൨. ധമ്മവാരോ

(൧) ഉപ്പാദനിരോധകാലസമ്ഭേദവാരോ

൮൪. (ക) യം ചിത്തം ഉപ്പജ്ജതി ന നിരുജ്ഝതി തം ചിത്തം നിരുജ്ഝിസ്സതി ന ഉപ്പജ്ജിസ്സതീതി? ആമന്താ.

(ഖ) യം വാ പന ചിത്തം നിരുജ്ഝിസ്സതി ന ഉപ്പജ്ജിസ്സതി തം ചിത്തം ഉപ്പജ്ജതി ന നിരുജ്ഝതീതി? ആമന്താ.

(ക) യം ചിത്തം ന ഉപ്പജ്ജതി നിരുജ്ഝതി തം ചിത്തം ന നിരുജ്ഝിസ്സതി ഉപ്പജ്ജിസ്സതീതി? നോ.

(ഖ) യം വാ പന ചിത്തം ന നിരുജ്ഝിസ്സതി ഉപ്പജ്ജിസ്സതി തം ചിത്തം ന ഉപ്പജ്ജതി നിരുജ്ഝതീതി? നത്ഥി.

(൨) ഉപ്പാദുപ്പന്നവാരോ

൮൫. (ക) യം ചിത്തം ഉപ്പജ്ജതി തം ചിത്തം ഉപ്പന്നന്തി? ആമന്താ.

(ഖ) യം വാ പന ചിത്തം ഉപ്പന്നം തം ചിത്തം ഉപ്പജ്ജതീതി?

ഭങ്ഗക്ഖണേ ചിത്തം ഉപ്പന്നം, നോ ച തം ചിത്തം ഉപ്പജ്ജതി. ഉപ്പാദക്ഖണേ ചിത്തം ഉപ്പന്നഞ്ചേവ ഉപ്പജ്ജതി ച.

(ക) യം ചിത്തം ന ഉപ്പജ്ജതി തം ചിത്തം ന ഉപ്പന്നന്തി?

ഭങ്ഗക്ഖണേ ചിത്തം ന ഉപ്പജ്ജതി, നോ ച തം ചിത്തം ന ഉപ്പന്നം. അതീതാനാഗതം ചിത്തം ന ചേവ ഉപ്പജ്ജതി ന ച ഉപ്പന്നം.

(ഖ) യം വാ പന ചിത്തം ന ഉപ്പന്നം തം ചിത്തം ന ഉപ്പജ്ജതീതി? ആമന്താ.

(൩) നിരോധുപ്പന്നവാരോ

൮൬. (ക) യം ചിത്തം നിരുജ്ഝതി തം ചിത്തം ഉപ്പന്നന്തി? ആമന്താ.

(ഖ) യം വാ പന ചിത്തം ഉപ്പന്നം തം ചിത്തം നിരുജ്ഝതീതി?

ഉപ്പാദക്ഖണേ ചിത്തം ഉപ്പന്നം, നോ ച തം ചിത്തം നിരുജ്ഝതി. ഭങ്ഗക്ഖണേ ചിത്തം ഉപ്പന്നഞ്ചേവ നിരുജ്ഝതി ച.

(ക) യം ചിത്തം ന നിരുജ്ഝതി തം ചിത്തം ന ഉപ്പന്നന്തി?

ഉപ്പാദക്ഖണേ ചിത്തം ന നിരുജ്ഝതി, നോ ച തം ചിത്തം ന ഉപ്പന്നം. അതീതാനാഗതം ചിത്തം ന ചേവ നിരുജ്ഝതി ന ച ഉപ്പന്നം.

(ഖ) യം വാ പന ചിത്തം ന ഉപ്പന്നം തം ചിത്തം ന നിരുജ്ഝതീതി? ആമന്താ.

(൪) ഉപ്പാദവാരോ

൮൭. (ക) യം ചിത്തം ഉപ്പജ്ജതി തം ചിത്തം ഉപ്പജ്ജിത്ഥാതി? നോ.

(ഖ) യം വാ പന ചിത്തം ഉപ്പജ്ജിത്ഥ തം ചിത്തം ഉപ്പജ്ജതീതി? നോ.

