(൪) പച്ചുപ്പന്നാതീതവാരോ

(ക) അനുലോമപുഗ്ഗലോ

൬൯. (ക) യസ്സ കുസലാ ധമ്മാ ഉപ്പജ്ജന്തി തസ്സ അകുസലാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന അകുസലാ ധമ്മാ ഉപ്പജ്ജിത്ഥ തസ്സ കുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം അകുസലാ ധമ്മാ ഉപ്പജ്ജിത്ഥ, നോ ച തേസം കുസലാ ധമ്മാ ഉപ്പജ്ജന്തി. കുസലാനം ഉപ്പാദക്ഖണേ തേസം അകുസലാ ച ധമ്മാ ഉപ്പജ്ജിത്ഥ കുസലാ ച ധമ്മാ ഉപ്പജ്ജന്തി.

(ക) യസ്സ കുസലാ ധമ്മാ ഉപ്പജ്ജന്തി തസ്സ അബ്യാകതാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന അബ്യാകതാ ധമ്മാ ഉപ്പജ്ജിത്ഥ തസ്സ കുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം അബ്യാകതാ ധമ്മാ ഉപ്പജ്ജിത്ഥ, നോ ച തേസം കുസലാ ധമ്മാ ഉപ്പജ്ജന്തി. കുസലാനം ഉപ്പാദക്ഖണേ തേസം അബ്യാകതാ ച ധമ്മാ ഉപ്പജ്ജിത്ഥ കുസലാ ച ധമ്മാ ഉപ്പജ്ജന്തി.

൭൦. (ക) യസ്സ അകുസലാ ധമ്മാ ഉപ്പജ്ജന്തി തസ്സ അബ്യാകതാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന അബ്യാകതാ ധമ്മാ ഉപ്പജ്ജിത്ഥ തസ്സ അകുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ അകുസലവിപ്പയുത്തചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം അബ്യാകതാ ധമ്മാ ഉപ്പജ്ജിത്ഥ, നോ ച തേസം അകുസലാ ധമ്മാ ഉപ്പജ്ജന്തി. അകുസലാനം ഉപ്പാദക്ഖണേ തേസം അബ്യാകതാ ച ധമ്മാ ഉപ്പജ്ജിത്ഥ അകുസലാ ച ധമ്മാ ഉപ്പജ്ജന്തി.

(ഖ) അനുലോമഓകാസോ

൭൧. യത്ഥ കുസലാ ധമ്മാ ഉപ്പജ്ജന്തി തത്ഥ അകുസലാ ധമ്മാ ഉപ്പജ്ജിത്ഥാതി?…പേ….

(ഗ) അനുലോമപുഗ്ഗലോകാസാ

൭൨. (ക) യസ്സ യത്ഥ കുസലാ ധമ്മാ ഉപ്പജ്ജന്തി തസ്സ തത്ഥ അകുസലാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന യത്ഥ അകുസലാ ധമ്മാ ഉപ്പജ്ജിത്ഥ തസ്സ തത്ഥ കുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ തേസം തത്ഥ അകുസലാ ധമ്മാ ഉപ്പജ്ജിത്ഥ, നോ ച തേസം തത്ഥ കുസലാ ധമ്മാ ഉപ്പജ്ജന്തി. കുസലാനം ഉപ്പാദക്ഖണേ തേസം തത്ഥ അകുസലാ ച ധമ്മാ ഉപ്പജ്ജിത്ഥ കുസലാ ച ധമ്മാ ഉപ്പജ്ജന്തി.

(ക) യസ്സ യത്ഥ കുസലാ ധമ്മാ ഉപ്പജ്ജന്തി തസ്സ തത്ഥ അബ്യാകതാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന യത്ഥ അബ്യാകതാ ധമ്മാ ഉപ്പജ്ജിത്ഥ തസ്സ തത്ഥ കുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ അബ്യാകതാ ധമ്മാ ഉപ്പജ്ജിത്ഥ, നോ ച തേസം തത്ഥ കുസലാ ധമ്മാ ഉപ്പജ്ജന്തി. കുസലാനം ഉപ്പാദക്ഖണേ തേസം തത്ഥ അബ്യാകതാ ച ധമ്മാ ഉപ്പജ്ജിത്ഥ കുസലാ ച ധമ്മാ ഉപ്പജ്ജന്തി.

൭൩. (ക) യസ്സ യത്ഥ അകുസലാ ധമ്മാ ഉപ്പജ്ജന്തി തസ്സ തത്ഥ അബ്യാകതാ ധമ്മാ ഉപ്പജ്ജിത്ഥാതി? ആമന്താ.

(ഖ) യസ്സ വാ പന യത്ഥ അബ്യാകതാ ധമ്മാ ഉപ്പജ്ജിത്ഥ തസ്സ തത്ഥ അകുസലാ ധമ്മാ ഉപ്പജ്ജന്തീതി?

സബ്ബേസം ചിത്തസ്സ ഭങ്ഗക്ഖണേ അകുസലവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ അബ്യാകതാ ധമ്മാ ഉപ്പജ്ജിത്ഥ, നോ ച തേസം തത്ഥ അകുസലാ ധമ്മാ ഉപ്പജ്ജന്തി. അകുസലാനം ഉപ്പാദക്ഖണേ തേസം തത്ഥ അബ്യാകതാ ച ധമ്മാ ഉപ്പജ്ജിത്ഥ അകുസലാ ച ധമ്മാ ഉപ്പജ്ജന്തി.

