പഞ്ഞാചക്ഖു ന ചക്ഖുന്ദ്രിയം, ചക്ഖു. ചക്ഖുഞ്ച ചക്ഖുന്ദ്രിയഞ്ച ഠപേത്വാ അവസേസാ ന ചേവ ചക്ഖു ന ച ചക്ഖുന്ദ്രിയം.

(ക) ന സോതം ന സോതിന്ദ്രിയന്തി? ആമന്താ.

(ഖ) ന സോതിന്ദ്രിയം ന സോതന്തി?

ദിബ്ബസോതം തണ്ഹാസോതം ന സോതിന്ദ്രിയം, സോതം. സോതഞ്ച സോതിന്ദ്രിയഞ്ച ഠപേത്വാ അവസേസാ ന ചേവ സോതം ന ച സോതിന്ദ്രിയം.

(ക) ന ഘാനം ന ഘാനിന്ദ്രിയന്തി? ആമന്താ.

(ഖ) ന ഘാനിന്ദ്രിയം ന ഘാനന്തി? ആമന്താ.

(ക) ന ജിവ്ഹാ ന ജിവ്ഹിന്ദ്രിയന്തി? ആമന്താ.

(ഖ) ന ജിവ്ഹിന്ദ്രിയം ന ജിവ്ഹാതി? ആമന്താ.

(ക) ന കായോ ന കായിന്ദ്രിയന്തി? ആമന്താ.

(ഖ) ന കായിന്ദ്രിയം ന കായോതി?

കായിന്ദ്രിയം ഠപേത്വാ അവസേസോ ന കായിന്ദ്രിയം, കായോ. കായഞ്ച കായിന്ദ്രിയഞ്ച ഠപേത്വാ അവസേസോ ന ചേവ കായോ ന ച കായിന്ദ്രിയം.

(ക) ന മനോ ന മനിന്ദ്രിയന്തി? ആമന്താ.

(ഖ) ന മനിന്ദ്രിയം ന മനോതി? ആമന്താ.

(ക) ന ഇത്ഥീ ന ഇത്ഥിന്ദ്രിയന്തി?

ഇത്ഥിന്ദ്രിയം ന ഇത്ഥീ, ഇത്ഥിന്ദ്രിയം. ഇത്ഥിഞ്ച ഇത്ഥിന്ദ്രിയഞ്ച ഠപേത്വാ അവസേസാ ന ചേവ ഇത്ഥീ ന ച ഇത്ഥിന്ദ്രിയം.

(ഖ) ന ഇത്ഥിന്ദ്രിയം ന ഇത്ഥീതി?

ഇത്ഥീ ന ഇത്ഥിന്ദ്രിയം, ഇത്ഥീ. ഇത്ഥിഞ്ച ഇത്ഥിന്ദ്രിയഞ്ച ഠപേത്വാ അവസേസാ ന ചേവ ഇത്ഥീ ന ച ഇത്ഥിന്ദ്രിയം.

(ക) ന പുരിസോ ന പുരിസിന്ദ്രിയന്തി?

പുരിസിന്ദ്രിയം ന പുരിസോ, പുരിസിന്ദ്രിയം. പുരിസഞ്ച പുരിസിന്ദ്രിയഞ്ച ഠപേത്വാ അവസേസാ ന ചേവ പുരിസോ ന ച പുരിസിന്ദ്രിയം.

(ഖ) ന പുരിസിന്ദ്രിയം ന പുരിസോതി?

പുരിസോ ന പുരിസിന്ദ്രിയം, പുരിസോ. പുരിസഞ്ച പുരിസിന്ദ്രിയഞ്ച ഠപേത്വാ അവസേസാ ന ചേവ പുരിസോ ന ച പുരിസിന്ദ്രിയം.

(ക) ന ജീവിതം ന ജീവിതിന്ദ്രിയന്തി? ആമന്താ.

(ഖ) ന ജീവിതിന്ദ്രിയം ന ജീവിതന്തി? ആമന്താ.

(ക) ന സുഖം ന സുഖിന്ദ്രിയന്തി? ആമന്താ.

(ഖ) ന സുഖിന്ദ്രിയം ന സുഖന്തി? ആമന്താ.

(ക) ന ദുക്ഖം ന ദുക്ഖിന്ദ്രിയന്തി? ആമന്താ.

(ഖ) ന ദുക്ഖിന്ദ്രിയം ന ദുക്ഖന്തി? ആമന്താ.

(ക) ന സോമനസ്സം ന സോമനസ്സിന്ദ്രിയന്തി? ആമന്താ.

(ഖ) ന സോമനസ്സിന്ദ്രിയം ന സോമനസ്സന്തി? ആമന്താ.

(ക) ന ദോമനസ്സം ന ദോമനസ്സിന്ദ്രിയന്തി? ആമന്താ.

(ഖ) ന ദോമനസ്സിന്ദ്രിയം ന ദോമനസ്സന്തി? ആമന്താ.

(ക) ന ഉപേക്ഖാ ന ഉപേക്ഖിന്ദ്രിയന്തി? ആമന്താ.

(ഖ) ന ഉപേക്ഖിന്ദ്രിയം ന ഉപേക്ഖാതി?

ഉപേക്ഖിന്ദ്രിയം ഠപേത്വാ അവസേസാ ന ഉപേക്ഖിന്ദ്രിയം, ഉപേക്ഖാ. ഉപേക്ഖഞ്ച ഉപേക്ഖിന്ദ്രിയഞ്ച ഠപേത്വാ അവസേസാ ന ചേവ ഉപേക്ഖാ ന ച ഉപേക്ഖിന്ദ്രിയം.

(ക) ന സദ്ധാ ന സദ്ധിന്ദ്രിയന്തി? ആമന്താ.

(ഖ) ന സദ്ധിന്ദ്രിയം ന സദ്ധാതി? ആമന്താ.

(ക) ന വീരിയം ന വീരിയിന്ദ്രിയന്തി? ആമന്താ.

(ഖ) ന വീരിയിന്ദ്രിയം ന വീരിയന്തി? ആമന്താ.

(ക) ന സതി ന സതിന്ദ്രിയന്തി? ആമന്താ.

(ഖ) ന സതിന്ദ്രിയം ന സതീതി? ആമന്താ.

(ക) ന സമാധി ന സമാധിന്ദ്രിയന്തി? ആമന്താ.

(ഖ) ന സമാധിന്ദ്രിയം ന സമാധീതി? ആമന്താ.

(ക) ന പഞ്ഞാ ന പഞ്ഞിന്ദ്രിയന്തി? ആമന്താ.

(ഖ) ന പഞ്ഞിന്ദ്രിയം ന പഞ്ഞാതി? ആമന്താ.

(ക) ന അനഞ്ഞാതഞ്ഞസ്സാമീതി ന അനഞ്ഞാതഞ്ഞസ്സാമീതിന്ദ്രിയന്തി? ആമന്താ.

(ഖ) ന അനഞ്ഞാതഞ്ഞസ്സാമീതിന്ദ്രിയം ന അനഞ്ഞാതഞ്ഞസ്സാമീതി? ആമന്താ.

(ക) ന അഞ്ഞം ന അഞ്ഞിന്ദ്രിയന്തി? ആമന്താ.

(ഖ) ന അഞ്ഞിന്ദ്രിയം ന അഞ്ഞന്തി? ആമന്താ.

(ക) ന അഞ്ഞാതാവീ ന അഞ്ഞാതാവിന്ദ്രിയന്തി? ആമന്താ.

(ഖ) ന അഞ്ഞാതാവിന്ദ്രിയം ന അഞ്ഞാതാവീതി? ആമന്താ.