(ക) യം ചിത്തം ന ഉപ്പജ്ജതി തം ചിത്തം ന ഉപ്പജ്ജിത്ഥാതി?

അതീതം ചിത്തം ന ഉപ്പജ്ജതി, നോ ച തം ചിത്തം ന ഉപ്പജ്ജിത്ഥ. ഭങ്ഗക്ഖണേ അനാഗതഞ്ച ചിത്തം ന ചേവ ഉപ്പജ്ജതി ന ച ഉപ്പജ്ജിത്ഥ.

(ഖ) യം വാ പന ചിത്തം ന ഉപ്പജ്ജിത്ഥ തം ചിത്തം ന ഉപ്പജ്ജതീതി?

ഉപ്പാദക്ഖണേ ചിത്തം ന ഉപ്പജ്ജിത്ഥ, നോ ച തം ചിത്തം ന ഉപ്പജ്ജതി. ഭങ്ഗക്ഖണേ അനാഗതഞ്ച ചിത്തം ന ചേവ ഉപ്പജ്ജിത്ഥ ന ച ഉപ്പജ്ജതി.

൮൮. (ക) യം ചിത്തം ഉപ്പജ്ജതി തം ചിത്തം ഉപ്പജ്ജിസ്സതീതി? നോ.

(ഖ) യം വാ പന ചിത്തം ഉപ്പജ്ജിസ്സതി തം ചിത്തം ഉപ്പജ്ജതീതി? നോ.

(ക) യം ചിത്തം ന ഉപ്പജ്ജതി തം ചിത്തം ന ഉപ്പജ്ജിസ്സതീതി?

അനാഗതം ചിത്തം ന ഉപ്പജ്ജതി, നോ ച തം ചിത്തം ന ഉപ്പജ്ജിസ്സതി. ഭങ്ഗക്ഖണേ അതീതഞ്ച ചിത്തം ന ചേവ ഉപ്പജ്ജതി ന ച ഉപ്പജ്ജിസ്സതി.

(ഖ) യം വാ പന ചിത്തം ന ഉപ്പജ്ജിസ്സതി തം ചിത്തം ന ഉപ്പജ്ജതീതി?

ഉപ്പാദക്ഖണേ ചിത്തം ന ഉപ്പജ്ജിസ്സതി, നോ ച തം ചിത്തം ന ഉപ്പജ്ജതി. ഭങ്ഗക്ഖണേ അതീതഞ്ച ചിത്തം ന ചേവ ഉപ്പജ്ജിസ്സതി ന ച ഉപ്പജ്ജതി.

൮൯. (ക) യം ചിത്തം ഉപ്പജ്ജിത്ഥ തം ചിത്തം ഉപ്പജ്ജിസ്സതീതി? നോ.

(ഖ) യം വാ പന ചിത്തം ഉപ്പജ്ജിസ്സതി തം ചിത്തം ഉപ്പജ്ജിത്ഥാതി? നോ.

(ക) യം ചിത്തം ന ഉപ്പജ്ജിത്ഥ തം ചിത്തം ന ഉപ്പജ്ജിസ്സതീതി?

അനാഗതം ചിത്തം ന ഉപ്പജ്ജിത്ഥ, നോ ച തം ചിത്തം ന ഉപ്പജ്ജിസ്സതി. പച്ചുപ്പന്നം ചിത്തം ന ചേവ ഉപ്പജ്ജിത്ഥ ന ച ഉപ്പജ്ജിസ്സതി.

(ഖ) യം വാ പന ചിത്തം ന ഉപ്പജ്ജിസ്സതി തം ചിത്തം ന ഉപ്പജ്ജിത്ഥാതി?

അതീതം ചിത്തം ന ഉപ്പജ്ജിസ്സതി, നോ ച തം ചിത്തം ന ഉപ്പജ്ജിത്ഥ. പച്ചുപ്പന്നം ചിത്തം ന ചേവ ഉപ്പജ്ജിസ്സതി ന ച ഉപ്പജ്ജിത്ഥ.