(ഘ) പച്ചനീകപുഗ്ഗലോ

൭൪. (ക) യസ്സ കുസലാ ധമ്മാ ന ഉപ്പജ്ജന്തി തസ്സ അകുസലാ ധമ്മാ ന ഉപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന അകുസലാ ധമ്മാ ന ഉപ്പജ്ജിത്ഥ തസ്സ കുസലാ ധമ്മാ ന ഉപ്പജ്ജന്തീതി? നത്ഥി.

(ക) യസ്സ കുസലാ ധമ്മാ ന ഉപ്പജ്ജന്തി തസ്സ അബ്യാകതാ ധമ്മാ ന ഉപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന അബ്യാകതാ ധമ്മാ ന ഉപ്പജ്ജിത്ഥ തസ്സ കുസലാ ധമ്മാ ന ഉപ്പജ്ജന്തീതി? നത്ഥി.

൭൫. (ക) യസ്സ അകുസലാ ധമ്മാ ന ഉപ്പജ്ജന്തി തസ്സ അബ്യാകതാ ധമ്മാ ന ഉപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന അബ്യാകതാ ധമ്മാ ന ഉപ്പജ്ജിത്ഥ തസ്സ അകുസലാ ധമ്മാ ന ഉപ്പജ്ജന്തീതി? നത്ഥി.

(ങ) പച്ചനീകഓകാസോ

൭൬. യത്ഥ കുസലാ ധമ്മാ ന ഉപ്പജ്ജന്തി തത്ഥ അകുസലാ ധമ്മാ ന ഉപ്പജ്ജിത്ഥാതി?…പേ….

(ച) പച്ചനീകപുഗ്ഗലോകാസാ

൭൭. (ക) യസ്സ യത്ഥ കുസലാ ധമ്മാ ന ഉപ്പജ്ജന്തി തസ്സ തത്ഥ അകുസലാ ധമ്മാ ന ഉപ്പജ്ജിത്ഥാതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ തേസം തത്ഥ കുസലാ ധമ്മാ ന ഉപ്പജ്ജന്തി, നോ ച തേസം തത്ഥ അകുസലാ ധമ്മാ ന ഉപ്പജ്ജിത്ഥ. സുദ്ധാവാസാനം ദുതിയേ ചിത്തേ വത്തമാനേ അസഞ്ഞസത്താനം തേസം തത്ഥ കുസലാ ച ധമ്മാ ന ഉപ്പജ്ജന്തി അകുസലാ ച ധമ്മാ ന ഉപ്പജ്ജിത്ഥ.

(ഖ) യസ്സ വാ പന യത്ഥ അകുസലാ ധമ്മാ ന ഉപ്പജ്ജിത്ഥ തസ്സ തത്ഥ കുസലാ ധമ്മാ ന ഉപ്പജ്ജന്തീതി? ആമന്താ.

(ക) യസ്സ യത്ഥ കുസലാ ധമ്മാ ന ഉപ്പജ്ജന്തി തസ്സ തത്ഥ അബ്യാകതാ ധമ്മാ ന ഉപ്പജ്ജിത്ഥാതി?

സബ്ബേസം ചിത്തസ്സ ഭങ്ഗക്ഖണേ കുസലവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ കുസലാ ധമ്മാ ന ഉപ്പജ്ജന്തി, നോ ച തേസം തത്ഥ അബ്യാകതാ ധമ്മാ ന ഉപ്പജ്ജിത്ഥ. സുദ്ധാവാസം ഉപപജ്ജന്താനം തേസം തത്ഥ കുസലാ ച ധമ്മാ ന ഉപ്പജ്ജന്തി അബ്യാകതാ ച ധമ്മാ ന ഉപ്പജ്ജിത്ഥ.

(ഖ) യസ്സ വാ പന യത്ഥ അബ്യാകതാ ധമ്മാ ന ഉപ്പജ്ജിത്ഥ തസ്സ തത്ഥ കുസലാ ധമ്മാ ന ഉപ്പജ്ജന്തീതി? ആമന്താ.

൭൮. (ക) യസ്സ യത്ഥ അകുസലാ ധമ്മാ ന ഉപ്പജ്ജന്തി തസ്സ തത്ഥ അബ്യാകതാ ധമ്മാ ന ഉപ്പജ്ജിത്ഥാതി?

സബ്ബേസം ചിത്തസ്സ ഭങ്ഗക്ഖണേ അകുസലവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ അകുസലാ ധമ്മാ ന ഉപ്പജ്ജന്തി, നോ ച തേസം തത്ഥ അബ്യാകതാ ധമ്മാ ന ഉപ്പജ്ജിത്ഥ. സുദ്ധാവാസം ഉപപജ്ജന്താനം തേസം തത്ഥ അകുസലാ ച ധമ്മാ ന ഉപ്പജ്ജന്തി അബ്യാകതാ ച ധമ്മാ ന ഉപ്പജ്ജിത്ഥ.

(ഖ) യസ്സ വാ പന യത്ഥ അബ്യാകതാ ധമ്മാ ന ഉപ്പജ്ജിത്ഥ തസ്സ തത്ഥ അകുസലാ ധമ്മാ ന ഉപ്പജ്ജന്തീതി? ആമന്താ.