(൫) നിരോധവാരോ

൯൦. (ക) യം ചിത്തം നിരുജ്ഝതി തം ചിത്തം നിരുജ്ഝിത്ഥാതി? നോ.

(ഖ) യം വാ പന ചിത്തം നിരുജ്ഝിത്ഥ തം ചിത്തം നിരുജ്ഝതീതി? നോ.

(ക) യം ചിത്തം ന നിരുജ്ഝതി തം ചിത്തം ന നിരുജ്ഝിത്ഥാതി?

അതീതം ചിത്തം ന നിരുജ്ഝതി, നോ ച തം ചിത്തം ന നിരുജ്ഝിത്ഥ. ഉപ്പാദക്ഖണേ അനാഗതഞ്ച ചിത്തം ന ചേവ നിരുജ്ഝതി ന ച നിരുജ്ഝിത്ഥ.

(ഖ) യം വാ പന ചിത്തം ന നിരുജ്ഝിത്ഥ തം ചിത്തം ന നിരുജ്ഝതീതി?

ഭങ്ഗക്ഖണേ ചിത്തം ന നിരുജ്ഝിത്ഥ, നോ ച തം ചിത്തം ന നിരുജ്ഝതി. ഉപ്പാദക്ഖണേ അനാഗതഞ്ച ചിത്തം ന ചേവ നിരുജ്ഝിത്ഥ ന ച നിരുജ്ഝതി.

൯൧. (ക) യം ചിത്തം നിരുജ്ഝതി തം ചിത്തം നിരുജ്ഝിസ്സതീതി? നോ.

(ഖ) യം വാ പന ചിത്തം നിരുജ്ഝിസ്സതി തം ചിത്തം നിരുജ്ഝതീതി? നോ.

(ക) യം ചിത്തം ന നിരുജ്ഝതി തം ചിത്തം ന നിരുജ്ഝിസ്സതീതി?

ഉപ്പാദക്ഖണേ അനാഗതഞ്ച ചിത്തം ന നിരുജ്ഝതി, നോ ച തം ചിത്തം ന നിരുജ്ഝിസ്സതി. അതീതം ചിത്തം ന ചേവ നിരുജ്ഝതി ന ച നിരുജ്ഝിസ്സതി.

(ഖ) യം വാ പന ചിത്തം ന നിരുജ്ഝിസ്സതി തം ചിത്തം ന നിരുജ്ഝതീതി?

ഭങ്ഗക്ഖണേ ചിത്തം ന നിരുജ്ഝിസ്സതി, നോ ച തം ചിത്തം ന നിരുജ്ഝതി. അതീതം ചിത്തം ന ചേവ നിരുജ്ഝിസ്സതി ന ച നിരുജ്ഝതി.

൯൨. (ക) യം ചിത്തം നിരുജ്ഝിത്ഥ തം ചിത്തം നിരുജ്ഝിസ്സതീതി? നോ.

(ഖ) യം വാ പന ചിത്തം നിരുജ്ഝിസ്സതി തം ചിത്തം നിരുജ്ഝിത്ഥാതി? നോ.

(ക) യം ചിത്തം ന നിരുജ്ഝിത്ഥ തം ചിത്തം ന നിരുജ്ഝിസ്സതീതി?

ഉപ്പാദക്ഖണേ അനാഗതഞ്ച ചിത്തം ന നിരുജ്ഝിത്ഥ, നോ ച തം ചിത്തം ന നിരുജ്ഝിസ്സതി. ഭങ്ഗക്ഖണേ ചിത്തം ന ചേവ നിരുജ്ഝിത്ഥ ന ച നിരുജ്ഝിസ്സതി.

(ഖ) യം വാ പന ചിത്തം ന നിരുജ്ഝിസ്സതി തം ചിത്തം ന നിരുജ്ഝിത്ഥാതി?

അതീതം ചിത്തം ന നിരുജ്ഝിസ്സതി, നോ ച തം ചിത്തം ന നിരുജ്ഝിത്ഥ. ഭങ്ഗക്ഖണേ ചിത്തം ന ചേവ നിരുജ്ഝിസ്സതി ന ച നിരുജ്ഝിത്ഥ.

(൬) ഉപ്പാദനിരോധവാരോ

൯൩. (ക) യം ചിത്തം ഉപ്പജ്ജതി തം ചിത്തം നിരുജ്ഝിത്ഥാതി? നോ.

(ഖ) യം വാ പന ചിത്തം നിരുജ്ഝിത്ഥ തം ചിത്തം ഉപ്പജ്ജതീതി? നോ.

(ക) യം ചിത്തം ന ഉപ്പജ്ജതി തം ചിത്തം ന നിരുജ്ഝിത്ഥാതി?

അതീതം ചിത്തം ന ഉപ്പജ്ജതി, നോ ച തം ചിത്തം ന നിരുജ്ഝിത്ഥ. ഭങ്ഗക്ഖണേ അനാഗതഞ്ച ചിത്തം ന ചേവ ഉപ്പജ്ജതി ന ച നിരുജ്ഝിത്ഥ.

(ഖ) യം വാ പന ചിത്തം ന നിരുജ്ഝിത്ഥ തം ചിത്തം ന ഉപ്പജ്ജതീതി?

ഉപ്പാദക്ഖണേ ചിത്തം ന നിരുജ്ഝിത്ഥ, നോ ച തം ചിത്തം ന ഉപ്പജ്ജതി. ഭങ്ഗക്ഖണേ അനാഗതഞ്ച ചിത്തം ന ചേവ നിരുജ്ഝിത്ഥ ന ച ഉപ്പജ്ജതി.

൯൪. (ക) യം ചിത്തം ഉപ്പജ്ജതി തം ചിത്തം നിരുജ്ഝിസ്സതീതി? ആമന്താ.

(ഖ) യം വാ പന ചിത്തം നിരുജ്ഝിസ്സതി തം ചിത്തം ഉപ്പജ്ജതീതി?

അനാഗതം ചിത്തം നിരുജ്ഝിസ്സതി, നോ ച തം ചിത്തം ഉപ്പജ്ജതി. ഉപ്പാദക്ഖണേ ചിത്തം നിരുജ്ഝിസ്സതി ചേവ ഉപ്പജ്ജതി ച.

(ക) യം ചിത്തം ന ഉപ്പജ്ജതി തം ചിത്തം ന നിരുജ്ഝിസ്സതീതി?

അനാഗതം ചിത്തം ന ഉപ്പജ്ജതി, നോ ച തം ചിത്തം ന നിരുജ്ഝിസ്സതി. ഭങ്ഗക്ഖണേ അതീതഞ്ച ചിത്തം ന ചേവ ഉപ്പജ്ജതി ന ച നിരുജ്ഝിസ്സതി.

(ഖ) യം വാ പന ചിത്തം ന നിരുജ്ഝിസ്സതി തം ചിത്തം ന ഉപ്പജ്ജതീതി? ആമന്താ.

൯൫. (ക) യം ചിത്തം ഉപ്പജ്ജിത്ഥ തം ചിത്തം നിരുജ്ഝിസ്സതീതി? നോ.

(ഖ) യം വാ പന ചിത്തം നിരുജ്ഝിസ്സതി തം ചിത്തം ഉപ്പജ്ജിത്ഥാതി? നോ.

(ക) യം ചിത്തം ന ഉപ്പജ്ജിത്ഥ തം ചിത്തം ന നിരുജ്ഝിസ്സതീതി?

ഉപ്പാദക്ഖണേ അനാഗതഞ്ച ചിത്തം ന ഉപ്പജ്ജിത്ഥ, നോ ച തം ചിത്തം ന നിരുജ്ഝിസ്സതി. ഭങ്ഗക്ഖണേ ചിത്തം ന ചേവ ഉപ്പജ്ജിത്ഥ ന ച നിരുജ്ഝിസ്സതി.

(ഖ) യം വാ പന ചിത്തം ന നിരുജ്ഝിസ്സതി തം ചിത്തം ന ഉപ്പജ്ജിത്ഥാതി?

അതീതം ചിത്തം ന നിരുജ്ഝിസ്സതി, നോ ച തം ചിത്തം ന ഉപ്പജ്ജിത്ഥ. ഭങ്ഗക്ഖണേ ചിത്തം ന ചേവ നിരുജ്ഝിസ്സതി ന ച ഉപ്പജ്ജിത്ഥ.

(൭) ഉപ്പജ്ജമാന-നനിരോധവാരോ

൯൬. (ക) യം ചിത്തം ഉപ്പജ്ജതി തം ചിത്തം ന നിരുജ്ഝതീതി? ആമന്താ.

(ഖ) യം വാ പന ചിത്തം ന നിരുജ്ഝതി തം ചിത്തം ഉപ്പജ്ജതീതി?

അതീതാനാഗതം ചിത്തം ന നിരുജ്ഝതി, നോ ച തം ചിത്തം ഉപ്പജ്ജതി. ഉപ്പാദക്ഖണേ ചിത്തം ന നിരുജ്ഝതി ചേവ ഉപ്പജ്ജതി ച.

(ക) യം ചിത്തം ന ഉപ്പജ്ജതി തം ചിത്തം നിരുജ്ഝതീതി?

അതീതാനാഗതം ചിത്തം ന ഉപ്പജ്ജതി, നോ ച തം ചിത്തം നിരുജ്ഝതി. ഭങ്ഗക്ഖണേ ചിത്തം ന ഉപ്പജ്ജതി ചേവ നിരുജ്ഝതി ച.

(ഖ) യം വാ പന ചിത്തം നിരുജ്ഝതി തം ചിത്തം ന ഉപ്പജ്ജതീതി? ആമന്താ.

(൮) ഉപ്പജ്ജമാനുപ്പന്നവാരോ

൯൭. (ക) യം ചിത്തം ഉപ്പജ്ജമാനം തം ചിത്തം ഉപ്പന്നന്തി? ആമന്താ.

(ഖ) യം വാ പന ചിത്തം ഉപ്പന്നം തം ചിത്തം ഉപ്പജ്ജമാനന്തി?

ഭങ്ഗക്ഖണേ ചിത്തം ഉപ്പന്നം, നോ ച തം ചിത്തം ഉപ്പജ്ജമാനം. ഉപ്പാദക്ഖണേ ചിത്തം ഉപ്പന്നഞ്ചേവ ഉപ്പജ്ജമാനഞ്ച.

(ക) യം ചിത്തം ന ഉപ്പജ്ജമാനം തം ചിത്തം ന ഉപ്പന്നന്തി?

ഭങ്ഗക്ഖണേ ചിത്തം ന ഉപ്പജ്ജമാനം, നോ ച തം ചിത്തം ന ഉപ്പന്നം. അതീതാനാഗതം ചിത്തം ന ചേവ ഉപ്പജ്ജമാനം ന ച ഉപ്പന്നം.

(ഖ) യം വാ പന ചിത്തം ന ഉപ്പന്നം തം ചിത്തം ന ഉപ്പജ്ജമാനന്തി? ആമന്താ.

(൯) നിരുജ്ഝമാനുപ്പന്നവാരോ

൯൮. (ക) യം ചിത്തം നിരുജ്ഝമാനം തം ചിത്തം ഉപ്പന്നന്തി? ആമന്താ.

(ഖ) യം വാ പന ചിത്തം ഉപ്പന്നം തം ചിത്തം നിരുജ്ഝമാനന്തി?

ഉപ്പാദക്ഖണേ ചിത്തം ഉപ്പന്നം, നോ ച തം ചിത്തം നിരുജ്ഝമാനം. ഭങ്ഗക്ഖണേ ചിത്തം ഉപ്പന്നഞ്ചേവ നിരുജ്ഝമാനഞ്ച.

(ക) യം ചിത്തം ന നിരുജ്ഝമാനം തം ചിത്തം ന ഉപ്പന്നന്തി?

ഉപ്പാദക്ഖണേ ചിത്തം ന നിരുജ്ഝമാനം, നോ ച തം ചിത്തം ന ഉപ്പന്നം. അതീതാനാഗതം ചിത്തം ന ചേവ നിരുജ്ഝമാനം ന ച ഉപ്പന്നം.

(ഖ) യം വാ പന ചിത്തം ന ഉപ്പന്നം തം ചിത്തം ന നിരുജ്ഝമാനന്തി? ആമന്താ.

(൧൦) ഉപ്പന്നുപ്പാദവാരോ

൯൯. (ക) യം ചിത്തം ഉപ്പന്നം തം ചിത്തം ഉപ്പജ്ജിത്ഥാതി? നോ.

(ഖ) യം വാ പന ചിത്തം ഉപ്പജ്ജിത്ഥ തം ചിത്തം ഉപ്പന്നന്തി? നോ.

(ക) യം ചിത്തം ന ഉപ്പന്നം തം ചിത്തം ന ഉപ്പജ്ജിത്ഥാതി?

അതീതം ചിത്തം ന ഉപ്പന്നം, നോ ച തം ചിത്തം ന ഉപ്പജ്ജിത്ഥ. അനാഗതം ചിത്തം ന ചേവ ഉപ്പന്നം ന ച ഉപ്പജ്ജിത്ഥ.

(ഖ) യം വാ പന ചിത്തം ന ഉപ്പജ്ജിത്ഥ തം ചിത്തം ന ഉപ്പന്നന്തി?

പച്ചുപ്പന്നം ചിത്തം ന ഉപ്പജ്ജിത്ഥ, നോ ച തം ചിത്തം ന ഉപ്പന്നം. അനാഗതം ചിത്തം ന ചേവ ഉപ്പജ്ജിത്ഥ ന ച ഉപ്പന്നം.

൧൦൦. (ക) യം ചിത്തം ഉപ്പന്നം തം ചിത്തം ഉപ്പജ്ജിസ്സതീതി? നോ.

(ഖ) യം വാ പന ചിത്തം ഉപ്പജ്ജിസ്സതി തം ചിത്തം ഉപ്പന്നന്തി? നോ.

(ക) യം ചിത്തം ന ഉപ്പന്നം തം ചിത്തം ന ഉപ്പജ്ജിസ്സതീതി?

അനാഗതം ചിത്തം ന ഉപ്പന്നം, നോ ച തം ചിത്തം ന ഉപ്പജ്ജിസ്സതി. അതീതം ചിത്തം ന ചേവ ഉപ്പന്നം ന ച ഉപ്പജ്ജിസ്സതി.

(ഖ) യം വാ പന ചിത്തം ന ഉപ്പജ്ജിസ്സതി തം ചിത്തം ന ഉപ്പന്നന്തി?

പച്ചുപ്പന്നം ചിത്തം ന ഉപ്പജ്ജിസ്സതി, നോ ച തം ചിത്തം ന ഉപ്പന്നം. അതീതം ചിത്തം ന ചേവ ഉപ്പജ്ജിസ്സതി ന ച ഉപ്പന്നം.

(൧൧) അതീതാനാഗതവാരോ

൧൦൧. (ക) യം ചിത്തം ഉപ്പജ്ജിത്ഥ നോ ച തം ചിത്തം ഉപ്പന്നം, തം ചിത്തം ഉപ്പജ്ജിസ്സതീതി? നോ.

(ഖ) യം വാ പന ചിത്തം ഉപ്പജ്ജിസ്സതി നോ ച തം ചിത്തം ഉപ്പന്നം, തം ചിത്തം ഉപ്പജ്ജിത്ഥാതി? നോ.

(ക) യം ചിത്തം ന ഉപ്പജ്ജിത്ഥ നോ ച തം ചിത്തം ന ഉപ്പന്നം, തം ചിത്തം ന ഉപ്പജ്ജിസ്സതീതി? ആമന്താ.

(ഖ) യം വാ പന ചിത്തം ന ഉപ്പജ്ജിസ്സതി നോ ച തം ചിത്തം ന ഉപ്പന്നം, തം ചിത്തം ന ഉപ്പജ്ജിത്ഥാതി? ആമന്താ.

(൧൨) ഉപ്പന്നുപ്പജ്ജമാനവാരോ

൧൦൨. (ക) ഉപ്പന്നം ഉപ്പജ്ജമാനന്തി?

ഭങ്ഗക്ഖണേ ഉപ്പന്നം, നോ ച ഉപ്പജ്ജമാനം. ഉപ്പാദക്ഖണേ ഉപ്പന്നഞ്ചേവ ഉപ്പജ്ജമാനഞ്ച.

(ഖ) ഉപ്പജ്ജമാനം ഉപ്പന്നന്തി? ആമന്താ.

(ക) ന ഉപ്പന്നം ന ഉപ്പജ്ജമാനന്തി? ആമന്താ.

(ഖ) ന ഉപ്പജ്ജമാനം ന ഉപ്പന്നന്തി?

ഭങ്ഗക്ഖണേ ന ഉപ്പജ്ജമാനം, നോ ച ന ഉപ്പന്നം. അതീതാനാഗതം ചിത്തം ന ചേവ ഉപ്പജ്ജമാനം ന ച ഉപ്പന്നം.

(൧൩) നിരുദ്ധനിരുജ്ഝമാനവാരോ

൧൦൩. (ക) നിരുദ്ധം നിരുജ്ഝമാനന്തി? നോ.

(ഖ) നിരുജ്ഝമാനം നിരുദ്ധന്തി? നോ.

(ക) ന നിരുദ്ധം ന നിരുജ്ഝമാനന്തി?

ഭങ്ഗക്ഖണേ ന നിരുദ്ധം, നോ ച ന നിരുജ്ഝമാനം. ഉപ്പാദക്ഖണേ അനാഗതഞ്ച ചിത്തം ന ചേവ നിരുദ്ധം ന ച നിരുജ്ഝമാനം.

(ഖ) ന നിരുജ്ഝമാനം ന നിരുദ്ധന്തി?

അതീതം ചിത്തം ന നിരുജ്ഝമാനം, നോ ച ന നിരുദ്ധം. ഉപ്പാദക്ഖണേ അനാഗതഞ്ച ചിത്തം ന ചേവ നിരുജ്ഝമാനം ന ച നിരുദ്ധം.

(൧൪) അതിക്കന്തകാലവാരോ

൧൦൪. (ക) യം ചിത്തം ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം, നിരുജ്ഝമാനം ഖണം ഖണം വീതിക്കന്തം അതിക്കന്തകാലം തം ചിത്തന്തി?

ഭങ്ഗക്ഖണേ ചിത്തം ഉപ്പാദക്ഖണം വീതിക്കന്തം ഭങ്ഗക്ഖണം അവീതിക്കന്തം, അതീതം ചിത്തം ഉപ്പാദക്ഖണഞ്ച വീതിക്കന്തം ഭങ്ഗക്ഖണഞ്ച വീതിക്കന്തം.

(ഖ) യം വാ പന ചിത്തം നിരുജ്ഝമാനം ഖണം ഖണം വീതിക്കന്തം അതിക്കന്തകാലം, ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം തം ചിത്തന്തി?

അതീതം ചിത്തം.

(ക) യം ചിത്തം ന ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം, ന നിരുജ്ഝമാനം ഖണം ഖണം വീതിക്കന്തം അതിക്കന്തകാലം തം ചിത്തന്തി?

ഉപ്പാദക്ഖണേ അനാഗതം ചിത്തം.

(ഖ) യം വാ പന ചിത്തം ന നിരുജ്ഝമാനം ഖണം ഖണം വീതിക്കന്തം അതിക്കന്തകാലം, ന ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം തം ചിത്തന്തി?

ഭങ്ഗക്ഖണേ ചിത്തം ഭങ്ഗക്ഖണം അവീതിക്കന്തം നോ ച ഉപ്പാദക്ഖണം അവീതിക്കന്തം, ഉപ്പാദക്ഖണേ അനാഗതഞ്ച ചിത്തം ഭങ്ഗക്ഖണഞ്ച അവീതിക്കന്തം ഉപ്പാദക്ഖണഞ്ച അവീതിക്കന്തം.